އިންޑިއާގެ ޤާނޫނު ހަދާ މަޖިލީހުގެ 30 މެމްބަރުންނާއި 50 މުވައްޒަފުން ކޮވިޑަށް ޕޮޒިޓިވް!
އާދިއްތަ ދުވަހު އެކަނިވެސް 90،000ށް ވުރެ ގިނަ މީހުން ޕޮޒިޓިވްވި
އިންޑިއާގެ ޤާނޫނު ހަދާ މަޖިލީސް (ލޮކް ސަބާ)- އަލުން ޖަލްސާތައް ފަށާފައިވަނީ 6 މަހުގެ މެދުކެނޑުމަކަށް ފަހު
އަވައްޓެރި އިންޑިއާގެ ޤާނޫނު ހަދާ މަޖިލީސް (ލޮކް ސަބާ) ގެ 30 މެމްބަރުންނާއި 50ށް ވުރެ ގިނަ މުވައްޒަފުން ކޮވިޑް-19 އަށް ޕޮޒިޓިވްވެފައިވާކަން ކަށަވަރު ވެއްޖެއެވެ.
ހޯމަ ދުވަހު އަލުން މަޖިލީހުގެ ޖަލްސާތައް ފަށާފައިވާއިރު، އޭގެ ކުރިން މަޖިލީހުގެ މެމްބަރުން ވަނީ ކޮވިޑަށް ޓެސްޓް ކޮށްފައެވެ. ހޯމަ ދުވަހުގެ ޖަލްސާއަކީ އިންޑިއާގައި ކޮވިޑުގެ އައުޓްބްރޭކެއް ފެނުމުގެ ފަހުން ބޭއްވި ފުރަތަމަ ޖަލްސާއެވެ. އެގޮތުން މިހާތަނަށް 30 މެމްބަރެއްގެ ނަތީޖާ ޕޮޒިޓިވްވެފައިވާއިރު، ޕޮޒިޓިވްވި މެމްބަރުންގެ އަދަދު އެއަށްވުރެ މަތިވާނެ ކަމަށް ބެލެވޭ ކަމަށް ވެސް އިންޑިއާގެ ބައެއް ނޫސްތަކުން ވަނީ ރިޕޯޓް ކޮށްފައެވެ.
އިންޑިއާގެ މަޖިލިސް ޖަލްސާތައް ފެށުމަށް ކުރިން ނިންމާފައި އޮތީ ޖުލައި މަހުގެ ތެރޭގައެވެ. އެހެން ނަމަވެސް، ކޮވިޑާއި ގުޅިގެން މަޖިލިސް ޖަލްސާތައް ފެށުން އޭރު ވަނީ ފަސްކޮށްފައެވެ.
އިންޑިއާ އަކީ މިވަގުތު މުޅި ދުނިޔެއިން ދެވަނައަށް އެންމެ ގިނަ މީހުން ޕޮޒިޓިވްވެފައިވާ ޤައުމެވެ. އެގޮތުން މިހާތަނަށް 4.8 މިލިއަނަށްވުރެ ގިނަ މީހުން ޕޮޒިޓިވްވެފައިވާއިރު، އާދިއްތަ ދުވަހު އެކަނިވެސް 90،000ށް ވުރެ ގިނަ މީހުން ހަމައެކަނި އިންޑިއާ އިން ޕޮޒިޓިވްވެފައިވެއެވެ.
