މާލޭ އޭރިއާގައި ގެސްޓުހައުސްތައް ހުޅުވޭނީ ޕޮޒިޓިވް އަދަދު ފަހެއް އިންސައްތައަށް ދަށްވެގެން

މާލެ ހުޅުމާލެ އަދި ވިލިމާލެ ހިމެނޭ ގްރޭޓަރ މާލެ ސަރަހައްދުގައި ގެސްޓް ހައުސް އަދި ޓުއަރިސްޓް ފެސިލިޓީތައް ނޮވެމްބަރ މަހު ކުރީކޮޅު ހުޅުވޭވަރުވާނެ ކަމަށް ލަފާކުރެވޭ ކަމަށް ޓޫރިޒަމް މިނިސްޓަރު ޑރ.އަބްދުﷲ މައުސޫމު ވިދާޅުވެއްޖެއެވެ.

މާލެ ސަރަހައްދު ފިޔަވާ އެހެން ރަށްރަށުގެ ގެސްޓުހައުސްތައް އަންނަ އޮކްޓޯބަރ މަހުގެ 15 ގައި ހުޅުވުމަށް ވަނީ ނިންމާފައެެވެ.

Advertisement

މިނިސްޓަރ ކުރެއްވި ޓްވީޓެއްގައި ވިދާޅުވީ މާލެ ސަރަހައްދުގެ ގެސްޓުހައުސްތައް ނޮވެމްބަރު މަހު ހުޅުވޭނީ ކޮވިޑް 19 އަށް ޓެސްޓް ކުރާ މީހުންގެ ތެރެއިން ޕޮޒިޓިވްވާ މީހުންގެ ޕަސެންޓޭޖް ވިދިވިދިގެން ދެ ހަފްތާ ވަންދެން ފަހަކަށް ދަށް ކުރެވިގެން ކަމަށެވެ.

"ޔައުނީ ޓެސްޓް ކުރާ މީހުންގެ އަދަދުގެ ނިސްބަތުން ފައްސި ފަހަކަށްވުރެ ދަށްވުން. ވިދިވިދިގެން ދެ ހަފްތާ." މިނިސްޓަރ ވިދާޅުވިއެވެ.

މާލެ ސަރަހައްދުގައި ކޮވިޑް-19 ޖެހޭ މީހުންގެ އަދަދު ފާއިތުވި އޮގަސްޓް މަހަށްވުރެ ސެޕްޓެމްބަރ މަހު ވަނީ ދަށަށް ގޮސްފައެވެ. އެގޮތުން އެވްރެޖްކޮށް ދުވާލެއްގެ މައްޗަށް މިހާރު މާލެ ސަރަހައްދުން ކޮވިޑް-19 އަށް ޕޮޒިޓިވްވެގެން ރިޕޯޓްކުރާ އަދަދުވަނީ 100ން ދަށަށް ގޮސްފައެވެ.

ފާއިތުވި 24 ގަޑިއިރު މާލެ ސަރަހައްދުން ޕޮޒިޓިވްވެފައިވަނީ 92 މީހުންނެވެ. މިހާތަނަށް ރާއްޖެއިން 9427 މީހުން ވަނީ ކޮވިޑް-19 އަށް ޕޮޒިޓިވްވެފައެވެ.

ޖުލައި މަހުގެ 15 ވަނަ ދުވަހުން ފެށިގެން ރާއްޖޭގެ ބޯޑަރުތައް ހުޅުވާލާފައިވާއިރު ދެ މަސްދުވަސްތެރޭ ރާއްޖެ އައިސްފައިވަނީ 12،766 ފަތުރުވެރިންނެވެ.