އުމްރާއަށް މީހުން ގެންދިއުމަށް ކުންފުނިތަކަށް ދޫކުރި ހުއްދަ އިތުރުކޮށްފި
14 ސެޕްޓެމްބަރު 2020 | ހޯމަ 14:53ހުއްދައިގެ މުއްދަތު އިތުރު ކުރީ އެއް އަހަރަށް
މީގެކުރިން ހައްޖަށް ދިޔަ ދިވެހި ހައްޖާޖީންތަކެއް ވެލާނާ އިންޓަނޭޝަނަލް އެރޕޯޓުގައި ފުރުމަށް ތައްޔާރުވެގެން
ދިވެހިރާއްޖެއިން އުމްރާއަށް މީހުން ގެންދިއުމަށް ހުއްދަ ދީފައިވާ ކުންފުނިތަކުގެ ހުއްދައިގެ މުއްދަތު އިސްލާމިކް މިނިސްޓްރީން އިތުރުކޮށްފިއެވެ.
އިސްލާމިކް މިނިސްޓްރީން ބުނީ ރާއްޖެއިން އުމްރާއަށް މީހުން ގެންދިއުމަށް މިހާރު ހުއްދަ ދީފައިވާ ކުންފުނިތަކަކީ، ރާއްޖެއިން އުމްރާއަށް މީހުން ގެންދިއުމާ ބެހޭ އުސޫލުގެ 4 ވަނަ މާއްދާގެ (ށ) ގެ ދަށުން 2 އަހަރު ދުވަހުގެ މުއްދަތަށް ހުއްދަ ދީފައިވާ ކުންފުނިތަކެއް ކަމަށެވެ.
ނަމަވެސް 2020 ވަނަ އަހަރުގެ މިހާ ހިސާބަށް، އެ ކުންފުނިތަކަށް އުމްރާ ދަތުރުތައް ކުރުމަށް އެކަށީގެންވާ ފުރުސަތެއް ލިބިފައި ނުވާތީ، އެ ކުންފުނިތަކަށް ދީފައިވާ ހުއްދައިގެ މުއްދަތު ހަމަވާ ތާރީޚުން ފެށިގެން، ރާއްޖެއިން އުމްރާއަށް މީހުން ގެންދިއުމާ ބެހޭ އުސޫލުގެ 24 ވަނަ މާއްދާއިން މިނިސްޓްރީއަށް ލިބިދީފައިވާ ބާރުގެ ދަށުން އެއް އަހަރު ދުވަސް އިތުރު ކޮށްދީފައިވާ ކަމަށް އިސްލާމިކް މިނިސްޓްރީން ބުނެއެވެ.
ކޮވިޑް-19އާއި ގުޅިގެން މިއަހަރު ރާއްޖެއިން މީހުން ހައްޖަށް ގެންދިއުމުގެ ފުރުސަތު ވެސް ކުންފުނިތަކަށް ނުލިބެއެވެ. ހަލުވިމިނެއްގައި ވައިރަސް ފެތުރެމުންދާތީ މިއަހަރު ސައުދީން ނިންމީ ހަމައެކަނި ސައުދީގައި ދިރިއުޅޭ މީހުންނަށް ހައްޖުގެ އަޅުކަން އަދާ ކުރުމުގެ ފުރުސަތު ދިނުމަށެވެ. އެގޮތުން މިއަހަރުގެ ހައްޖުގެ އަޅުކަމުގައި ބައިވެރިވުމަށް ހޮވުނު އެންމެންނަކީވެސް ސައުދީ އަރަބިއްޔާގައި ދިރިއުޅޭ މީހުންގެ ތެރެއިން ސިއްހީ މައްސަލައެއް ނެތް، އަދި ކުރިން ހައްޖުވެފައި ނުވާ، އުމުރުން 20 އަހަރާއި 50 އަހަރާ ދެމެދުގެ މީހުންނެވެ.
