2015ން ފެށިގެން ފިހާރައެއްގެ ކުލި ނުދައްކާތީ 13 މިލިއަން ރުފިޔާ ހޯދަން އެމްޕީއެލް އިން ކޯޓަށް
އެއްބަސްވުމުގައި ސޮއި ކޮށްފައިވަނީ 2015 ވަނަ އަހަރުގެ ފެބްރުއަރީ މަހުގެ 22 ވަނަ ދުވަހު
މޯލްޑިވްސް ޕޯޓްސް ލިމިޓެޑް (އެމްޕީއެލް)- މި މައްސަލައިގައި ހިމެނޭ އެއްބަސްވުމުގައި ސޮއި ކޮށްފައިވަނީ 2015 ވަނަ އަހަރު
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މީރުބަހުރު ބަނދަރުން ކުއްޔަށް ދޫކުރި ފިހާރައަކަށް ކުލި ނުދައްކާ މައްސަލައެއް ސިވިލް ކޯޓަށް ހުށައަޅައިފިއެވެ.
މި މައްސަލަ ސިވިލް ކޯޓަށް ހުށައަޅާފައިވާއިރު، މައްސަލައާ ގުޅޭ ލިއެކިއުންތައް ރާއްޖެއެމްވީއަށް ވަނީ ލިބިފައެވެ. އެގޮތުން މި މައްސަލައިގައި ކަން ހިނގާފައިވާ ގޮތަށް ބަލާއިރު، އެމްޕީއެލްއިން ފިހާރަ ކުއްޔަށް ދޫކޮށްފައިވަނީ ލ ފޮނަދޫ ބަގީޗާގޭ އިބްރާހިމް ނާއިފް ނަމަކަށް ކިޔާ މީހަކަށެވެ.
އޭނާއަކީ އޭރުގެ ފޮނަދޫ ދާއިރާގެ މެމްބަރު އަދި މިހާރު އިދިކޮޅު ޕީއެންސީގެ ރައީސް އަބްދުއްރަޙީމް އަބްދުﷲ ގެ ކެމްޕެއިން ހަރަކާތްތަކުގައި ވެސް ބައިވެރިވެ އުޅުނު މީހެކެވެ.
އެތަނުގެ އެއްބަސްވުމުގައި ސޮއި ކޮށްފައިވަނީ 2015 ވަނަ އަހަރުގެ ފެބްރުއަރީ މަހުގެ 22 ވަނަ ދުވަހުއެވެ. އެހެން ނަމަވެސް، އެ އަހަރުގެ އޯގަސްޓު މަހުން ފެށިގެން ތަނަށް ކުލި ދައްކާފައި ނުވާކަން ރާއްޖެއެމްވީއަށް ލިބިފައިވާ ލިއެކިއުންތަކުން އެނގެއެވެ. އަދި އޭރު އެކަން އެމްޕީއެލް އިން ވެސް ނާއިފަށް އަންގައި، އެގްރީމަންޓާ ޚިލާފުވެއްޖެ ނަމަ އެގްރީމަންޓު ބާތިލުވާނެ ކަމުގައި ބުނެފައިވެއެވެ.
ރާއްޖެއެމްވީއަށް އެނގިފައިވާ ގޮތުގައި އެއްބަސްވުމުގެ ކުއްޔާއި ޖޫރިމަނާ ގެ ގޮތުގައި 13،251،187 ރުފިޔާ ލިބެން ޖެހެއެވެ.
އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން އެމްޕީއެލްގެ އޮފިޝަލަކު ވިދާޅުވީ، މިއީ ކުރިއަށްދާ މައްސަލައަކަށް ވާތީ އެކަމުގެ މައުލޫމާތު ދެވެން ނެތް ކަމަށެވެ.
