އަތޮޅުތެރޭގައި ހުރި ކޮވިޑް ފެސިލިޓީތަކުގައި މި ވަގުތު ފަރުވާދެމުން ދަނީ ފަސް މީހަކަށް
ރާއްޖޭގެ ފަސް ސަރަހައްދެއްގައި މި ފެސިލިޓީތައް ވަނީ ގާއިމްކޮށްފައި
އަތޮޅު ތެރޭގައި ގާއިމުކޮށްފައިވާ ކޮވިޑް ފެސިލިޓީއެއް
އަތޮޅުތެރޭގައި ކޮވިޑް ފަރުވާއަށް ގާއިމުކޮށްފައިވާ ފެސިލިޓީތަކުގެ ތެރެއިން 3 ފެސިލިޓީއެއްގައި ފަސް މީހަކަށް ފަރުވާދެމުން އެބަދެއެވެ.
އަންގާރަ ދުވަހުގެރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ މި ވަގުތު ށ. ފުނަދޫ ކޮވިޑް ފެސިލިޓީގައި ދެ މީހަކަށް، ބ. އޭދަފުށި ކޮވިޑް ފެސިލިޓީގައި އެކަކަށް އަދި ގއ. ވިލިނގިލި ކޮވިޑް ފެސިލިޓީގައި ދެ މީހަކަށް ފަރުވާ ދެމުންދާ ކަމަށެވެ.
މާލެ ނުގެނެސް ކޮވިޑަށް ފަރުވާ ދިނުމުގެ ކަންކަން ކުރިއަށް ގެންދިއުމުގެ ގޮތުން ރާއްޖޭގެ 5 ސަރަހައްދެއްގައި ވަނީ ކޮވިޑް ފެސިލިޓީތައް ގާއިމުކޮށްފައެވެ. ލ. ގަމު ފެސިލިޓީ ޚާއްސަކޮށްފައިވަނީ މ، ފ ،ދ، ތ، ލ އަތޮޅުގެ ރަށްތަކަށެވެ. ގއ. އަދި ގދ. ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ގއ. ވިލިނގިލީ ގައެވެ. ނ، ރ، ބ. އަދި ޅ. ގެ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ބ. އޭދަފުށީގައެވެ. ހއ، ހދ. އަދި ށ. ގެ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ށ. ފުނަދޫގައެވެ. އަދި ޏ، ސ. ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ އައްޑޫ ސިޓީ ހިތަދޫގައެވެ.
މީގެ އިތުރުން، މި ވަގުތު ވެސް ކޮވިޑް ޖެހިފައިވާ ހަތަރު މީހަކަށް އައިސީޔޫގައި އަންނަނީ ފަރުވާދެމުންނެވެ. އޭގެ ތެރެއިން ދެ މީހަކަށް ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގެ އައިސީޔޫގައި ފަރުވާދެމުންދާއިރު އަނެއް ދެ މީހުންނަށް އައިސީޔޫގައި ފަރުވާ ދެމުންދަނީ ހުޅުމާލެ މެޑިކަލް ފެސިލިޓީ ގައެވެ.
