ކާގޯ ފެރީއާއެކު ދެ ޤައުމުގެ ގުޅުން އިތުރަށް ވަރުގަދަވެގެން ދާނެ: ރައީސް
26 ސެޕްޓެމްބަރު 2020 | ހޮނިހިރު 19:24މި ދަތުރުތަކުގެ ސަބަބުން ގައުމަށް އިތުރު ކުރިއެރުން އަންނާނެ
މުދާ ހިފައިގެން ކުދުއްފުއްޓަށް ބަނދަރުކުރި ކާގޯ ފެރީ
އިންޑި އާއި ރާއްޖެ އާއި ދެމެދު ފެށި ކާގޯ ފެރީގެ ހިދުމަތާއެކު ދެ ގައުމުގެ ގުޅުން އިތުރަށް ވަރުގަދަވެގެން ދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
އިންޑިއާގެ ކޮޗިންއާއި، ރާއްޖޭގެ އުތުރުން ހދ. ކުޅުދުއްފުއްޓާއި ދެމެދު ފެށި ކާގޯ ފެރީ ހޮނިހިރު ދުވަހު ވަނީ ކުޅުދުއްްފުޓަށް ބަނދަރުކޮށްފަ އެވެ.
އިންޑި އާއި ރާއްޖެ އާއި ދެމެދު ފެށިގެން ދިޔަ ދަތުރުތަކާއި ގުޅިގެން ހޮނިހިރު ދުވަހުގެރޭ ރައީސް ސޯލިހު ކުރެއްވި ޓުވީޓުގައި ވަނީ އިންޑިއާގެ ބޮޑުވަޒީރު ނަރެންދުރަ މޯދީއަށާއި، އެ ޤައުމުގެ ސަރުކާރަށް ޝުކުރު ދަންނަވާފަ އެވެ. އަދި ވިދާޅުވީ މި ދަތުރުތަކާއެކު ދެ ޤައުމުގެ ގުޅުން އިތުރަށް ބަދަހިވެ، ގައުމަށް އިތުރު ކުރިއެރުން އަންނާނެ ކަމަށެވެ.
ހޮނިހިރު ދުވަހު ބަނދަރުކުރި މި ފެރީން ގިނަ އަދަދެއްގެ ކޮންސްޓްރަކްޝަން ސާމާނާއި، ދަނޑުވެރިކަމާ ގުޅޭ ސާމާނު ކުޅުދުއްފުއްޓަށް ބާލާނެއެވެ. އެގޮތުން ކުޅުދުއްފުއްޓަށް ގިނަ އަދަދެއްގެ ސިމެންތި ބޭލުމަށް ހަމަޖެހިފައިވެއެވެ. އެއަށްފަހު މި ފެރީ މާލެއަށް ވެސް އައުމަށް ހަމަޖެހިފައިވާއިރު، މާލެއަށް ސިމެންތިއާއި، ކޮންސްޓްރަކްޝަން ސާމާނާއި، ކާބޯތަކެއްޗާއި، މެޝިނަރީ ގެންދިއުމަށް ވަނީ ހަމަޖެހިފައެވެ. އެގޮތުން މާލެއަށް ގެންދާ ބައެއް ސާމާނުގެ ތެރޭގައި ޕީވީސީ ޕައިޕް، ގާރޑެން ޕޮޓްސް ވެސް ހިމެނެއެވެ.
މި ޚިދުމަތް ފެށުމާއެކު ރާއްޖެ އާއި ކޮޗިންއާ ދެމެދު މަހަކު 2-3 ދަތުރު ކުރާނެ ކަމަށް ޓްރާންސްޕޯޓް މިނިސްޓްރީން ވަނީ ބުނެފައެވެ. މި ދަތުރުތައް ކުރާނީ ކޮޗިން އިން ކުޅުދުއްފުށީގެ ޕޯޓަށާއި މާލޭގެ ޕޯޓަށެވެ. އެއާއެކު ރާއްޖޭގެ ވިޔަފާރިތައް އިތުރަށް ފުޅާވެ، އަތޮޅު ތެރޭގައިވެސް ވިޔަފާރީގެ އިތުރު ފުރުސަތުތައް ފަހި ކުރުމަށް މިވަނީ މަގު ފަހިވެގެން ގޮސްފައެވެ.
