ބާބެޑޮސްގެ އެންމެ އިސްވެރިޔާގެ މަގާމުން ރާނީ ދުރުކޮށް، ޖުމްހޫރިއްޔާތަކާއި ދިމާލަށް
ގައުމަށް މިނިވަންކަން ލިބުނީ 1966 ވަނަ އަހަރު
ބާބެޑޮސްގެ ބޮޑުވަޒީރު އާއި އިނގިރޭސި ރާނީ އެލިޒަބަތް
ކެރީބިއަން ސަރަހައްދުގައި އޮންނަ ބާބެޑޮސްގެ އެންމެ އިސްވެރިޔާ ކަމަށް ކަނޑައަޅާފައިވާ އިނގިރޭސި ރާނީ އެ މަގާމުން ދުރުކޮށް، އަންނަ އަހަރު ފެށިގެން ގައުމަކީ ޖުމްހޫރި ވެރިކަމުގެ ނިޒާމު އޮންނަ ގައުމެއްގެ ގޮތުގައި ނިންމައިފިއެވެ.
އިނގިރޭސީންގެ އަތުން މިނިވަންކަން ލިބުނުތާ 55 އަހަރު އަންނަ އަހަރު ފާހަގަކުރާއިރު، ބާބެޑޮސް އިން ބޭނުންވަނީ އެެހެން އެއްވެސް ބައެއްގެ ނޫފުޒެއް ނެތި މިނިވަން ގައުމެއްގެ ގޮތުގައި އޮތުމަށެވެ.
ބާބެޑޯސްގެ ބޮޑުވަޒީރު މިއަ މޮޓްލޭ ވިދާޅުވީ، ގައުމުތަކުގެ އިސްތިއުމާރުގެ ދަށުގައި އޮތް އޮތުން ހަނދާން ނައްތާލަން ކަމަށެވެ. އަދި ބާބޭޑޯސް އިން ބޭނުންވަނީ އެ ގައުމުގެ އެންމެ އިސްވެރިއެއްގެ ގޮތުން ގައުމަށް އުފަން މީހަކު ހުންނަން ކަމަށެވެ.
އިނގިރޭސީންގެ އަތުން ބާބެޑޮސް އަށް މިނިވަންކަން ލިބުނީ 1966 ވަނަ އަހަރުއެވެ. މިނިވަންކަން ލިބުނު ކަމުގައިވިޔަސް އެގައުމުގެ އެންމެ އިސްވެރިއެއްގެ ގޮތުގައި ހުންނަވަނީ އިނގިރޭސި ރާނީއެވެ.
1998 ވަނަ އަހަރު ބާބޭޑިއަންގެ ގާނޫނު ރިިވިއު ކުރާ ކޮމިޝަނުން ހުށައެޅީ އެ ގައުމަށް ޖުމްހޫރިއްޔާގެ ލަގަބު ހޯދުމަށެވެ. އޭގެ ފަހުން 2015 ވަނަ އަހަރު އެ ގައުމުގެ ބޮޑު ވަޒީރު ކަމުގައި ހުންނެވި ފްރެންޑެލް ސްޓުއާޓް ވިދާޅުވީ، އެ ގައުމުގައި ޖުމްހޫރީ ނިޒާމް އެއް ވަރަށް އަވަހަށް ގާއިމް ކުރާނެ ކަމަށެވެ.
