ވިލާ އެއާރއިން މަޑަވެލި ދާއިރާގެ މެމްބަރު މުއާޒު މުހައްމަދު ރަޝީދަށް ހޫނު ރައްދެއްދީފި
30 އޮކްޓޯބަރު 2017 | ހޯމަ 14:05ކާޑެއްދޫ އެއަރޕޯރޓުގެ އެއްބަސްވުން އުވާލުމުގެ ނަތީޖާއަކަށްވީ، އެއަރޕޯރޓް ތަރައްގީ ކުރުމަށް ކުންފުނިން ކުރަމުން އައި މަސައްކަތްތައް ހުއްޓުން
ކާޑެއްދޫ އެއާޕޯޓް - އެ އެއާރޕޯޓް ކުރިން ހިންގާފައިވަނީ ވިލާ އެއާރއިން
ވިލާ އެއާރއިން ހިންގި ކާޑެއްދޫ އެއާޕޯޓާއި ގުޅޭގޮތުން މަޑަވެލި ދާއިރާގެ މެމްބަރު މުއާޒު މުހައްމަދު ރަޝީދު ދެއްކެވި ވާހަކަތަކަށް އެ ކުންފުނިން ވަރުގަދަ ރައްދެއްދީފި އެވެ.
ސަރުކާރުގެ ހަބަރުތައް ގެނެސްދޭ ޗެނަލް 13 ގެ ޕްރޮގްރާމެއްގައި މަޑަވެލި ދާއިރާގެ މެމްބަރު މުއާޒު މުހައްމަދު ރަޝީދު ދެއްކެވި ވާހަކަތަކަށް ރައްދުދީ ވިލާ އެއާރއިން އާންމުކުރި ބަޔާނެއްގައި ބުނީ، ގދ. ކާޑެއްދޫ އެއަރޕޯރޓް ހިންގުމާ ކުންފުނިން 1 ޖެނުއަރީ 2014 ގައި ހަވާލުވުމަށްފަހު، 6 މާރޗް 2017 ގައި ސަރުކާރުން އެއްބަސްވުމާ ޚިލާފަށް އެއަރޕޯޓް އަތުލުމާ ހަމައަށް، އެއަރޕޯރޓް މަރާމާތުކޮށް ހިންގާ ބެލެހެއްޓުމަށް ކުންފުނިން 112 (ސަތޭކަ ބާރަ) މިލިޔަން އަށް ވުރެ ގިނަ ދިވެހި ރުފިޔާ ޚަރަދު ކޮށްފައިވާ ކަމަށެވެ. އަދި ކުންފުނިން އެއަރޕޯރޓް ހިންގި ދުވަސްވަރު އެއަރޕޯރޓްގައި އެއްވެސް އެކްސިޑެންޓެއް ނުވަތަ އިންސިޑެންޓެއް ހިނގާފައި ނުވާނެކަމަށް ވެސް ބަޔާނުގައި ބުނެފައިވެއެވެ.
ވިލާ އެއާރއިން ބުނީ، 6 މާރޗް 2017 ގައި ސަރުކާރުން އެއަރޕޯރޓާ ހަވާލުވުމަށް ފަހު މިވޭތުވެދިޔަ ހަތްމަހެއްހާ ދުވަހު އެއްވެސް މަރާމާތު ކުރުމެއް ނެތި އެއަރޕޯރޓް ހިންގިފައިވަނީ އެ ކުންފުނިން އެއަރޕޯރޓް މަރާމާތުކޮށް، ބަލަހައްޓާ، މޯލްޑިވްސް ސިވިލް އޭވިއޭޝަން އޮތޯރިޓީގެ ގަވާއިދުތަކާ އެއްގޮތަށް ހިންގާފައިވާތީ ކަމަށެވެ.
ވިލާ އެއާރ އިން ބުނިގޮތުގައި މީގެ 24 އަހަރު ކުރީން 1993 ވަނަ އަހަރުގެ ތެރޭގައި އެއަރޕޯރޓް ހުޅުވުމަށް ފަހު ރަންވޭގެ ސަރފޭސް މަރާމާތު ކުރެވިފައިވަނީ 2002 ވަނަ އަހަރުގެ ތެރޭގައެވެ. 2004 ވަނަ އަހަރުގެ ޑިސެމްބަރ މަހު ދިމާވި ސުނާމީ ކާރިސާގެ ސަބަބުން ރަންވޭ އަށް ގެއްލުންތަކެއް ވެފައިވިޔަސް، އޭގެ 10 އަހަރު ފަހުން 2014 ވަނަ އަހަރު ޖެނުއަރީ މަހު ކުންފުނިން އެއަރޕޯރޓާއި ހަވާލުވެ، ރަންވޭގެ މަރާމާތު ކުރަން ފެށުމާ ހަމަޔަށް ރަންވޭގެ މަރާމާތެއް ކުރެވިފައި ނުވާކަމަށް ވިލާ އެއާރއިން ބުންޏެވެ. އަދި 6 މާރޗް 2017 ގައި ޤާނޫނާ ޚިލާފަށް މި ކުންފުނީގެ ކިބައިން އެއަރޕޯރޓް ވަކިކޮށް ރީޖަނަލް އެއަރޕޯރޓްސްއިން ހަވާލުވިއިރު ވެސް ރަންވޭ މަރާމާތު ކުރުމުގެ މަސައްކަތް ކުންފުނިން ދިޔައީ ކުރަމުންކަމަށްވެސް އެ ބަޔާނުގައި ބުނެފައިވެއެވެ.
