ހިގުއައިން އިންޓަ މަޔާމީއަށް ބަދަލުވެއްޖެ

ޔުވެންޓަސްގެ އެއްބަސްވުން ނިމުމަކަށް ގެނެސް އާޖެންޓީނާގެ ފޯވާޑް ގޮންޒާލޯ ހިގުއައިން އެމެރިކާގެ މޭޖާ ލީގުގައި ވާދަކުރަމުން އަންނަ އިންޓަ މަޔާމީއަށް ސޮއިކޮށްފިއެވެ.

އިންޓަ މަޔާމީ އަކީ ފުޓްބޯޅަ ލެޖެންޑް ޑޭވިޑް ބެކަމްގެ އޯނާޝިޕް އޮންނަ ޓީމެކެވެ.

އުމުރުން 32 އަހަރުގެ ހިގުއައިން އިންޓަ މަޔާމީއާ ގުޅުނީ ޔުވެންޓަސްގެ އައު ކޯޗު އަންދްރޭ ޕިރްލޯގެ ޕްލޭނުގައި އޭނާ ނުހިމެނޭތީ، އެ ޓީމާއެކު ހަދާފައިވާ އެއްބަސްވުން އުވާލުމަށްފަހުއެވެ. މީގެ ކުރިން ޕިރްލޯ ބުނީ ހިގުއެން އަކީ ޗެމްޕިއަނެއް ކަމަށާއި، ޔުވެންޓަސްއަށް ހިގުއެން ކޮށްދިން ކަންކަމަށް ޝުކުރުއަދާކުރާ ކަމަށެވެ. އަދި ހިގުއެން ދޫކޮށްލުމަށް ޔުވެންޓަސްއިން ނިންމީ އޭނާއާ ވާހަކަ ދެއްކުމަށްފަހު ކަމަށްވެސް ޕިރްލޯ ބުންޏެވެ.

ހިގުއައިން އިންޓަ މަޔާމީއާ ގުޅުނު އަގެއް އެ ކުލަބުން ހާމަކޮށްފައި ނުވި ނަމަވެސް، ރިޕޯޓުތައް ބުނާ ގޮތުން އޭނާއަކީ އިންޓަ މަޔާމީގެ ތާރީޚުގައި ތިންވަނައަށް އެންމެ އަގުބޮޑު ކުޅުންތެރިޔާއެވެ.

ރިވާ ޕްލޭޓުން 2004 ވަނަ އަހަރު ކެރިއަރު ފެށި ހިގުއައިން މީގެ ކުރިން ވަނީ ރެއާލް މެޑްރިޑާއި ނާޕޮލީއަށް ކުޅެފައެވެ. އަދި ޔުވެންޓަސްއަށް ކުޅުނުއިރު ހިގުއައިން ވަނީ ލޯނު އެއްބަސްވުމެއްގެ ދަށުން އޭސީ މިލާނާއި ޗެލްސީއަށްވެސް ކުޅެފައެވެ. ޔުވެންޓަސްއަށް ހިގުއައިން ކުޅެދިން 148 މެޗުގައި 66 ލަނޑު އޭނާ ކާމިޔާބުކޮށްފައިވާއިރު، ހިގުއައިން ވަނީ ޔުވެންޓަސްއާއެކު އިޓާލިއަން ލީގު ތިން ފަހަރު ކާމިޔާބުކޮށްފައެވެ.

އިންޓަ މަޔާމީއަށް ހިގުއައިން ބަދަލުވިއިރު، މިދިޔަ އޮގްސްޓަ މަހު ހިގުއައިންއާއެކު ޔުވެންޓަސްއަށް ކުޅުނު ފްރާންސްގެ މިޑްފީލްޑަރު ބްލައިސް މަޓުއިޑީވެސް ވަނީ އިންޓަ މަޔާމީއަށް ބަދަލުވެފައެވެ. އުމުރުން 33 އަހަރުގެ މަޓުއިޑީވެސް އިންޓަ މަޔާމީއާ ގުޅުނީ ޔުވެންޓަސްއާއެކު ހަދާފައި އޮތް އެއްބަސްވުން ނިމުމަކަށް ގެނައުމަށްފަހުއެވެ.