އައްޑޫ ސިޓީގެ މަގުތައް ތަރައްގީކުރުމުގެ 134 މިލިއަން ރުފިޔާގެ މަޝްރޫއު ފެށުމާ ގާތަށް

އައްޑޫ ސިޓީގެ މަގުތައް ތާރު އަޅައިގެން ހެދުމަށް ބޭނުންވާ ތާރު އަދި އިތުރު މެޝިނަރީތަކާއި ސާމާނު ގެންގޮސްފައިވާ ކަމަށް އައްޑޫ ސިޓީ ކައުންސިލުން ބުނެފިއެވެ.

މަގު ހެދުމަށް ބޭނުންވާ ސާމާނުތައް އައްޑޫ ސިޓީއަށް ގެންގޮސްފައިވަނީ ބުރާސްފަތި ދުވަހުގެ ވަގުތެއްގައި ކަމަށް ކައުންސިލުން ބުނެއެވެ. ދާދި އަވަހަށް އެ މަގުތަކުގައި ތާރު އެޅުމުގެ މަސައްކަތް ވަރަށް ފަށާނެ ކަމަށްވެސް ކައުންސިލުން ވަނީ މައުލޫމާތު ދީފައެވެ. ނަމަވެސް ސީދާ ތާރީހެއް އިއުލާންކޮށްފައެއް ނުވެއެވެ.

Advertisement

ޖީކޭ ޑިވެލޮޕްމަންޓްސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ މި މަޝްރޫއުގެ ދަށުން އައްޑޫ ސިޓީގެ 18 މަގެއްގައި އަލަށް ތާރު އެޅުމަށް ވަނީ ހަމަޖެހިފައެވެ. އަދި މަރަދޫ، މަރަދޫފޭދޫ އަދި ފޭދޫގެ ބޮޑުމަގުގެ އިތުރުން ފޭދޫ ރަށްދެބައި މަގު ރީސަރފޭސް ކުރުމަށްވެސް ހަމެޖިފައި ވެއެވެ. މި މަޝްރޫއު ޖީކޭ ޑިވެލޮޕްމަންޓްސް ޕްރައިވެޓް ލިމިޓެޑާ ހަވާލުކޮށް އެއްބަސްވުމުގައި ސޮއިކޮށްފައި ވަނީ 23 ޑިސެންބަރު 2019 ގައެވެ.

އައްޑޫ ސިޓީ ކައުންސިލުން ބުނީ މި އެއްބަސްވުމާއިއެކު މަޝްރޫއު ފެށުމަށް ބޭނުންވާ ކަންކަން ފެށިގެން ކުރިއަށް ގޮސްފައިވާ ކަމަށެވެ. އަދި މަގު ހެދުމުގެ މަޝްރޫއުގެ މަސައްކަތް ބާރު ސްޕީޑްގައި ކުރިއަށް ގެންދިއުމަށް، ކައުންސިލުން ކަމާ ގުޅޭ ފަރާތްތަކާއެކު މަޝްވަރާގެ ބައްދަލުވުންތައް ބާއްވައި ކުރި ބުރަ މަސައްކަތުގެ ނަތީޖާއެއްގޮ ގޮތުން 30 ޖެނުއަރީ 2020 ވަނަ ދުވަހު ތާރު އެޅުމުގެ މަސައްކަތަށް ބޭނުންވާ ފުރަތަމަ ޝިޕްމަންޓް އައްޑޫ ސިޓީއަށް ލިބިފައިވާ ކަމަށެވެ.

134 މިލިއަން ރުފިޔާ އަށްވުރެ ގިނަ ދިވެހި ފައިސާ ޚަރަދުކޮށްގެން ސަރުކާރުން ކުރިއަށްގެންދާ މި މަޝްރޫއުގެ ސަބަބުން، އައްޑޫ ސިޓީގެ މަގުތަކުގެ ހާލަތު ގޯސްވުމުގެ ސަބަބުން ކުރިމަތިވަމުން ދިޔަ ގޮންޖެހުންތަކަށް ހައްލެއް ލިބިގެންދާނެ ކަމަށް ކައުންސިލުން ބުނެއެވެ. އައްޑޫ ސިޓީގެ މަގުތައް ޒަމާނީ ފެންވަރަށް ތަރައްގީކުރުމަކީ އެ ސިޓީގެ ރައްޔިތުން ވަރަށް ބޮޑަށް އެދެމުން އަންނަ ކަމެކެވެ.

މީގެ އިތުރުން ކައުންސިލުން ބުނީ މަގު ހެދުމުގެ ދެވަނަ މަޝްރޫއެއް ވެސް އެކު އެކީގައި ފެށުމަށް ތައްޔާރުވަމުންދާ ކަމަށެވެ. މި މަޝްރޫއުގެ ތެރެއިން މަގުތައް ހެދުމާއި، ބިން ހިއްކުމާއި، މަގުތަކުގެ ފެން ހިންދާ ނިޒާމާއި މަގުތަކުގައި ސީސީޓީވީ ހަރުކުރުން ކުރިއަށް ދާނެއެވެ. ޑިޒައިން އެންޑް ކޮންސްޓްރަކްޝަން ކޮންސަލްޓަންސީ އުސޫލުން މި މަސައްކަތް އެލް އެންޑް ޓީ އިންފްރާސްޓްރަކްޗަރ އިންޖިނިއަރިންގ ލިމިޓެޑާއި، އެލް އީއޭ އެސޯސިއޭޓްސް ސައުތު އޭޝިއާ ޕްރައިވެޓް ލިމިޓެޑާ ހަވާލުކޮށްފައިވަނީ 12 ޑިސެމްބަރު 2019 ގައެވެ.

މި މަޝްރޫއުގެ ދަށުން އައްޑޫ ސިޓީގެ 25 ކިލޯމީޓަރުގެ މަގު ހެދުމާއި، 228 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. އޭގޮތުން، ހިތަދޫ އަވަށުން 90 ހެކްޓަރުގެ ބިމަކާއި މަރަދޫ އަދި މަރަދޫފޭދޫއިން 75 ހެކްޓަރު އަދި ހުޅުދޫ އާއި މީދޫން 38 ހެކްޓަރުގެ އިތުރުން 25 ހެކްޓަރުގެ ބިން ރިސޯޓް ތަރައްގީ ކުރުމަށް ހިއްކުމަށް ހަމަޖެހިފައި ވެއެވެ.