ނެދަލެންޑްސްގެ ގައުމީ ފުޓްބޯޅަ ޓީމުގެ ކޯޗަކަށް ނެދަލެންޑްސްގެ ކުރީގެ ޑިފެންޑަރު ފްރޭންކް ޑި ބޮއާ ހަމަޖައްސައިފިއެވެ.
ޑި ބޮއާ އަކީ ނެދަލެންޑްސްގެ ގައުމީ ފުޓްބޯޅަ ޓީމަށް ތިންވަނައަށް އެންމެ ގިނަ މެޗު ކުޅެދީފައިވާ ކުޅުންތެރިޔާއެވެ. ޑި ބޮއާ ނެދަލެންޑްސްގެ ފުޓްބޯޅަ ޓީމާ ހަވާލުވީ މިދިޔަ އޮގްސްޓް މަހު ރޮނާލްޑް ކޫމަން ބާސެލޯނާއާ ހަވާލުވުމާ ގުޅިގެންނެވެ. އެއާއެކު މި މަހުގެ ކުރީކޮޅު ޔުއެފާ ނޭޝަންސް ލީގުގައި ނެދަލެންޑްސްއިން ކުޅުނު ދެ މެޗުގައި އިރުޝާދު ދީފައިވަނީ ކުރީގެ އެސިސްޓަން ކޯޗު ޑްވައިޓް ލޮޑެވެޔެސްއެވެ.
ނެދަލެންޑްސްގެ ފުޓްބޯޅަ ޓީމުގެ ކޯޗަކަށް އުމުރުން 50 އަހަރުގެ ޑި ބޮއާ ހަމަޖައްސާފައިވަނީ 2022 ވަނަ އަހަރު އޮންނަ ފީފާ ވޯލްޑް ކަޕްގެ ނިޔަލަށެވެ. އަދި އެ ޓީމުގެ އެސިސްޓަންޓް ކޯޗަކަށް ކުރީގެ ފޯވާޑް ރޫޑް ވެން ނިސްޓެލްރޫއީ ވަނީ ހަމަޖައްސާފައެވެ.
ޑި ބޮޔާ އެންމެ ފުރަތަމަ ކޯޗިންގެ ކެރިއަރު ފަށާފައިވަނީ އަޔަކްސްއިންނެވެ. އަޔެކްސްގައި ހޭދަކުރި ފަސް ސީޒަނުގެ ތެރެއިން ހަތަރު ފަހަރު އެ ޓީމަށް ޑި ބޮއާ ވަނީ ނެދަލެންޑްސް ލީގު ހޯދައިދީފައެވެ.
އޭގެ ފަހުން 2016 ވަނަ އަހަރު ޑި ބޮއާ އިންޓަ މިލާނާ ހަވާލުވި ނަމަވެސް، އިންޓަގެ ކޯޗުކަމުން 14 މެޗަށްފަހު އޭނާ ވަނީ ވަކިކޮށްފައެވެ. އަދި އޭގެ ފަހުން ކްރިސްޓަލް ޕެލަސްއާ އޭނާ ހަވާލުވިއިރު، ފަސް މެޗަށްފަހު އެ ޓީމުގެ ކޯޗުގެ މަގާމުންވެސް ޑި ބޮއާ ވަކިކުރިއެވެ. އެންމެ ފަހުން ޑި ބޮއާ އިރުޝާދު ދީފައިވަނީ އެމެރިކާގެ މޭޖާ ލީގުގައި ވާދަކުރަމުން އަންނަ އެޓަލާންޓާ ޔުނައިޓެޑަށެވެ.