ކ. މާލެ
|
26 ސެޕްޓެންބަރ 2020 | ހޮނިހިރު 02:47
ޖެނީވާގައި ހުންނަ ޑަބްލިޔުއެޗްއޯގެ މައި އިދާރާ
ޖެނީވާގައި ހުންނަ ޑަބްލިޔުއެޗްއޯގެ މައި އިދާރާ
ރޮއިޓަރސް
ކޮވިޑް-19 ދުނިޔޭގެ ހާލަތު
ކޮވިޑް-19 އަށް އުފައްދާ ވެކްސިނެއް ފުޅާ ދާއިރާއެއްގައި ބޭނުންކުރަން ފެށުމުގެ ކުރިން، 2 މިލިއަން މީހުން މަރުވެދާނެ: ޑަބްލިޔުއެޗްއޯ
 
ވައިރަސް އިން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަންނުދޭ ނަމަ އެއަދަދަށް މީހުން މަރުވުމަކީ އެކަށީގެންވާ ކަމެއް
 
މިބަލީގައި މިހާތަނަށް 990،000 ށް ވުރެ ގިނަ މީހުން ވަނީ މަރުވެފައި

ކޮވިޑް-19 އަށް ވެކްސިނެއް އުފެއްދި ފުޅާ ދާއިރާއެއްގައި ބޭނުންކުރަން ފެށުމުގެ ކުރިން ވައިރަސް ޖެހިގެން ދެ މިލިއަން މީހުން މަރުވެދާނެ ކަމަށާއި ވައިރަސް އިން ރައްކާތެރިވުމަށް އަޅާފައިވާ ފިޔަވަޅުތަކަށް އަމަލުނުކުރާނަމަ އެއަށްވުރެ ގިނަ މީހުން ވައިރަސް ޖެހިގެން މަރުވާނެ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނެފި އެވެ.

ހުކުރު ދުވަހު އެޖަމިއްޔާއިން ބޭއްވި ނޫސްވެރިންގެ ބައްދަލުވުމުގައި އދ ގެ އެމަރޖެންސީ ޕްރޮގްރާމްގެ ހެޑް މައިކް ރިޔާން ވިދާޅުވީ ވައިރަސް އިން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަންނުދޭ ނަމަ އެއަދަދަށް މީހުން މަރުވުމަކީ ވަރަށް ގާތްކަމެއް ކަމަށެވެ.

މިދިޔަ އަހަރުގެ ޑިސެމްބަރ މަހުގެ 31 ވަނަ ދުވަހު ޗައިނާގެ ވުހާން އިން ކޮވިޑް-19 ފެނުނު ފަހުން 9 މަސްވާން އަންނައިރު މިހާތަނަށް މިބަލީގައި 990،000ށް ވުރެ ގިނަ މީހުން ވަނީ މަރުވެފައެވެ.

ރިޔާން ވިދާޅުވީ އަލަށް ފެންނަމުންދާ ގިނަ ކޭސްތަކަކީ ޒުވާނުންގެ ފުށުން ފެންނަމުންދާ ކޭސްތަކަކަށް ވިޔަސް އެކަމުގެ ޒިންމާ ޒުވާނުންގެ ބޮލުގައި ނޭޅުވުމަށެވެ. ދުނިޔޭގެ އެކި ހިސާބުތަކުގައި ވައިރަސް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ލުއި ތައް ދޭން ފެށުމާއެކު ވައިރަސް ފެތުރޭ މިންވަރު ވަނީ މައްޗަށްދާން ފަށާފައެވެ.

ރިޔާން ވިދާޅުވީ ވައިރަސް ފަތުރަނީ ޒުވާނުންނޭ ބުނެ އެކަމުގެ އިނގިލި އެކަކު އަނެކަކާ ދިމާލަށް ދިއްކުރާ ބަޔަކަށް އެންމެން ނުވާނެ ކަމަށް އުންމީދުކުރާ ކަމަށެވެ. ޒުވާނަކާ ދިމާލަށް ދުވަސްވީ މީހަކު އިނގިލިދިއްކޮށް އެކަމުގެ ޒިންމާ އުފުލަންޖެހޭނެ ކަމަށް ބުނުމަކީ ޒުވާނަކު އެންމެ ފަހު ކަމެއްގެ ގޮތުގައި އަޑުއަހާނެ ކަންތައް ކަމަށް ރިޔާން ވިދާޅުވި އެވެ.

އަނެއްކޮޅުން ޑަބްލިޔުއެޗްއޯއިން އަންނަނީ ދުނިޔޭގެ އެކި ހިސާބުތަކަށް ފުޅާ ދާއިރާއެއްގައި ވައިރަސް އަށް އުފައްދާ ވެކްސިން ފޯރުކޮށްދިނުމަށް އެކަށައަޅާފައިވާ ޕްރޮގްރާމް ކަމުގައިވާ ކޮވޭވެކްސް ގައި ޗައިނާއިން ބައިވެރިވޭތޯ އަދިވެސް އެގައުމާއެކު ވާހަކަތައް ކުރިޔަށް ގެންދަމުންނެވެ. މީގެ ހަފްތާ އެއް ކުރިން ވަނީ ކޮވޭވެކްސްގައި ބައިވެރިވުމުގެ މުއްދަތު ހަމަވެފައެވެ.

ޗައިނާ އާއެކު ކުރިޔަށްގެންދާ ވާހަކަތަކުގައި ކޮވިޑް-19 އަށް ޗައިނާއިން އުފައްދަމުން އަންނަ ވެކްސިން ފުޅާ ދާއިރާއެއްގައި ދުނިޔޭގެ އެހެން ގައުމުތަކަށް ލިބޭނެ އިންތިޒާމުތަކާއި ގުޅޭގޮތުންވެސް ވާހަކަ ދައްކަމުން އަންނަ ކަމަށް ރިޕޯޓްތައް ބުނެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަބުދުﷲ ނަސީރު އިބްރާހިމް
0%
100%
0%
0%
0%
0%
ކޮމެންޓް