"ސަރުކާރުން އެއްބަސްވުމާ ޚިލާފަށް އެއަރޕޯރޓް އަނބުރާ ހަވާލުކުރަން މަޖްބޫރު ކުރުމުން، މިކުންފުނިން އެއަރޕޯރޓް ހަވާލުކޮށްފައިވަނީ، އެއަރޕޯރޓް ހިންގުމަށް އެއްވެސް ބުރުލެއް އަރައިފިނަމަ މިއެއަރޕޯރޓް ބޭނުންކުރާ ފަރާތްތަކަށް، ޚާއްސަކޮށް ހުވަދުއަތޮޅު ދެކުނުބުރީގެ ރައްޔިތުންނަށް ދިމާވެދާނެ ދަތިތަކަށްޓަކައި، އެއަރޕޯރޓުގައި ހުރި މިކުންފުނީގެ ގިނަ މުދާތަކާ އެކުގައެވެ. އެއަރޕޯރޓުގައި ބެހެއްޓިފައިވާ މިކުންފުނީގެ މުދަލުގެ އަގު 13 (ތޭރަ) މިލިޔަން ދިވެހިރުފިޔާ އަށްވުރެ ބޮޑެވެ. އަދި އެއަރޕޯރޓް ހަވާލުކުރެވުނު ފަހުން ހަތް މަހަށް ވުރެ ގިނަދުވަސް ވީއިރުވެސް މިތަކެތީގެ އަގު ނުވަތަ ތަކެތީގެ ބަދަލުވެސް މިކުންފުންޏަށް ލިބިފައެއް ނުވެއެވެ. އެހެން ނަމަވެސް ރީޖަނަލް އެއަޕޯރޓްސް އިން މިއަދުވެސް މިއެއަރޕޯރޓް ހިންގަމުން ދަނީ މިތަކެތީގެ ބޭނުންކޮށްގެންނެވެ." ވިލާ އެއާރއިން އާންމުކުރި ބަޔާނުގައި ބުނެފައިވެއެވެ.
ވިލާ އެއާރިއން ބުނީ، ކާޑެއްދޫ އެއަރޕޯރޓުގެ އެއްބަސްވުން އުވާލުމުގެ ނަތީޖާއަކަށްވީ، އެއަރޕޯރޓް ތަރައްގީ ކުރުމަށް ކުންފުނިން ކުރަމުން އައި މަސައްކަތްތައް ހުއްޓި، ފާއިތުވި ހަތްމަސްދުވަހުގެ ތެރޭގައި އެއަރޕޯރޓުގެ ތަރައްޤީއަށް އެއްވެސް ކަމެއް ނުކުރެވުމާއި އެއަރޕޯރޓް ހިންގުމަށް މިއަހަރު 40 މިލިޔަން ރުފިޔާ ދައުލަތުގެ ބަޖެޓުން ޚަރަދުކުރަންޖެހުން ކަމަށެވެ. މީގެ އިތުރުން 50 އަހަރަށް އެއަރޕޯރޓް ތަރައްޤީކޮށް ހިންގުމަށް ކުރެވިފައިވާ އެއްބަސްވުން އުވާލާފައިވަނީ، އެއްބަސްވުމުގައި ކަނޑައެޅި ބަޔާންކޮށްފައިވާ އިޖްރާއަތާ ޚިލާފަށް ކަމަށްވާތީ، ޝަރީޢަތަށް ހުށައެޅިފައިވާ އެ މައްސަލާގައި ކާޑެއްދޫ އެއަރޕޯރޓާ ގުޅިގެން ކުންފުނިން ކޮށްފައިވާ ޚަރަދާއި، ރިސޯރޓެއް ތަރައްޤީކޮށް ހިންގުމަށް ކުންފުންޏާއެކު އެއްބަސްވެފައިވާ ބ. މެންދޫ ޙަވާލުކޮށްފައި ނުވާތީ، އެކަމުގެ ސަބަބުން މިކުންފުންޏަށް ލިބިފައިވާ ގެއްލުމުގެ ޢަދުލުވެރި ބަދަލު ސަރުކާރުން ދޭންޖެހޭނެކަމަށް ކުންފުނިން ދެކޭކަމަށްވެސް ބަޔާނުގައި ބުނެފައިވެއެވެ.
