ކޮވިޑް ޖެހުނު 8 މީހަކު އައިސީޔޫގައި، 2 މީހުން ވެންޓިލޭޓަރުގައި
22 ސެޕްޓެމްބަރު 2020 | އަންގާރަ 04:12ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި 5 މީހަކަށް އައިސީޔޫގައި ފަރުވާ ދެމުންދޭ
ދަރުމަވަންތަ ހޮސްޕިޓަލް: ބައެއް ސީރިއަސް ކޭސްތަކަށް ފަރުވާދެނީ މި ހޮސްޕިޓަލުގެ 11 ވަނަ ފަންގިފިލާގައި
ރާއްޖެއިން ކޮވިޑް-19 އަށް ޕޮޒިޓިވްވެފައިވާ މީހުންގެ ތެރެއިން އަށް މީހަކަށް އައިސީޔުގައި ފަރުވާ ދެމުންދާ ކަމަށާއި މީގެ ތެރެއިން ދެ މީހަކަށް ފަރުވާދެމުންދަނީ ވެންޓިލޭޓަރަށް ލައިގެން ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ގެ ތަރުޖަމާން ޑރ. ނަޒްލާ ރަފީގު ވިދާޅުވެއްޖެއެވެ.
ހޯމަ ދުވަހުގެ ރޭ އެ ސެންޓަރުން ބޭއްވި ނޫސްވެރިންގެ ބައްދަލުވުމުގައި ވާހަކަދައްވަމުން ޑރ. ނަޒްލާ ވިދާޅުވީ މި ވަގުތު ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި ފަސް މީހަކަށް އައިސީޔޫގައި ފަރުވާ ދެމުންދާ ކަމަށާއި މީގެތެރެއިން އެކަކަށް ފަރުވާދެމުން އަންނަނީ ވެންޓިލޭޓަރަށް ލައިގެން ކަމަށެވެ.
އޭގެ އިތުރުން، ހުޅުމާލެ ކޮވިޑް ފެސިލިޓީގައި ވޯޑްގައި 85 މީހަކަށް ފަރުވާދެމުންދާއިރު އައިސީޔުގައި 3 މީހަކު އަދި އެކަކު އޮތީ ވެންޓިލޭޓަރުގައި ކަމަށް ޑރ. ނަޒްލާ ވިދާޅުވިއެވެ. އަދި ރަށްރަށުގައި ހުރި ކޮވިޑް ފެސިލިޓީތަކުގެ ތެރެއިން ގއ. ކޮވިޑް ފެސިލިޓީގައި ތިން މީހަކަށް ފަރުވާ ދެމުންދާ ކަމަށް ވިދާޅުވިއެވެ.
މި ވަގުތު ރާއްޖޭގެ 22 ރަށެއްގައި 51 އެކްޓިވް ކޭސް އުޅޭ އިރު، މިހާރު މުޅި ރާއްޖެއިން އެކްޓިވް ކޭސްގެ ގޮތުގައި ގުނަމުންދަނީ 1340 މީހުންނެވެ. އޭގެ ތެރެއިން މިވަގުތު ހޮސްޕިޓަލްތަކުގައި އެޑްމިޓްކޮށްގެން ފަރުވާ ދެމުންދަނީ 96 މީހުންނަށެވެ. އަދި މި ވަގުތު ވެސް އައިސޮލޭޝަން ފެސިލިޓީތަކުގައި 692 މީހަކު އެބަތިބި ކަމަށް އެޗްޕީއޭއިން ބުނެއެވެ.
