ނައިކީ ދޫކޮށް ނޭމާ ޕޫމާގެ އެމްބަސަޑަރަކަށް

އެމެރިކާގެ ނައިކީން ވަކިވުމަށްފަހު ޕީއެސްޖީއަށް ކުޅެމުން އަންނަ ބްރެޒިލް ތަރި ނޭމާ މަޝްހޫރު ކުޅިވަރު ސާމާނު އުފައްދާ ޖަރުމަނުގެ ކުންފުނި ޕޫމާއާއެކު ސޮއިކޮށްފިއެވެ.

ނައިކީން 15 އަހަރަށްފަހު ނޭމާ ވަކިވިއިރު، ނައިކީން ނޭމާ ސްޕޮންސާކުރީ އޭނާގެ އުމުރުން 13 އަހަރުގައި، ބްރެޒިލްގެ ސަންތޯސްގެ ޖޫނިއާ ޓީމަށް ކުޅުނިއިރެވެ. އޭރު ނޭމާ އަކީ ކުރިމަގުގެ ތަރިއަކަށް ވާނެ ކަމަށް ބެލެވިފައި ހުރި ކުޅުންތެރިއެކެވެ.

ރިޕޯޓްތައް ބުނާ ގޮތުގައި ނޭމާ އާއި ނައިކީ ވަކިވީ އެއްބަސްވުން އާކުރާއިރު ލިބޭނެ އަދަދަކާ މެދު އެއްބަސްނުވެވިގެންނެވެ. އަދި ނޭމާ އާއި ނައިކީން އެންމެ ފަހުން ހަދާފައި އޮތީ 2022 ވަނަ އަހަރު ހަމަވާ ގޮތަށް އޮތް 11 އަހަރުގެ އެއްބަސްވުމެއް ކަމަށާއި، އޭގެ ދަށުން ނޭމާއަށް ޖުމްލަ 105 މިލިއަން ޑޮލަރު ލިބޭނެ ކަމަށެވެ.

ނަކީން ވަކިވުމާއެކު، ހޮނިހިރު ދުވަހުގެ ވަގުތެއްގައި ޕޫމާއިން ވަނީ އެ ކުންފުނީގެ އެމްބަސަޑަރަކަށް ނޭމާ ހަމަޖެއްސިކަން އިއުލާން ކޮށްފައެވެ.

ބާސެލޯނާ ދޫކޮށް ޕީއެސްޖީއަށް 2017 ވަނަ އަހަރު 222 މިލިއަން ޔޫރޯއަށް ބަދަލުވި ނޭމާ އަކީ ދުނިޔޭގެ ފުޓްބޯޅަ ތާރީޚުގައި އެންމެ އަގުބޮޑު ކުޅުންތެރިޔާއެވެ. ފޯބްސް މަޖައްލާއިން ހާމަކޮށްފައިވާ ގޮތުގައި ނޭމާއަށް މި އަހަރު އާމްދަނީގެ ގޮތުގައި 95.5 މިލިޔަން ޑޮލަރު ލިބޭނެއެވެ. އޭނާ އަކީ ދުނިޔޭގެ ހަތްވަނައަށް އެންމެ ބޮޑު އާމްދަނީއެއް ލިބޭ އެތުލީޓެވެ.

ޕޫމާގެ އެމްބަސަޑަރަކަށް ނޭމާ ހަމަޖެއްސިއިރު، އެ ކުންފުނިން ސްޕޮންސާކޮށްފައިވާ މަޝްހޫރު އެތުލީޓުންގެ ތެރޭގައި ދުނިޔޭގެ އެންމެ ބާރު ދުވުންތެރިޔާ އުސެއިން ބޯލްޓް އާއި ބާސެލޯނާގެ ދެ ކުޅުންތެރިން ކަމަށްވާ އެންޓޮއިން ގްރީޒްމަންގެ އިތުރުން ލުއިސް ސުއަރޭޒްވެސް ހިމެނެއެވެ.