ސަރުކާރަށް ގޮންޖަހައި، ޗެލެންޖުކުރުމަށް ފުރުސަތެއް ނުދޭނަން
އެމްޑީޕީގެ ނައިބު ރައީސް އަދި ރައީސް އޮފީހުގެ މިނިސްޓަރު މުހަންމަދު ޝިފާޒް
ސަރުކާރާ ދެކޮޅަށް ކިތަންމެ ވަރަކަށް މުޒާހަރާ ކުރި ނަމަވެސް، ކުރީ ސަރުކާރުން ހިންގާފައިވާ ކޮރަޕްޝަންގެ މައްސަލަތައް ބަލައި އެކަމުގައި ފިޔަވަޅު އަޅަންޖެހޭ ފަރާތްތަކަށް ސަރުކާރުން ފިޔަވަޅު އަޅާނެ ކަމަށް ރައީސް އޮފީހުގެ މިނިސްޓަރ މުހައްމަދު ޝިފާޒު ވިދާޅުވެއްޖެއެވެ.
ކޮވިޑް-19 ގެ މިދުވަސްވަރު ޕްރޮގްރެސިވް ކޯލިޝަނުން އަންނަނީ ތަފާތު އެކި ނަން ނަމުގައި ސަރުކާރާ ދެކޮޅަށް މުޒާހަރާތަކާއި ސައިކަލު ބުރުތައް ބާއްވަމުންނެވެ. އަދި މިފަދަ ހައްސާސް ދަނޑިވަޅެއްގައި މުޒާހަރާތަކަށް ނުކުމެގެން އިދިކޮޅުގެ އެތައް ބަޔަކު ވަނީ ޖޫރިމަނާ ވެސް ކޮށްފައެވެ.
ރާއްޖެޓީވީގެ "ސިޔާސީ ދުނިޔެ" ޕްރޮގްރާމުގައި ވާހަކަ ދައްކަވަމުން އެމްޑީޕީގެ ނައިބު ރައީސް ޝިފާޒް ވިދާޅުވީ، ރާއްޖޭގެ ރައްޔިތުންނަށް އެންމެ ބޮޑަށް ބޭނުންވެފައި އޮތީ އިންސާފު ކަމަށެވެ. އަދި އިންސާފު ގާއިމުކުރުމަށް ކުރަންޖެހޭ ކަންކަމުގައި ސަރުކާރު އޮތީ ވަރަށް ސާބިތުކަމާއެކު ކަމަށް އޭނާ ވިދާޅުވިއެވެ.
ޝިފާޒް ވިދާޅުވީ ސަރުކާރަށް ގޮންޖަހައި، ޗެލެންޖު ކުރުމަށް އެއްވެސް ފަރާތަކުން މަސައްކަތް ކުރުމަކީ ގޯހެއް ކަމަށާއި، އެ ނިޔަތުގައި ސަރުކާރާ ކުރިމަތި ނުލެވެނޭ ކަމަށެވެ.
ޝިފާޒު ވިދާޅުވީ، މުޒާހަރާތަކަށް ނުކުންނަންވާނީ ފިސާރި ކެރިގެން ކަމަށާއި، ކަމުން ރެކިގެން އެހެން ބައެއްގެ ބޮލުގައި އިލްޒާމު އެޅުވުމުގެ ހަޑި ސިފަ ދޫކޮށްލަންޖެހޭ ކަމަށެވެ. އަދި ޖޫރިމަނާ ކުރާ ކޮންމެ ފަހަރަކު ފަންޑު ފޮއްޓެއް ހުޅުވައިގެން ރައްޔިތުންގެ އަތުން ފައިސާ ހޯދުމުގެ މާނައެއް ނެތް ކަމަށް ވެސް ޝިފާޒް ވިދާޅުވިއެވެ.
ޝިފާޒު ވިދާޅުވީ ކުރީގެ ރައީސް ޔާމީންގެ ސަރުކާރުން ވިއްކާފައިވާ ރަށްތަކާއި ފަޅުތަކުން ހޯދި ފައިސާ އަނބުރާ ދައުލަތަށް ހޯއްދަވާނެ ކަމަށާއި، އަދި ހާބަރު ފުޓު ކޯޓުގައި ހަދާފައި ހުރި ކެފޭތައް ނުހައްގުން ދީފައިވާ ފަރާތްތައް ހޯދައި، އެކަމުގައި ވެސް ފިޔަވަޅު އަޅުއްވާނެ ކަމަށެވެ.
ޝިފާޒް ވަނީ އެމްޑީޕީން އިދިކޮޅުގައި ތިބިއިރު މުޒާހަރާތައް ރާވާ ހިންގި ގޮތް ނަމޫނާއަކަށް ބަލައި، މިހާރުގެ އިދިކޮޅު ފަރާތްތަކުން މުޒާހަރާތައް ރޭވުމަށް ގޮވާލާފައެވެ.
