ބޮޑީބޯޑް ކުރަން އުޅުމުގެ ތެރޭގައި ކުޑަ އައްޔައަށް އަނިޔާވެއްޖެ

ބޮޑީބޯޑް ކުރަން އުޅުމުގެ ތެރޭގައި ގައުމީ ބޮޑީބޯޑިންގ ޓީމުގައި ހިމެނޭ އަދި ރާއްޖޭގައި އުފެދުނު އެންމެ މޮޅު ބޮޑީބޯޑަރު އަލީ ޚުޝްރުވާން އަޙްމަދު (ކުޑަ އައްޔަ) އަށް އަނިޔާވެއްޖެއެވެ.

ކުޑަ އައްޔައަށް އަނިޔާވީ އާދީއްތަ ދުވަހުގެ ހަވީރު ރާޅުގަނޑު ސަރަހައްދުގައި ބޮޑީބޯޑް ކުރަން އުޅުމުގެ ތެރޭގައެވެ.

"ރާއްޖެ.އެމްވީ" އަށް މައުލޫމާތުދެމުން ކުޑަ އައްޔަ ބުނީ އަނިޔާވީ އާދީއްތަ ދުވަހުގެ ހަވީރު ބޮޑީބޯޑް ކުރަން އުޅުމުގެ ތެރޭގައި ކަމަށެވެ. ފުރަތަމަ ދުއްވަމުން ދިޔަ ރާޅުގައި އޮޅާލުމާއެކު، މޫދު އަޑީގެ ފަރުގައި ޖެހުމުން އަނިޔާވީ ކަމަށެވެ. އަދި ފަރުގައި ޖެހި މޫނުމަތި ވަރަށް ބޮޑަށް ފަޅައިގެން ދިޔަ ކަމަށާއި، އެކަމަކު ކަށިގަނޑަށް އަނިޔާއެއް ނުވާ ކަމަށް ވަނީ ބުނެފައެވެ.

ކުޑަ އައްޔަ އިތުރަށް ބުނީ އަނިޔާވީ މިދިޔަ ދުވަސްތަކުގައި ކޮވިޑް-19 ގެ ކޭހަކާ ޑިރެކްޓް ކޮންޓެކްޓްވުމާ ގުޅިގެން ކަރަންޓީނަށް ގޮސް، އެނބުރި މާލެ އައުމަށްފަހު ބޮޑީބޯޑް ކުރަން ދިޔަ ފުރަތަމަ ދުވަހު ކަމަށެވެ. އަދި މިފަދަ ގޮތަކަށް އަނިޔާވީ ގިނަ ދުވަސްތަކަކަށްފަހު މޫދަށް ގޮސް އެޅި ފުރަތަމަ ރާޅުގައި އޮޅާލުމުގެ ސަބަބުން ކަމަށްވެސް ކުޑަ އައްޔަ ބުންޏެވެ.

ބޮޑީބޯޑް ކުރަން އުޅުމުގެ ތެރޭގައި ގައުމީ ބޮޑީބޯޑިންގ ޓީމުގައި ކުޑަ އައްޔައަށް އަނިޔާވިއިރު، މިއީ އޭނާއަށް ލިބުނު ފުރަތަމަ އަނިޔާއެއް ނޫނެވެ. އެގޮތުން މިހާތަނަށް ހައެއްކަ ފަހަރު މިފަދަ އަނިޔާތައް ލިބިފައިވާ ކަމަށް ކުޑަ އައްޔަ ބުންޏެވެ.

ދާދި ފަހުން މޯލްޑިވްސް ބޮޑީބޯޑިންގ އެސޯސިއޭޝަން (އެމްބީބީއޭ) އިން ގައުމީ ބޮޑީބޯޑިންގ ޓީމެއް އެކުލަވާލާފައިވާއިރު، އެ ޓީމުގައި ކުޑަ އައްޔަ ހިމެނެއެވެ. ކުޑައައްޔަ ވަނީ ރާއްޖޭގެ އިތުރުން ރާއްޖޭއިން ބޭރުގައި ބޭއްވުނު ގިނަ މުބާރާތްތަކުގައި ރާއްޖެ ތަމްސީލުކޮށް ރަންވަނަ ހޯދާފައެވެ. އެގޮތުން ބައިނަލްއަގުވާމީ މުބާރާތެއްގައި އެންމެ ފަހުން ކުޑަ އައްޔަ ވާދަކޮށްފައިވަނީ މިދިޔަ އަހަރުއެވެ. އެގޮތުން މިދިޔަ އަހަރު މެލޭޝިއާގެ ޓިއޮމަން ސާފް ފެސްޓިވަލްގައި ވާދަކޮށް ކުޑައައްޔަ ވަނީ ބޮޑީބޯޑިންގ ކެޓަގަރީން ރަން މެޑަލް ހޯދާފައެވެ.