ކޮވިޑް-19 އަށް ވެކްސިން އުފެއްދުމަށް އެންމެ ކުރީގައި އުޅޭ އެސްޓްރަޒެނިކާ އިން ކުރިޔަށް ގެންދާ ފޭސް ތިނެއްގެ ޓްރެއަލްގައި ވެކްސިން ދީފައިވާ މީހެއް ގޮތްނޭނގޭ ގޮތަކަށް ބަލިވުމާއި ގުޅިގެން ޓްރެއަލް ކުރިޔަށް ގެންދިޔުން މެދުކަނޑާލާފައި އޮތުމަށްފަހު އަލުން ޓްރެއަލް ފަށާފައިވާ ކަމަށް އެ ކުންފުނިން ހާމަކޮށްފިއެވެ.

ގޮތްނޭނގޭ ގޮތަކަށް މީހަކު ބަލިވުމުން ޓްރެއަލް މެދުކަނޑާލާފައިވަނީ ސެޕްޓެމްބަރ 9 ވީ ބުދަ ދުވަހުއެވެ. އެއަށްފަހު އަލުން ޓްރެއަލް ފަށާފައިވާއިރު އެ ކުންފުނިން ބުނީ ޓްރެއަލް ފަށާފައިވަނީ ވެކްސިން ބޭނުން ކުރުމަކީ ރައްކާތެރިކަމެއް ކަމަށް އެކަން ބެލި ފަރާތްތަކުން ބުނެފައިވާތީ ކަމަށެވެ. ޓްރެއަލް ކުރިޔަށް ގެންދިޔުމަށް ފެހި ސިގްނަލް ލިބުމާއެކު ޓްރެއަލް އަލުން ފަށާފައިވާއިރު މި ވެކްސިނަކީ އޮކްސްފޯރޑް ޔުނިވަރސިޓީ އާ ގުޅިގެން އުފެއްދުމަށް މަސައްކަތް ކުރާ ވެކްސިނެކެވެ.

ވެކްސިން ބޭނުން ކުރުން ރައްކާތެރިކަމަށް ކަނޑައަަޅާފައިވަނީ ބްރިޓަން މެޑިސިންސް ހެލްތު ރެގިޔުލޭޓަރީ އޮތޯރިޓީން ކަމަށް އެސްޓްރަޒެނިކާ އިން ބުނެއެވެ.

މި ވެކްސިންގެ ޓްރެއަލްގައި ގޮތްނޭނގޭ ގޮތަށް ބަލިވި މީހާގެ ފުށުން ފެނިފައިވާ އަލާމާތްތަކަކީ އެ މީހާއަށް ދިމާވި ނާރުގެ މައްސަލައެއް ކަމަށް އެ ކުންފުނިން ބުނެއެވެ. އެގޮތުން މަދުން ނޫނީ ނުފެންނަ މައިބަދަ ދުޅަވުމުގެ މައްސަލަ އެ މީހާއަށް ދިމާވެފައިވާ ކަމަށާއި މިއަށްވުރެ އިތުރަށް އެމީ ހާއަށް ދިމާވި މައްސަލަ ހާމަ ކުރެވެން ނެތް ކަމަށް އެސްޓްރަޒެނިކާ އިން ވަނީ ބުނެފައެވެ.

އެސްޓްރަޒެނިކާގެ ވެކްސިން ގެ ޓްރެއަލް މެދުކަނޑާލާފައި އަލުން ފަށާފައިވާއިރު އެމެރިކާގެ ރައީސް ޑޮނަލްޑް ޓްރަމްޕް ވަނީ ނޮވެމްބަރ މަހު އޮންނަ އެ ގައުމުގެ ރިޔާސީ އިންތިޚާބުގެ ކުރިން ވެކްސިނެއް ލިބޭނެ ކަމަށް ވިދާޅުވެފައެވެ.

އެމެރިކާގެ އިތުރުން ޔޫރަޕުން ކޮވިޑް-19 އަށް ވެކްސިން އުފެއްދުމުގައި އިސްކޮށް އުޅޭ ފަރާތްތަކުން ވަނީ ވެކްސިން އުފެއްދުމުގައި ރައްކާތެރި އަދި ކަނޑައަޅާފައިވާ މިންގަނޑުތަކާއި އެއްގޮތަށް ކަންކަން ކުރިޔަށް ގެންދާނެ ކަމަށް ވައުދު ވެފައެވެ.

އެސްޓްރަޒެނިކާ އިން ވަނީ ތިން ބިލިއަން ވެކްސިންގެ ޑޯޒް އެކި ސަރުކާރުތަކަށް ދިނުމަށް މިހާރު ވެސް އެއްބަސްވެފައެވެ. އެހެން އެއްވެސް ޕްރޮޖެކްޓަކުން އެ މިންވަރަށް ވެކްސިންގެ ޑޯޒް ދިނުމަށް އަދި މިހާތަނަށް އެއްބަސްވެފައެއް ނުވެއެވެ.

ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) ގެ ޗީފް ސައިންޓިސްޓު ވިދާޅުވެފައިވަނީ ޓްރެއަލް މެދުކަނޑާލަން ޖެހުމަކީ މިކަމަށް ދުނިޔެ ހޭލައްވާލަދިން ކަމެއް ކަމަށެވެ. އަދި ވެކްސިން އުފެއްދުމުގެ މަރުހަލާގައި މިފަދަ ކަންތައްތަކާ ކުރިމަތިވާނެ ކަމަށް އޭނާ ވަނީ ވިދާޅުވެފައެވެ.

އެސްޓްރަޒެނިކާ އާއި އޮކްސްފޯރޑް ޔުނިވަރސިޓީ ގުޅިގެން ކޮވިޑް-19 އަށް އުފައްދަމުން އަންނަ ވެކްސިނަކީ މިވަގުތު އުފައްދަމުންދާ ވެކްސިންތަކުގެ ތެރެއިން އެންމެ ބޮޑަށް ކާމިޔާބުވާނެ ކަމަށް ބެލެވޭ ވެކްސިނެވެ.

އޮކްސްފޯޑުގެ ޓީމުން މީގެކުރިން ބުނެފައިވަނީ ވެކްސިން ކާމިޔާބުވާނެ ކަމުގެ 80 އިންސައްތަ ޔަގީންކަން އެބައޮތް ކަމަށެވެ.