މިއަހަރު އެންމެ ބޮޑު އާމްދަނީއެއް ލިބުނު ކުޅުންތެރިއަކަށް މެސީ

މިއަހަރު ދުނިޔޭގެ އެންމެ ބޮޑު އާމްދަނީއެއް ލިބުނު ފުޓްބޯޅަ ކުޅުންތެރިއަކަށް ބާސެލޯނާއަށް ކުޅެމުން އަންނަ އާޖެންޓީނާގެ ތަރި ލިއޮނެލް މެސީ ހޮވައިފިއެވެ.

ފޯބްސް މަޖައްލާއިން ހާމަކުރާ މި ލިސްޓަކީ އަހަރަކު އެއް ފަހަރު (ފާއިތުވި 12 މަސް ދުވަހަށް ބެލުމަށް ފަހު) ނެރޭ ލިސްޓެކެވެ. އަދި މި ހިސާބުތައް ޖަހާފައިވަނީ ފާއިދުވި 12 މަހުގެ ތެރޭ ކުޅުންތެރިންގެ މުސާރަ އާއި، އިނާމު ފައިސާ އަދި އިޝްތިހާރުތަކުން ލިބޭ ޖުމްލަ އާމްދަނީއަށް ބަލައިގެންނެވެ.

އެގޮތުން މި އަހަރުގެ ލިސްޓުގެ އެންމެ ކުރީގައި އޮތީ މި ޓްރާންސްފާ ބާޒާރުގައި ބާސާ ދޫކޮށް ދިޔުމަށް ބޭނުންވާކަން ހާމަކޮށް، އެކަމަކު ފަހު އެ ކުލަބުގައި މަޑުކުރަން ނިންމި މެސީއެވެ. މެސީއަށް ވަނީ މިއަހަރުގެ ތެރޭގައި 126 މިލިޔަން ޑޮލަރުގެ އާމްދަނީއެއް ލިބިފައެވެ. ފޯބްސްއިން ހާމަކޮށްފައިވާ ގޮތުގައި މިއަހަރު މެސީއަށް ވަނީ މުސާރައިގެ ގޮތުގައި 92 މިލިޔަން ޑޮލަރު ވަނީ ލިބިފައެވެ. އަދި ބާކީ 34 މިލޔަން ޑޮލަރު އޭނާއަށް ލިބުނީ އިޝްތިހާރުތަކުންނެވެ.

މި ލިސްޓުގެ ދެވަނައަށް ދިޔަ މެސީއާ އެންމެ ވާދަވެރި ޔުވެންޓަސްއަށް ކުޅެމުން އަންނަ ޕޯޗުގަލްގެ ތަރި ކްރިސްޓިއާނޯ ރޮނާލްޑޯއަށް މިއަހަރު ލިބިފައިވަނީ 117 މިލިޔަން ޑޮލަރުގެ އާމްދަނީއެކެވެ. މި ލިސްޓުގެ ދެވަނައަށް ދިޔަ ނަމަވެސް، ރޮނާލްޑޯއަކީ ކެރިއަރުގައި ބިލިޔަން ޑޮލަރުގެ އާމްދަނީއެއް މިހާތަނަށް ހޯދާފައިވާ ހަމައެކަނި ފުޓްބޯޅަ ކުޅުންތެރިޔާއެވެ.

މީގެ އިތުރުން ފޯބްސްއިން ހާމަކުރި ލިސްޓުގެ ތިންވަނަ 96 މިލިޔަން ޑޮލަރުގެ އާމްދަނީއާއެކު ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާ ހޯދިއިރު، 42 މިލިޔަން ޑޮލަރުގެ އާމްދަނީއާއެކު ޕީއެސްޖީއަށް ކުޅެމުން އަންނަ ފްރާންސްގެ ޒުވާން ފޯވާޑް ކީލިއަން އެމްބާޕޭ ވަނީ ހަތަރުވަނަ ހޯދާފައެވެ. ލިސްޓުގެ ފަސްވަނައިގައި ލިވަޕޫލަށް ކުޅެމުން އަންނަ މިސްރުގެ ފޯވާޑް މުޙައްމަދު ސަލާހު އޮތްއިރު، ހަވަނައިގައި އޮތީ މެންޗެސްްޓާ ޔުނައިޓެޑަށް ކުޅެމުން އަންނަ ފްރާންސްގެ މިޑްފީލްޑަރު ޕައުލް ޕޮގްބާއެވެ. މިއަހަރު ސަލާހަށް ލިބުނު އާމްދަނީ 37 މިލިޔަން ޑޮލަރުގައި އުޅޭއިރު، ޕޮގްބާއަށް ލިބިފައިވަނީ 34 މިލިޔަން ޑޮލަރުގެ އާމްދަނީއެކެވެ.

އަދި 33 މިލިޔަން ޑޮލަރުގެ އާމްދަނީއާއެކު ބާސާއަށް ކުޅެމުން އަންނަ ފްރާންސްގެ ފޯވާޑް އެންޓޮއިން ގްރީޒްމަން ވަނީ ލިސްޓުގެ ހަތްވަނަ ހޯދާފައެބެ. ލިސްޓުގެ އަށްވަނަ 29 މިލިޔަން ޑޮލަރުގެ އާމްދަނީއަކާއެކު ރެއާލް މެޑްރިޑަށް ކުޅެމުން އަންނަ ވޭލްސްގެ ތަރި ގެރެތު ބޭލް ހޯދިއިރު، 28 މިލިޔަން ޑޮލަރުގެ އާމްދަނީއަކާއެކު ލިސްޓުގެ ނުވަވަނަ ހޯދީ ބަޔާން މިއުނިކަށް ކުޅެމުން އަންނަ ޕޮލެންޑްގެ ފޯވާޑް ރޮބަޓް ލެވަންޑޯސްކީއެވެ. އަދި 10 ވަނައަށް ދިޔަ ޔުނައިޓެޑަށް ކުޅެމުން އަންނަ ސްޕެއިން ގޯލްކީޕަރު ޑޭވިޑް ޑެހެއާއަށް ލިބިފައިވަނީ 27 މިލިޔަން ޑޮލަރުގެ އާމްދަނީއެކެވެ.