ޔޫއޭއީ މީހުންގެ މެދުގައި ރާއްޖޭގެ މަގުބޫލުކަން އިތުރުވެ، ފްލައި ދުބާއީގެ ދަތުރުތައް ފަށަނީ

ޔުއޭއީގެ ފަތުރުވެރިންގެ މެދުގައި ރާއްޖޭގެ މަގުބޫލްކަން އިތުރުވެ، ފްލައި ދުބާއީގެ ދަތުރުތައް އަންނަ މަހު ރާއްޖެއަށް ފަށާ ގޮތަށް ނިންމައިފިއެވެ.

ޔޫއޭއީގެ ނޫހަކުން ރިޕޯޓްކޮށްފައިވާ ގޮތުން ފްލައި ދުބާއީގެ ފުރަތަމަ ފްލައިޓް ދުބާއީ އިން ރާއްޖެއަށް އަންނާނީ އޮކްޓޫބަރު މަހު 27 ވަނަ ދުވަހުއެވެ. ހަފްތާއަކު ހަތަރު ފަހަރު މާލެއާ ދުބާއީ ދޭތެރޭ ދަތުރުތައް އޮންނާނެ ކަމަށް އެ ނޫހުން ވަނީ ރިޕޯޓް ކޮށްފައެވެެ.

އެއީ އަންގާރަ، ބުރާސްފަތި ދުވަހުގެ އިތުރުން ހުކުރު ދުވަހުއެވެ.

ފްލައި ދުބާއީގެ ދަތުރުތައް ރާއްޖެއަށް ފަށަން ތައްޔާރުވެފައިވާއިރު ކޮވިޑް-19ގެ ބިރާހެދި އެއާޕޯޓް ބަންދުކޮށްފައި އޮތް އޮތުން ހުޅުވާލުމާއެކު ބައިނަލްއަގްވަމީ އެއާލައިންތަކުން އަންނަނީ ރާއްޖެ އަށް ދަތުރުކުރަމުންނެވެ. ކޮވިޑާހެދި ރާއްޖޭގެ އެއާޕޯޓް ބަންދުކޮށްފައި އޮތް އޮތުން ހުޅުވާލުމާއިއެކު ޔޫއޭއީން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ވަނީ އިތުރުވާން ފަށާފައެވެ. އިމިގްރޭޝަންގެ ތަފާސް ހިސާބުތައް ދައްކާގޮތުން މި މަހުގެ އެކަކުން 16 އަށް ވެސް ރާއްޖެ އަށް އެންމެ ގިނަ ފަތުރުވެރިން ޒިޔާރަތް ކޮށްފައިވަނީ ޔޫއޭއީއިންނެވެ.

މި މަހުގެ 10 ވަނަ ދުވަހުން ފެށިގެން ފަތުރުވެރިންނަށް ރާއްޖެ އެތެރެވެވެނީ ކޮވިޑަށް ޓެސްޓު ކުރަން ހަދާ ޕީސީއާރު ނެގެޓިވް ސެޓްފިކެޓު ހުށައެޅުމުންނެވެ. ރާއްޖޭގެ ބޯޑަރުތައް ހުޅުވާލި ފަހުން މިހާތަނަށް 13,516 ފަތުރުވެރިޔަކު ވަނީ ރާއްޖެ އަށް ޒިޔާރަތްކޮށްފައެވެ.

މި އަދަދަކީ މިދިޔަ މަހާއި އަޅާބަލާއިރު 61 އިންސައްތަ އިތުުރު އަދަދެކެވެ.