ސައުދި އަރަބިއްޔާއިން ފާއިތުވެދިޔަ 24 ގަޑިއިރު ތެރޭގައި ކޮވިޑް-19 އަށް ޕޮޒިޓިވްވި މީހުންގެ އަދަދު އިތުރު ވެއްޖެ ކަމަށް އެގައުމުގެ ސިއްހަތާ ބެހޭ ވުޒާރާއިން ބުނެފިއެވެ.

ސައުދީގެ ސިއްހަތާ ބެހޭ ވުޒާރާއިން ބުނީ ފާއިތުވެދިޔަ 24 ގަޑިއިރު އެގައުމުން 561 މީހަކު ކޮވިޑަށް ޕޮޒިޓވްވެފައިވާ ކަމަށެވެ. އަދި ފާއިތުވެދިޔަ 24 ގަޑިއިރު ތެރޭގައި 27 މީހުން ވަނީ މި ބަލީގައި މަރުވެފައި ކަމަށް ވެސް ސައުދީގެ ސިއްހަތާއި ބެހޭ ވުޒާރާއިން ބުނެއެވެ. އަދި 1،102 މީހުން ވަނީ ފާއިތުވެދިޔަ 24 ގަޑިއިރު ތެރޭގައި ބަލިން ރަނގަޅުވެފައެވެ.

ސައުދީގެ ސިއްހަތާއި ބެހޭ ވުޒާރާއިން ބުނީ ސައުދީ އިން މި ބަލި އެންމެ ގިނައިން ފެނިފައިވަނީ މައްކާއިން ކަމަށާއި، އެގޮތުން މައްކާއިން 75 މީހަކު ވަނީ މި ބައްޔަށް ޕޮޒިޓިވްވެފައި ކަމަށެވެ. އަދި ޖިއްދާއިން 51 މީހަކު ވަނީ ޕޮޒިޓިވްވެފައި ކަމަށް ވެސް ސައުދީގެ ސިއްހަތާއި ބެހޭ ވުޒާރާއިން ބުނެއެވެ.

ސައުދީ އަރަބިއްޔާ އަކީ މުޅި ދުނިޔެއިން ކޮވިޑަށް 17 ވަނަ އަށް އެންމެ ގިނަ މީހުން ޕޮޒިޓިވްވި ގައުމެވެ. އެގައުމުން މިހާތަނަށް 331،359 މީހުން ކޮވިޑަށް ޕޮޒިޓިވްވެފައިވާއިރު، އެގައުމުން މިހާތަނަށް 4،569 މީހުން ވަނީ މި ބަލީގައި މަރުވެފައެވެ.