އެމެރިކާގެ ރައީސް ޑޮނަލްޑް ޓްރަމްޕްގެ ޗީފް ސްޓްރެޓީޖިސްޓް ސްޓީވް ބެނަން މަގާމުން ވަކި ކުރައްވައިފިއެވެ.

ވައިޓް ހައުސްގެ ތަރުޖަމާނު ސާރާ ހަކަބީ ވެސް ވަނީ ބެނަން ދެން މަސައްކަތަށް ނުނިކުންނަވާނެކަން ކަށަވަރުކޮށްދެއްވާފައެވެ.

"ވައިޓް ހައުސްގެ ޗީފް އޮފް ސްޓާފް ޖޯން ކެލީ އަދި ސްޓީވް ބެނަންއާ ދެބޭފުޅުންނަށް އެއްބަސްވެވުނީ މިއަދަކީ ސްޓީވްގެ ފަހު ދުވަސް ކަމަށް"ހުކުރު ދުވަހު ނެރުއްވި ބަޔާނެއްގައި ސާރާ ހަކަބީ ސޭންޑަރސް ވިދާޅުވެފައި ވެއެވެ."އޭނާގެ ޚިދުމަތާ މެދު އުފާކުރަން އަދި ވަރަށް ހެޔޮއެދުން އަރިސްކުރަން."

ރައީސް ޓްރަމްޕްގެ "އެމެރިކާ ފަސްޓް" ކެމްޕެއިން ބައްޓަން ކުރަން އެހީތެރިވެދެއްވި ބެނަން ބަދަލުވެ ވަޑައިގަންނަވަނީ ބްރެއިޓްބާޓް ޑޮޓް ކޮމްގެ ވެރިޔަކަށެވެ. ބެނަން ވިދާޅުވީ އިޚުލާސްތެރިކަމާ އެކު ހުންނަވާނެ ކަމަށެވެ.

އުމުރުން 63 އަހަރުގެ ބެނަންއަކީ އެ ވެބްސައިޓްގެ ޗެއާމަންއެވެ. އެ ވެބްސައިޓަކީ ޔަހޫދީންނާ ދެކޮޅަށް އަޑު އުފުލުމާ ދޮން މީހުން އިސްވާނެކަމަށް ބުނާ ފިކުރު ޕްރޮމޯޓްކުރާ ކަމުގެ ތުހުމަތު ކުރެވިފައިވާ ވެބްސައިޓެކެވެ.

ބެނަންގެ އިތުރުން ރައީސް ޓްރަމްޕްގެ ސްޕެޝަލް އެޑްވައިޒަރުގެ ދައުރު އަދާކުރައްވަމުން ގެންދެވި ބިލިއަނަރ ކާލް އައިކަން ވެސް ވަނީ އިސްތިއުފާ އިއުލާނުކުރައްވާފައެވެ. އޭނާގެ މައްޗަށް ވަނީ އޭނާ ދެއްވާ ލަފާފުޅުތަކަކީ އޭނާގެ އަމިއްލަފުޅު ވިޔަފާރިއަށް މަންފާ ހޯދާ ލަފާތަކެއް ކަމަށް ތުހުމަތު ކުރެވިފައެވެ.

މަގާމާ ހަވާލުވެ ވަޑައިގެންނެވިތާ އެންމެ 10 ދުވަހުގެ ތެރޭ ވައިޓްހައުސްގެ ކޮމިއުނިކޭޝަންސް ޑިރެކްޓަރގެ މަގާމުން އެންތަނީ ސްކެރަމޫޗީ ވެސް ވަނީ ވަކިކުރައްވާފައެވެ.

އޯގަސްޓް މަހުގެ ފުރަތަމަ ދުވަހު އޭނާ އެ މަގާމުން ވަކިކުރެއްވީ ރައީސް ޓްރަމްޕްގެ އާ ޗީފް އޮފް ސްޓާފްގެ މަގާމަށް ކުރީގެ ޖެނެރަލެއް ކަމަށްވާ ޖޯން ކެލީ އައްޔަންކުރެއްވިތާ ކުޑަ ވަގުތުކޮޅެއްގެ ތެރޭގައެވެ.