ރަޝިޔާގެ އިދިކޮޅު ލީޑަރުގެ ހާލު ރަނގަޅު، ހިނގާބިގާވެ އުޅެވޭ
19 ސެޕްޓެމްބަރު 2020 | ހޮނިހިރު 16:33އެންމެ ފުރަތަމަ ފަރުވާދޭން ފެށީ މޮސްކޯގައި
ނަވަލްނީ އިންސްޓަގްރާމް ގައި ހިއްސާކުރެއްވި ފޮޓޯއެއް
ވިހަ ދީގެން ކޯމާއަށް ގޮސް ސިއްހީ ހާލުކޮޅު ގޯސްވި ރަޝިޔާގެ އިދިކޮޅު ލީޑަރު އެލެކްސީ ނަވަލްނީގެ އަށް މިހާރު ހިންގަވާ އުޅުއްވެވޭ ވަރަށް ހާލަތު ރަނގަޅު ވަމުން އަންނަ ކަން އޭނާ ހާމަކުރައްވައިފިއެވެ.
ރަޝިޔާގެ ރައީސް ލަޑްމިއާ ޕޫޓިންގެ އެންމެ ވަރުގަދަ ވާދަވެރިޔާ، 44 އަހަރުގެ ނަވަލްނީ ވަނީ ފުރަތަމަ އޭނާގެ އިންސްޓްގްރާމް އެކައުންޓުގައި ހިންގަވާ ފޮޓޯއެއް ހިއްސާ ކުރައްވާފައިވެއެވެ.
އެ ޕޯސްޓްގައި ނަވަލްނީ ވިދާޅުވީ ވިހައިގެ ސަބަބުން އަމިއްލަފުޅަށް އެއްވެސް ކަމެއް ކުރައްވަން ދަތިފުޅުވި ކަމަށެވެ. އެހެންވިޔަސް މިހާރު އެއްވެސް މީހެއްގެ އެހީތެރިކަމަކާ ނުލާ މީހުންނާ ވާހަކަ ދައްކަވައި ހިންގަވާ އުޅުއްވެވޭ ކަމަށެވެ.
"ފުރަތަމަ މީހުން ވެސް ދެނެނުގަނެވޭ، ވާހަކަ ދައްކަން ވެސް ދަތިވި، އެހެންވިޔަސް މިހާރު މީހުން ދެނެގަނެ ވާހަކަ ދެކެވޭ، މަޑުމަޑުން ކޮންމެ ވެސް ވަރަކަށް ހިނގާބިނގާވެ އުޅެވޭ، އެކަމަކު ތުރުތުރުލުމެއް އަދިވެސް އެބަހުރި،" ނަވަލްނީ ވިދާޅުވިއެވެ.
ކޮރަޕްޝަނާ ދެކޮޅަށް އަޑު އުފުއްލަވަމުން ގެންދަވާ ނަވަލްނީ ސިއްހީ ހާލުކޮޅު ގޯސްވީ އޮގަސްޓު މަހުގެ 20 ވަނަ ދުވަހު ސައިބީރިޔާ އިން މޮސްކޯ އަށް ދަތުރު ކުރަމުން ދިޔަ ފްލައިޓެއްގެ ތެރެއިން ސައިފޮދެއް ހިއްޕެވި ފަހުންނެވެ. ރަޝިޔާގެ ހޮސްޕިޓަލުގައި ދެ ދުވަސް ވަންދެން ފަރުވާ ހޯއްދެވުމަށް ފަހު އިތުރު ފަރުވާ އަށް ނަވެލްނީ ޖަރުމަންވިލާތަށް ވަޑައިގެން، މިހާރު ވެސް ފަރުވާ ހޯއްދަވަނީ އެ ގައުމުގެ ހޮސްޕިޓަލެއްގައެވެ.
އޭނާގެ ހާލުކޮޅު ހިއްސާ ކުރައްވަމުން ނަވަލްނީ ވިދާޅުވީ، ބަލިން އެންމެ ފުރަތަމަ ރަނގަޅުވަމުން އައިރު ވާހަކަ ދައްކަން ތެރަޕީ ނެންގެވި ކަމަށެވެ. ނަވަލްނީ އަށް ފޯނު ބޭނުން ކުރުން އަދިވެސް ވަނީ މަނާކޮށްފައެވެ. އިންސްޓަގްރާމް ގައި ފޮޓޯ ޕޯސްޓު ކޮށްފައިވަނީ ގާތް ރަށްޓެހިން ނުވަތަ އާއިލާގެ މެމްބަރުންނެވެ. އޭނާ ވަނީ ފަރުވާ ދިނުމުގައި ހަރަކާތްތެރިވި ޑޮކްޓަރުންނަށް ޝުކުރު އަދާކުރައްވާފައެވެ.
ނަވަލްނީގެ ސަޕޯޓަރުންގެ އިތުރުން ޔޫރަަޕްގެ ލީޑަރުން ބުނާ ގޮތުން އޭނާ އަށް ވިހަ ދީފައިވަނީ ރަޝިޔާގެ ސަރުކާރުގެ އޯޑަރަށެވެ. ރަޝިޔާ އިން ބުނާ ގޮތުން އެ މީހުން ހެދި ޓެސްޓުތަކުން ނަވަލްނީގެ ހަށިގަނޑުން ވިހައިގެ އަސަރު ފެނިފައެއް ނުވެއެވެ. ނަމަވެސް ސައިބީރިއާގެ ހޮޓަލެއްގައި ހުންނެވިއިރު ނަލަވްނީ ބޭނުން ކުރެއްވި ފެންފުޅިއަކުން ނޮވިޗޮކް ވިހަ ފެނިފައިވާ ކަމަށް އޭނާގެ ޓީމުން ވަނީ ބުނެފައެވެ.
