ހުޅުމާލޭގެ ޕާކިން އަށް ހައްލެއް ގެންނަން ޕްލޭނެއް ވަނީ އެކުލަވާލާފައި: އެޗްޑީސީ
13 ސެޕްޓެމްބަރު 2020 | އާދީއްތަ 23:09މާލެއިން ހުޅުމާލެ އަށް ދާ އުޅަނދުތައް ދިރިއުޅޭ ފަރާތްތަކަށް އުދަގޫވާ ގޮތަށް ޕާކްކުރާ މައްސަލަ ވަނީ ބޮޑުވެފައި
ހުޅުމާލެ މަގެއްގެ މަތީގައި ސައިކަލްތަކެއް ޕާކްކޮށްފައި
ހުޅުމާލޭގެ ޕާކިން އަށް ދާއިމީ ހައްލެއް ހޯދުމުގެ ގޮތުން ޕްލޭން އެއް އެކުލަވާލައި އެ ޕްލޭން ޓްރާންސްޕޯޓް މިނިސްޓްރީއާ ހިއްސާކޮށްފައިވާ ކަމަށް ހައުސިން ޑިވަލޮޕްމެންޓް ކޯޕަރޭޝަން (އެޗްޑީސީ) އިން ބުނެފިއެވެ.
އާދިއްތަ ދުވަހު ''ރާއްޖެ.އެމްވީ'' އަށް ދެއްވި އިންޓަވިއުއެއްގއި އެޗްޑީސީގެ މުނިސިޕަލް ޑިރެކްޓަރ އާދަމް އަޒްމީ ވިދާޅުވީ، ޕާކިންގެ ކަންތައްތަކަކީ ވަރަށް އިސްކަމެއްދީގެން ބަަލަމުން ދިޔަ ކަންތައްތައް ކަމަށާއި، ނަމަވެސް ބްރިޖް ހުޅުވުމާއި އެކު ޕާކިން ކަންތައް އެއްކޮށް ކޮންޓްރޯލުން ނެއްޓިގެން ގޮސްފައިވާ ކަމަށެވެ.
ވަކިން ހާއްސަ ގޮތެއްގައި މި ފަހަކަށް އައިސް މާލެއިން އަންނަ އުޅަނދުތައް ހުޅުމާލޭގައި ދިރިއުޅޭ ފަރާތްތަކަށް ދަތިވާ ގޮތަށް ޕާކް ކުރާ މައްސަލަ އަކީ ވަރަށް ގިނައިން އެޗްޑީސީ އަށް ހުށައެޅޭ އެއް މައްސަލައެއްގެ ގޮތުގައި އަޒްމީ ފާހަގަކުރެއްވިއެވެ.
އަޒްމީ ވިދާޅުވި ގޮތުގައި، ޕާކިން އަށް އެކުލަވާލި ޕްލޭން ކުރިޔަށް ގެންދިޔުމުގެ ހުއްދަ ކަމާއި ބެހޭ އިދާރާތަކުން ލިބުމުން އެ މަސައްކަތް ފެށިގެން ދާނެއެވެ.
ހުޅުމާލޭގެ ޕާކިން އަށް ހައްލެއް ހޯދުމުގެ މަސައްކަތް ކުރަމުންދާ ކަމަށް އެޗްޑީސީން ބުނެފައިވާއިރު، ޕާކިން އަށް ވަކި ސަރަހައްދުތަކެއް ކަނޑައެޅެން އެއްގަމު އުޅަނދުތައް ރަޖިސްޓްރީ ކުރުން މިދިޔަ އަހަރުގެ މެއި މަހު މަޑު ޖައްސާލިއެވެ.
ނަމަވެސް އުޅަނދުތައް ރަޖިސްޓްރީ ކުރާ ސަރަހައްދުން ޖާގަ ހުސްވެފައިވާތީ އަނެއްކާވެސް ރަޖިސްޓްރީ ކުރުމުގެ ހިދުމަތް އޮގަސްޓު މަހު އެޗްޑީސީން ފަށައިގެން ކުރިޔަށް ގެންދިޔައެވެ.
ހުޅުމާލޭގައި އުޅަނދުތަކަށް ރަޖިސްޓްރީ ކުރެވޭނީ ރޯހައުސްތަކާއި ފްލެޓްތައް ނުވަތަ ބިންތަކުގެ ވެރިފަރާތަށް އެކަނި ކަމަށް އެޗްޑީސީން ވަނީ ބުނެފައެވެ.
