ކޮވިޑް-19އާ ގުޅިގެން ފްލެޓުތަކުގެ ކުލި އަނެއްކާ ވެސް އިތުރު ތިން މަހަށް ފަސް ކޮށްދީފި
28 ސެޕްޓެމްބަރު 2020 | ހޯމަ 12:25މީގެ ކުރިން ވެސް މާޗް މަހުން ފެށިގެން ހަ މަހަށް ކުލި ފަސްކޮށްދީފައިވޭ
ސަރުކާރުގެ ހުރިހާ ހައުސިން ޔުނިޓަކުން ތިން މަހަށް ވަނީ ކުލި ފަސްކޮށްދީފައި
ގެދޮރުވެރިކުރުން ޕްރޮގްރާމްގެ ދަށުން މާލެ، ހުޅުމާލެއާއި، އަތޮޅު ތެރެއިން ދޫކޮށްފައިވާ ފުލެޓު އަދި ހައުސިންގ ޔުނިޓުތަކުގެ ކުލި އިތުރު ތިން މަހަށް ފަސް ކޮށްދީފިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ބުނީ ކޮވިޑް-19 އާއި ގުޅިގެން ގެދޮރުވެރިކަމުގެ ޕްރޮގްރާމްގެ ދަށުން މާލެ އާއި ހުޅުމާލެ އާއި އަތޮޮޅުތަކުގައި ދޫކޮށްފައި ހުރި ފްލެޓްތަކުގެ ކުލި މާޗް މަހުން ފެށިގެން ހަ މަހަށް ފަސް ކޮށްދީފައިވާ ކަމަށެވެ. އަދި 31 އޮގަސްޓްގެ ނިޔަލަށް ހަމަވި ނަމަވެސް ވަރަށް ގިނަ ފަރާތްތަކަކުން މުއްދަތު އިތުރު ކޮށްދިނުމަށް އެދެމުންދާތީވެ ސެޕްޓެމްބަރު 2020ން ނޮވެމްބަރު 2020 ނިޔަލަށް 03 (ތިނެއް) މަހަށް ކުލި ނެގުން ފަސް ކޮށްފައިވާ ކަމަށް މިނިސްޓްރީން ބުނެއެވެ.
ހައުސިން މިނިސްޓްރީން ބުނީ ކުލި ފަސްކުރާ މި މުއްދަތުގައި މެއިންޓެނެންސް ފީ ދައްކަން ޖެހޭ ކަމަށެވެ. އަދި ކުލި ފަސްކުރާ މުއްދަތު އެގްރީމެންޓަށް އިތުރު ކުރެވޭނެ ކަމަށެވެ.
ހައުސިން މިނިސްޓްރީން ބުނީ ކުލި ފަސް ކުރުމަށް ބޭނުންވާ ފަރާތްތަކުން 15 އޮކްޓޯބަރު 2020 ވާ ބުރާސްފަތި ދުވަހުގެ މެންދުރު 13:00 ކުރިން އައިޑީކާޑުގެ ކޮޕީއާއެކު އެގްރީމެންޓް ނަމްބަރު އެނގޭނެ ގޮތަށް މިނިސްޓްރީގެ އީމެއިލްbeneficiary@planning.gov.mvއަށް މެއިލް ކުރުމަށް އެދޭ ކަމަށެވެ.
އިތުރު މައުލޫމާތު ހޯދުމަށް މިނިސްޓްރީގެ ނަންބަރު 4004968 ނުވަތަ 4004969 ފޯނަށް ރަސްމީ ގަޑީގައި ގުޅުމަށް ވަނީ އެދިފައެވެ.
