ޗައިނާއިން ރާއްޖެއަށް ދީފައިވާ ލޯނުތަކުގެ ސަބަބުން ރާއްޖެ "ދަރަނި ދަންތުރަ" އަކަށް ވައްޓާލާ ވާހަކައަކީ ޙިޔާލީ ވާހަކައެއް ކަމަށް ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ޒަންގ ލީ ޖޮންގ ވިދާޅުވެއްޖެއެވެ.
ޓްވިޓަރ މެދުވެރިކޮށް ހިއްސާ ކުރެއްވި މެސެޖެއްގައި ސަފީރު ވިދާޅުވީ، ރާއްޖެއިން ޗައިނާގެ ލޯނުތައް ނުދެއްކިއްޖެ ޙާލަތެއްގައި ރާއްޖޭގެ ރަށްތަކާއި ބިންތައް ޗައިނާއަށް ނަގާ ވާހަކައަކީ އެއްވެސް ޙަޤީޤަތެއް އެކުލެވިގެން ނުވާ ވާހަކަތަކެއް ކަމަށެވެ. އެގޮތުން ރާއްޖެއާއި ޗައިނާއާ ދެމެދު ވެވޭ އެއްބަސްވުންތަކަކީ ދެފަރާތަށް ވެސް ފައިދާ ކުރާނެ ގޮތަށް އެކުލަވާލެވިފައިވާ އެއްބަސްވުންތަކެއް ކަމަށް ސަފީރު ވިދާޅުވިއެވެ.
އޭގެ އިތުރުން، ރާއްޖެއާއި ޗައިނާއާ ދެމެދުގައި އޮންނަ އެކުވެރި ގުޅުމެއްކަން ފާހަގަ ކުރައްވައި ސަފީރު ވިދާޅުވީ، ދެ ޤައުމުގެ ދެމެދުގައި ދިމާވާ ކަންކަމުގައި ގޮތް ނިންމާނީ ދެފަރާތުގެ މަޝްވަރާއާ އެކު ކަމަށެވެ.
ސަފީރު އިތުރަށް ވިދާޅުވީ، ދަރަނި ނުދެއްކިގެން ޗައިނާއިން އެއްވެސް ޤައުމެއް އުނދަގުލުގެ ތެރެއަށް ވައްޓާލާފައި ނުވާނެ ކަމަށާއި، މުސްތަޤުބަލުގައި ވެސް ދިމާވާ މައްސަލަތައް ޙައްލުކުރާނީ އެކުވެރިކަމާއެކު ޤައުމުތަކާ މަޝްވަރާ ކުރެވިގެން އަދި ބައިނަލްއަޤުވާމީ "ބެސްޓް ޕްރެކްޓިސް" އަށް ވެސް ބަލައިގެން ކަމަށެވެ. އަދި ދަރަނީގެ ދަންތުރައިގެ ވާހަކައަކީ ޙިޔާލީ ވާހަކައެއް ކަމަށްވެސް ސަފީރު ވިދާޅުވިއެވެ.
ސަފީރު ވަނީ މީގެ ކުރިންވެސް އެކަމަށް އަލިއަޅުވާލައްވާ ވާހަކަ ދައްކަވާފައެވެ. އެގޮތުން ދެ ޤައުމުގެ ދެމެދުގައި ކުރެވުނު މަޝްވަރާތަކަށްފަހު ރާއްޖެއަށް ކުރިމަތިވެފައިވާ ދަތިތައް ޗައިނާ ސަރުކާރަށްވެސް ޤަބޫލުކުރެވޭ ކަމަށާއި، ކޮމާރޝަލް ލޯނުތައް ދެއްކުން ފަސްކުރުމާ ގުޅޭގޮތުން މަޝްވަރާ ކުރެވެމުންދާކަން ވަނީ ފާހަގަ ކުރައްވާފައެވެ.
