ހުރިހާ ސާމްޕަލެއް ނެގެޓިވް ވުމާއެކު މަޑަވެލި މޮނިޓަރިންގ ހާލަތުން ނަގައިފި
މަޑަވެލި މޮނިޓަރިންގ އަށް ލާފައިވަނީ އެރަށާ ކޯޒްވޭއަކުން ގުޅިފައިވާ ހޯނޑެއްދޫ އިން ކޮވިޑް-19 އަށް މީހުން ޕޮޒިޓިވްވުމުން
މަޑަވެލި ހޯނޑެއްދޫ ކޯޒްވޭ
ގދ. މަޑަވެލި މޮނިޓަރިންގ ގެ ހާލަތުން ނަގާފައިވާ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) ން ބުނެފިއެވެ.
އެޗްއީއޯސީން ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާން ޑރ. ނަޒްލާ ރަފީގު ވިދާޅުވީ އެރަށުން އެންމެ ފަހުން ނެގި 51 ސާމްޕަލްގެ ނަތީޖާ ނެގެޓިވްވެފައިވާ ކަމަށެވެ. އަދި ދެ ފަހަރެއްގެ މަތިން އެރަށުން ރޭންޑަމް ސާމްޕަލް ނެގިފައިވާ ކަމަށް ޑރ. ނަޒްލާ ވިދާޅުވިއެވެ. މަޑަވެލި މޮނިޓަރިންގ ހާލަތަށް ގެނައީ އެ ރަށާ ކޯޒްވޭއަކުން ގުޅިފައިވާ ހޯނޑެއްދޫއިން ކޮވިޑް-19 އަށް މީހުން ޕޮޒިޓިވްވުމާއި ގުޅިގެންނެވެ.
ޑރ. ނަޒްލާ ވިދާޅުވީ ނޭންގި އެއްވެސްވަރަކަށް އިންފެކްޝަނެއް ފެތުރިފައި ހުރިތޯ ބެލުމަށް އަނެއްކާވެސް އާދިއްތަ މާލެ އިތުރު ސާމްޕަލްތަކެއް ގެނެވުނު ކަމަށެވެ. އެގޮތުން ފަހުން ނެގުނީ 51 ސާމްޕަލް ކަމަށް ޑރ. ނަޒްލާ ވިދާޅުވިއެވެ.
މިހާރު މޮނިޓަރިންގ ހާލަތުގައި އޮތީ ހޯނޑެއްދޫ އެކަންޏެވެ. ހޯނޑެއްދޫ މޮނިޓަރިންގ ގެ ހާލަތަށް ގެނައީ މި ސެޕްޓެމްބަރ މަހުގެ 3 ވަނަ ދުވަހުއެވެ. ގދ. ހޯނޑެއްދޫ އިން ކޮވިޑް-19 އަށް ޕޮޒިޓިވްވި، 44 މީހުންގެ ތެރެއިން 25 ރަނގަޅުވެ، މިހާރު ފަރުވާ ދެމުންދަނީ 19 މީހަކަށް ކަމަށް އެޗްޕީއޭ އިން ވަނީ ބުނެފައެވެ. ޑރ. ނަޒްލާ ވިދާޅުވީ ހޯނޑެއްދޫގައި އަދިވެސް ބަލިއޮތްތޯ ބަލަމުން ގެންދާނެ ކަމަށެވެ. އެގޮތުން ރޭންޑަމް ސާމްޕަލިންގ ގެ ދަށުން ސާމްޕަލް ނަގަމުންދާނެ ކަމަށް ޑރ. ނަޒްލާ ވިދާޅުވިއެވެ.
