ވިޔަފާރީގައި ދިމާވާ މައްސަލަތަކަށް ކޮންސިއުމަރ އޮމްބަޑްސްމަންގެ އޮފީހުން ހައްލު ލިބިގެންދާނެ: އިކޮނޮމިކް މިނިސްޓްރީ
18 ސެޕްޓެމްބަރު 2020 | ހުކުރު 08:25ޤާނޫނު ބައްޓަންވެގެން އައިސްފައިވަނީ މިޒަމާނަށް ފެތޭގޮތަށް ކަމަށް ވިދާޅުވި
ފިހާރައެއް - ތަކެތި ގަނެ ވިއްކުމުގައި ދިމާވާ މައްސަލަތަކަށް ކޮންސިއުމަރ އޮމްބަޑްސްމަންގެ އޮފީހެއް ވަނީ އުފައްދާފައި
ތަކެތި ގަނެ ވިއްކުމުގައި ދިމާވާ މައްސަލަތަކަށް ކޮންސިއުމަރ އޮމްބަޑްސްމަންގެ އޮފީހުން ހައްލު ލިބިގެންދާނެ ކަމަށް މިނިސްޓްރީ އޮފް އިކޮނޮމިކް ޑިވެލެޕްމަންޓްގެ ނައިބް ރިޔާޒް މަންސޫރު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން ރިޔާޒް ވިދާޅުވީ މުދާ ގަންނަ ފަރާތްތަކާއި ޚިދުމްތް ލިބިގަންނަ ފަރާތްތައް ހިމާޔަތް ކުރުމުގެ ޤާނޫނު ބައްޓަންވެގެން އައިސްފައިވަނީ މިޒަމާނަށް ފެތޭގޮތަށް އައު ކަންތައްތައް ހިމަނައިގެންކަމަށެވެ. އަދި މިއީ ވަރަށް ބޮޑު ބަދަލެއް ކަމަށް އޭނާ ވިދާޅުވިއެވެ.
އެގޮތުން އެންމެ ހާއްސަކަމެއްގެ ގޮތުގައި ފާހަގަ ކުރެވެނީ މި ޤާނޫނުގެ ދަށުން އުފައްދާފައިވާ ކޮންސިއުމަރ އޮމްބަޑްސްމަންގެ އޮފީސް ކަމަށް އޭނާ ވިދާޅުވިއެވެ.
ރިޔާޒް ވިދާޅުވީ ކޮންސިއުމަރ އޮމްބަޑްސްމަންގެ އޮފީސް އުފެދިގެން އައިސް އޮމްބަޑްސްމަންގެ މަސައްކަތް ފެށުމުން ކޮންސިއުމަރުންނަށް ދިމާވާ މައްސަލަތައް ބަލައި އެމައްސަލަތައް އަވަހަށް ނިންމުމަށް އެހީތެރިކަން ލިބިގެންދާނެ ކަމަށެވެ.
އޮންލައިންކޮށް ވިޔަފާރިކުރުން ކަމުގައި ވީނަމަވެސް ފިހާރައަށް ގޮސް ވިޔަފާރިކުރުން ކަމުގައި ވީނަމަވެސް ކަސްޓަމަރެއްގެ ފަރާތުން ޝަކުވާއެއް އައިސްފިކަމުގައި ވާނަމަ ޤާނޫނުގެ ދަށުން މި މައްސަލަތައް ބަލައި ހައްލު ކުރެވޭނެކަން އޭނާ ފާހަގަ ކުރެއްވިއެވެ.
ރިޔާޒް ވިދާޅުވީ ކޮންމެ މައްސަލަ އަކީ ވެސް އެމައްސަލައިގައި ތަފާތު ހާލަތްތަކެއް ހުންނާނެ މައްސަލައެއް ކަމަށާއި ނަމަވެސް އެމައްސަލައަށް ބަލައި އޮމްބަޑްސްމަންގެ ފަރާތުން ހައްލު ލިބިގެންދާނެ ކަމަށެވެ.
އަދި ހައްލު ލިބޭނެ ގޮތްތަކާއި ވަސީލަތްތައް ޤާނޫނުގެ ތެރެއިން މިހާރު އުފެދިފައިވާ ކަމަށް އޭނާ ވިދާޅުވިއެވެ.
