އެމްޑީޕީގެ އާ ވެބްސައިޓް ލޯންޗް ކޮށްފި

އެމްޑީޕީގެ އާ ވެބްސައިޓް ލޯންޗްކޮށްފި އެވެ. އެމްޑީޕީގެ އާ ވެބްސައިޓް ލޯންޗް ކޮށްދެއްވީ އެމްޑީޕީގެ ރައީސް އަދި ކުރީގެ ރައީސުލް ޖުމްހޫރިއްޔާ މުހައްމަދު ނަޝީދެވެ.

އެމްޑީޕީގެ އަހަރީ ދުވަސް ފާހަގަ ކުރުމަށް ބުރާސްފަތި ދުވަހުގެރޭ ބޭއްވި ހާއްސަ ސްޓޭޖް ޝޯގެ ތެރޭގައި މި ވެބްސައިޓް އިފްތިތާހު ކޮށްދެވީ މި ވަގުތު ސްރީ ލަންކާގައި ހުންނެވި ކުރީގެ ރައީސް ނަޝީދު އެވެ.

މި ވެބްސައިޓާ ގުޅޭ ގޮތުން ރައީސް ނަޝީދު ވިދާޅުވީ ޕާޓީގެ އާ ވެބްސައިޓަކީ ދިވެހި ރައްޔިތުންނަށާއި ބައިނަލްއަގުވާމީ މުޖުތަމައު އަށް ޕާޓީއާ ގުޅޭ ހަބަރާއި މައުލޫމާތުގެ ފޯރުކޮށް ދިނުމަށް ހުޅުވާލެވިގެންދާ އާ ސަފްހާއެއް ކަމަށެވެ.

އެއީ 300 އަށްވުރެ ގިނަ މެމްބަރުން އިންތިހާބުވެފައިވާ ޕާޓީއެއްގެ ވެބްސައިޓް ކަމަށް ވިދާޅުވި އެވެ.

"އަޅުގަނޑުމެން ހުޅުވާ މިލަނީ އަދި އާންމު މި ކޮށްދެނީ ދިވެހި ރައްޔިތުންގެ ޑިމޮކްރަޓިކް ޕާޓީގެ އޮނިގަނޑުވެސްމެ، ދާއިރާތައް، ދާއިރާގެ ރައީސުން، ގޮފިތައް ގޮފިތަކުގެ ރައީސުން، ދާއިރާ ކޮމެޓީތައް. އަޅުގަނޑުމެންގެ ޕާޓީ ރުކުރުވާލެވިފައިވާ ހުރިހާ ސިފައެއް. މިރޭ އަޅުގަނޑުމެން މި ހުށަހަޅާދެނީ މުޅިން އާ ޕޭޖެއް،" ރައީސް ނަޝީދު ވިދާޅުވި އެވެ.

އާ ވެބްސައިޓްގައި ޕާޓީއާ ގުޅޭ ހަބަރުތަކުގެ އިތުރުން ޕާޓީން ނެރޭ ނޫސްބަޔާންތައް ފެންނަން ހުރެ އެވެ. އަދި ޕާޓީގެ އަސާސީ ގަވައިދާއި ގޮފިތަކާއި ކޮމެޓިތަކުގެ ތަފްސީލް ބަލާލެވެން ހުރެ އެވެ.

ރާއްޖޭގެ މުހިންމު ދާއިރާތަކާ ގުޅޭ ގޮތުން ޕާޓީގެ ސިޔާސަތުތައް ވެސް ވަނީ ވެބްސައިޓްގައި އާންމުކޮށް ފެންނާނެ ހެން ވަނީ އާންމުކޮށްފަ އެވެ.