އެމްޑީޕީގެ އިތުރު ތިން ކެނޑިޑޭޓަކު ނަން އަނބުރާ ނަގައިފި
21 ސެޕްޓެމްބަރު 2020 | ހޯމަ 11:50އަމިއްލަ އެއް ކެނޑިޑޭޓަކު ހިމެނޭ
ވޯޓުލާ މަރުކަޒެއްގައި އޮފިޝަލުންތަކެއް ވޯޓު ގުނަނީ
ލޯކަލް ކައުންސިލް އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އިންތިހާބަށް އެމްޑީޕީން ވާދަކުރާ އިތުރު ތިން ކެނޑިޑޭޓަކު ހިމެނޭގޮތަށް ހަތަރު ފަރާތަކުން ނަން އަނބުރާ ގެންގޮސްފިއެވެ.
ކައުންސިލް މެމްބަރުކަމަށް ކުރިމަތިލާފައިވާ ކެނޑިޑޭޓުންގެ ތެރެއިން ނަން އަނބުރާ ގެންދިޔަ އެމްޑީޕީގެ ދެ ކެނޑިޑޭޓުންނަކީ، ޅ. ނައިފަރު ކައުންސިލްގެ މެންބަރުކަމަށް ކުރިމަތިލާފައިވާ އަބްދުލްވާހިދު ހުސައިން، ކެނޑިޑޭޓް ނަންބަރު 15ގެ އިތުރުން ނ. މަނަދޫ ކައުންސިލަށް ކުރިމަތިލާފައިވާ ކެނޑިޑޭޓް، ހަސަން ނާއިފް، ކެނޑިޑޭޓް ނަންބަރު 10 އެކެވެ.
އަންހެންގެ ތަރައްގީ އަށް މަސައްކަތް ކުރާ ކޮމިޓީގެ އިންތިހާބުގައި ވާދަކުރާ ކެނޑިޑޭޓުންގެ ތެރެއިން ހދ. ކުރިނބި ކައުންސިލަށް އެމްޑީޕީން ވާދަކުރައްވާ ފާތިމަތު އިނާޔާއެވެ. ދެން ނަން އަނބުރާ ގެންގޮސްފައިވަނީ ބ. ފުޅަދޫ އަންހެނުންގެ ތަރައްގީ އަށް މަސައްކަތްކުރާ ކޮމިޓީ އަށް އަމިއްލަ ގޮތުން ވާދަކުރާ ކެނޑިޑޭޓް އިހުސާނާ އަލީއެވެ.
މި ހަތަރު ކެނޑިޑޭޓުން ނަން އަނބުރާ ގެންދިޔުމާއި އެކު ނަން އަނބުރާ ގެންދިޔަ ކެނޑިޑޭޓުންގެ އަދަދުވަނީ 63 އަށް އަރާފައެވެ. އެންމެ ގިނައިން ނަން އަނބުރާ ގެންގޮސްފައިވަނީ އަމިއްލަ ގޮތުން ވާދަކުރާ ފަރާތްތަކެވެ.
މި އަަހަރުގެ އޭޕްރީލް މަހު ބާއްވަން ނިންމާފައި އޮތް ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީ އަށް މަސައްކުރާ ކޮމިޓީގެ އިންތިހާބު ފަސްކޮށްފައިވަނީ ކޮވިޑް-19އާ ގުޅިގެންނެވެ. އެއާއެކު ކައުންސިލްތަކުގެ އިންތިހާބެއް ބޭއްވެންދެން މިހާރު އޮތް ކައުންސިލްތަކުގެ ދައުރު ދެމިގެންދާ ގޮތަށް ގާނޫނު އަސާސީ އަށް އިސްލާހު ގެނެސް އެ އިސްލާހު ވަނީ ތަސްދީގު ކޮށްފައެވެ.
