ދިވެހިރާއްޖޭގެ 'މަލްޓި ހަޒާރޑް އެޓްލާސް' މިނިސްޓްރީ އޮފް އެންވަޔަރަންމަންޓުން އިފްތިތާހުކޮށްފިއެވެ.
އަންގާރަ ދުވަހު އެޓްލަސް އިފްތިތާހްކޮށްފައިވާއިރު މިކަމަށް ހާއްސަކޮށް ބޭއްވި ވާރޗުއަލް ބައްދަލުވުމުގައި މިނިސްޓަރ އޮފް އެންވަޔަރަންމަންޓް ޑރ. ހުސެން ރަޝީދު ހަސަން ވަނީ ވާހަކަފުޅު ދައްކަވާފައެވެ.
މިނިސްޓަރ ވިދާޅުވީ މީގެ ސަބަބުން، ތަރައްޤީގެ އެކި މަޝްރޫއުތަކާއި ބެހޭ ނިންމުންތައް ނިންމުމުގައި، ދިރާސާތަކުގެ މައްޗައް ނުވަތަ އެވިޑެންސް ބޭސްޑް ޑިސިޝަން ނެގުމުގައި އެހީތެރިވެދޭނެ ކަމަށެވެ. އަދި މޫސުމަށް އަންނަ ބަދަލުތަކުގެ ސަބަބުންނާއި، ގުދުރަތީ އެކިއެކި ކާރިސާތަކުގެ ސަބަބުން ލިބޭ ގެއްލުންތައް ކުޑަކުރުމަށް ކުރެވޭ މަސައްކަތުގައި، މާލީ އެހީދޭ ފަރާތްތަކުން ފޯރުކޮށްދޭ އެހީ އެންމެ އެދެވޭ ގޮތުގައި ބޭނުން ކުރެވިގެންދާނެ ކަމުގެ ޔަޤީންކަން އެފަރާތްތަކަށް އިތުރުކޮށްދެވޭކަމަށް މިނިސްޓަރ ވިދާޅުވިއެވެ.
މިއީ އޭޝިއަން ޑިވަލޮޕްމަންޓް ބޭންކް (އޭ.ޑީ.ބީ) ގެ ފަންނީ އެހީ އާއިއެކު، 'ކްލައިމެޓް ރިސްކް ސްކްރީނިންގ ފޯރ މެއިންސްޓްރީމިންގ ކްލައިމެޓް ޗޭންޖް އެޑެޕްޓޭޝަން އިންޓު ޑިވެލޮޕްމަންޓް އެކްޓިވިޓީސް އެންޑް ޕޮލިސީސް' ޕްރޮޖެކްޓްގެ ދަށުން ދިރާސާކުރެވި ތައްޔާރުކުރެވިފައިވާ އެޓްލަސް އެކެވެ.
މީގައި މައިގަނޑު ގޮތެއްގައި ހިމެނޭނީ، ތަރައްޤީގެ އެކިއެކި މަޝްރޫއުތައް ބައްޓަންކުރުމުގައި، މޫސުމަށް އަންނަ ބަދަލުތަކުގެ ސަބަބުންނާއި އަދި ގުދުރަތީ އެކިއެކި ކާރިސާތަކުގެ ސަބަބުން ލިބިދާނެ ގެއްލުންތައް ކުޑަކުރުމުގެ ގޮތުން، މަޝްރޫއުތައް ފަރުމާކުރުމުގައި އެހީތެރިވެދޭނެ މައުލޫމާތުތަކެވެ. އެޓްލަސް ތައްޔާރު ކުރެވިފައިވަނީ ޖިއޮގްރަފިކް އިންފޮމޭޝަން ސިސްޓަމް (ޖީ.އައި.އެސް) ޕްލެޓްފޯމެއްގެ މައްޗަށްކަމަށް އެންވަޔަރަންމަންޓް މިނިސްޓްރީން ބުނެއެވެ،
އަދި މި މައުލޫމާތު އާއްމުކޮށް ލިބޭނެގޮތަށް އޮންލައިން ކުރުމަށް މަސައްކަތް ކުރަމުންދަކަމަށާއި އެޓަލަސްގެ މައުލޫމާތު އެންވަޔަރަންމަންޓް މިނިސްޓްރީގެ ވެބްސައިޓް މެދުވެރިކޮށް މިހާރުލިބެން ހުންނާނެކަމަށް އެ މިނިސްޓްރީން ބުނެއެވެ.
