ކުމުންދޫ ނޭޗާރ ޕާރކް ބަލާލަންދާން ލޯންޗް ފެރީއެއް ހަމަޖައްސައިފި
ކުމުންދޫ ނޭޗަރ މާޗް ބަލާލުމަށް ކޮންމެ ހޮނިހިރު ދުވަހު ދެ ދަރުތު ކުރާނެ
ކުމުންދޫ ނޭޗަރ ޕާރކް: ކުމުންދޫގެ އަމިއްލަ ޖަމިއްޔާއަކުން އެރަށުގައި ތަރައްގީކުރި ތަނެއް
ހދ. ކުޅުދުއްފުށީ މަރިޔާޒް ލޯންޗުން، ހދ. ކުމުންދޫ ނޭޗާރ ޕާރކް ބަލާލަންދާން ބޭނުންވާ ފަރާތްތަކަށް ހާއްސަ ލޯންޗް ފެރީއެއް ބާއްވަން ނިންމައިފިއެވެ.
މަރިޔާޒު ލޯންޗްގެ ވެރިޔާ މުހައްމަދު އިބްރާހިމް "ރާއްޖެއެމްވީ" އަށް މައުލޫމާތު ދެމުން ބުނީ، 22 މީހުންގެ ޖާގައިގެ އެ ލޯންޗު ފެރީ ދަތުރު ކުރުމަށް ހަމަޖެހިފައިވަނީ ކޮންމެ ހޮނިހިރު ދުވަހެއްގަ ކަމަށެވެ.
މުހައްމަދު ބުނީ، މި ފެރީ ހަމަޖެއްސީ، ގިނަ ބަޔަކު، ކުމުންދޫ ނޭޗަރ ޕާކް ބަލާލަންދާން އެދެމުންދާތީ ކަމަށެވެ. އެގޮތުން ކުމުންދޫއަށް ދެވޭނެ ފަސޭހަ ފުރުސަތެއް ތަނަވަސްކޮށްދިނުމުގެ ގޮތުން އަލަށް ފަށައިގަންނަ ހިދްމަތެއް ކަމަށް މުހައްމަދު ބުނެއެވެ.
މުހައްމަދު ބުނީ، ފުރަތަމަ އެއްމަހަށް ޝެޑިއުލްކޮށްފައި ވީނަމަވެސް ޑިމާންޑަށް ބަލައި ކުރިއަށް އޮތްތަނުގައި ދަތުރުތައް ބާއްވާނެކަމަށެވެ. އެގޮތުން، 10 ވަރަކަށް މިނެޓްގެ މިދަތުރުގައި ކުޅުދުއްފުށިން ފުރުމަށް ހަމަޖެހިފައިވަނީ ހޮނިހިރު ދުވަހު ހެނދުނު 7:00 ގައި ކަމަށާއި ދެ ވަނަ ދަތުރު 15:15 ކުޅުދުއްފުށިން ފުރާނެ ކަމާއި، ކުމުންދޫ އިން ކުޅުދުއްފުއްޓަށް ފުރާނެ ފަހު ދަތުރަކީ 19:15 ކަމަށް މުހައްމަދު ބުނެއެވެ. އެގޮތުން ހޮނިހިރު ދުވަހު ދެ ދަތުރު ކުރާނެ ކަމަށް މުހައްމަދު ބުނެއެވެ.
ލޯންޗަށް ގުޅާލައިގެން ނަންނޯޓް ކޮށްލުމުން ބުކިން ހައްދާލެވުމުގެ ކަންތައް ހަމަޖެހިފައިވާއިރު ދަތުރުގެ އަގަކީ ކޮޅަކަށް 50ރ. އެވެ. އަދި ބުކިންގ ހެއްދުމަށާއި އިތުރު މައުލޫމާތު ހޯދުމަށް 7659977 ނުވަތަ 7697379 އަށް ގުޅުމަށް އެ ފަރާތުން އެދެއެވެ.
މުހައްމަދު ބުނީ، ހޮނިހިރު ދުވަހު (މާދަމާ) ފަށާ ފުރަތަމަ ފެރީ ދަތުރުގެ ބުކިންގ ގާތް ކަނޑަކަށް ފުލްވެފައިވާ ކަމަށާއި މިކަމަށް ރައްޔިތުންގެ ޝައުގުވެރިކަން ބޮޑުކަން ފާހަގަ ކުރެވޭ ކަމަށެވެ.
މުހައްމަދު ބުނީ، ރާއްޖޭގެ ކޮންމެ ހިސާބަކުންވެސް، ކުމުންދޫ ނޭޗަރ ޕާކް އައުމަށް ބުކިން ހެދިދާނެ ކަމަށާއި، ނަމަވެސް އެފަރާތަކުން ފުރަތަމަ ޖެހޭނީ ކުޅުދުއްފުއްޓަށް އަންނަން ކަމަށެވެ. އޭރުން ކުޅުދުއްފުށިން ފެރީގައި ކުމުންދޫއަށް ދިއުމުގެ އިންތިޒާމު ހަމަޖެހިގެންދާނެ ކަމަށް މުހައްމަދު ބުނެއެވެ.
ކުމުންދޫގެ އަމިއްލަ ޖަމިއްޔާއަކުން އެރަށުގައި ތަރައްގީކުރި ނޭޗަރ ޕާރކާއެކު އެރަށަށް ދަތުރުކުރާ މީހުންގެ އަދަދު އިތުރުވެފައިވާ ކަމުގެ މައުލޫމާތު ލިބެއެވެ. ނޭޗަރ ޕާރކްގެ އިތުރުން ޒުވާނުން އިސްނަގައިގެން ރަށުގެ އެކި ސަރަހައްދުތަކުގައި ހިތްގައިމު މައިޒާންތައް ހެދުމުގެ މަސައްކަތް މިހާރުވެސް ކުރަމުންދާ ކަމަށް ވެއެވެ.