ވިލާ އެއާރއިން ބުނީ، ކާޑެއްދޫ އެއަރޕޯރޓް ކުންފުނިން ހިންގި ދުވަސްވަރު، ސެކިއުރިޓީ މުވައްޒަފުންނާއި އެއަރޕޯރޓްގެ މުވައްޒަފުން މެދުވެރިކޮށް ދިވެހިރާއްޖޭގެ ގައުމީ ސަލާމަތަށް ނުރައްކާވާ ވަރުގެ ކަންތައްތަކެއް ކުންފުނިން އެއަރޕޯރޓް ތެރޭގައި ކުރަމުންދިޔަކަމަށް މަޑަވެލީ ދާއިރާގެ މެމްބަރު މުޢާޛު މުހައްމަދު ރަޝީދު ވިދާޅުވިއިރު، ގައުމީ ސަލާމަތަށް ނުރައްކާވާވަރުގެ ޤާނޫނާ ޚިލާފު ޢަމަލުތަކެއް ބަޔަކު މީހުން ހިންގާކަން ޢިއްޒަތްތެރި މެމްބަރަށް އެގިވަޑައިގަތުމުން ކަމާބެހޭ ފަރާތްތަކަށް އެކަން ހުށަނައަޅުއްވާ ހަތްމަހަށްވުރެ ގިނަދުވަސް ވަންދެން ހުންނެވުމަށްފަހު، މީޑިޔާގައި އެކަން ހާމަކުރައްވާފައިވާތީ މި މައްސަލަ ބައްލަވައި ދެއްވުން އެދި ދައުލަތުގެ ކަމާއިބެހޭ ފަރާތްތަކަށް ގޮވާލާކަމަށެވެ. އަދި ރާއްޖޭގެ އެއަރޕޯރޓްތަކުގެ ސެކިއުރިޓީ ބެލެހެއްޓުމަކީ މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީގެ ދަށުން ހިންގާ އޭވިއޭޝަން ސެކިއުރިޓީ ކޮމާންޑުން ބަލަހައްޓަވާ ކަމެއްކަމާއި، ސެކިއުރިޓީގައި މަސައްކަތްކުރާ ހުރިހާ މުވައްޒަފުންނަކީވެސް އޭވިއޭޝަން ސެކިއުރިޓީ ކޮމާންޑްގެ މުވައްޒަފުންކަން އެނގިވަޑައިގެން ހުންނަވައި، ރައްޔިތުންގެ މަޖިލީހުގެ މެންބަރެއްގެ ގޮތުގައި ހުންނަވާ އޭވިއޭޝަން ސެކިއުރިޓީ ކޮމާންޑުގެ މުވައްޒަފުންނަށް ނިސްބަތްވާގޮތަށް މިފަދަ ހަޤީޤަތާ ޚިލާފު ވާހަކަތަކެއް ދައްކަވާފައިވާތީ، އެކަން ވަރަށް ބޮޑަށް ކުށްވެރި ކުރާކަމަށް ބަޔާނުގައި ބުނެފައިވެއެވެ.
"މިކުންފުނިން އެންމެހާ ފަރާތްތަކަށް ދޭން ބޭނުންވާ ޔަގީންކަމަކީ، ކާޑެއްދޫ އެއަރޕޯރޓް މިކުންފުނިން ހިންގި ދުވަސްވަރު މިފަދަ އެއްވެސް ކަމެއް ހިނގާފައިވާ ކަމުގެ މަޢުލޫމާތެއް މިކުންފުންޏަށް ލިބިފައި ނުވާކަމާއި، މިއީ އޭވިއޭޝަން ސެކިއުރިޓީ ކޮމާންޑާއި، އެކޮމާންޑްގެ މުވައްޒަފުންނާއި މިކުންފުނިގެ އަގު ވައްޓާލުމުގެ ބޭނުމުގައި މަޑަވެލީ ދާއިރާގެ މެންބަރު މުޢާޛު މުޙައްމަދު ރަޝީދު ކުރައްވާފައިވާ ދަށުދަރަޖައިގެ ޢަމަލެއް ކަމެވެ. އަދި މިއީ ރައްޔިތުންގެ މަޖިލީހުގެ ޢިއްޒަތްތެރި މެންބަރެއްގެ ގޮތުގައި ހުންނަވާ، އެ މެންބަރު ކުރައްވާފައިވާ ފަސާދަ އުފެއްދުން ނޫން އެހެން ކަމެއްގެ ގޮތުގައި ދިވެހި އެއްވެސް ރައްޔިތަކު ބަލައިނުގަންނާނެ ކަމެއްކަމަށް މިކުންފުނިން ދެކެމެވެ." ބަޔާނުގައި ބުނެފައިވެއެވެ.
