ހުޅުމާލެ ހޮސްޕިޓަލުން ދުވާލެއްގެ މައްޗަށް 200 ޕީސީއާރް ޓެސްޓް ހެދޭނެ
ޓެސްޓުތައް ހެދުމަށްޓަކައި 07 ލެބް ޓެކްނީޝަނުން ހަރަކާތްތެރިވަމުންދާނެ
ހުޅުމާލެ ހޮސްޕިޓަލުގައި ޕީސީއާރް ޓެސްޓް ހަދަނީ
ހުޅުމާލެ ހޮސްޕިޓަލުގައި ސެޕްޓެމްބަރު 10 ވަނަ ދުވަހު ޕީސީއާރު ޓެސްޓް ހަދަން ފަށާފައިވާ ކަމަށް އެ ހޮސްޕިޓަލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އެ ހޮސްޕިޓަލުގެ މީޑިއާ ކޯޑިނޭޓަރ ހުސެއިން ޝާކިރު ވިދާޅުވީ މިހާރު ދުވާލަކު 200 ސާމްޕަލް ޓެސްޓް ކުރެވޭނެ ކަމަށެވެ. އަދި ޓެސްޓުތައް ހެދުމަށްޓަކައި 07 ލެބް ޓެކްނީޝަނުން ހަރަކާތްތެރިވަމުންދާ ކަމަށް ވެސް އޭނާ ވިދާޅުވިއެވެ.
ޝާކިރު އިތުރަށް ވިދާޅުވީ ކުރިއަތް އޮތްތާނގައި ޓެސްޓިންގ ކެޕޭސިޓީ އިތުުރު ކުރުމުގެ މަސައްކަތް އެ ހޮސްޕިޓަލުން ކުރަމުންދާނެ ކަމަށެވެ.
ހުޅުމާލެ ހޮސްޕިޓަލުގައި ޕީސީއާރް ޓެސްޓް ހަދަން ފަށާފައިވާއިރު މި މަހުގެ ތެރޭގައި މޯލްޑިވްސް ފުޑް އެންޑް ޑްރަގް އޮތޯރިޓީގައި ވެސް ޕީޕީއާރު ޓެސްޓިންގެ ޚިދުމަތް ފެށުމަށް މަސައްކަތް ކުރަމުންދާ ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީން) ވަނީ ބުނެފައެވެ.
ދާދި ފަހުން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ޑަބްލިއުއެޗްއޯގެ އެހީ އާއެކު ލިބިފައި ހުރި ޖީން އެކްސްޕާޓް ޓެސްޓް ކުރެވޭ މެޝިންތައް އިންސްޓޯލްކޮށް ޓެސްޓް ކުރުމުގެ މަސައްކަތް ވަރަށް އަވަހަށް ފެށޭނެ ކަމަށާއި މި މެޝިންތައް ބެހެއްޓުމަށް ހަމަޖެހިފައިވަނީ ގއ. ވިލިނގިލި، ފުވައްމުލައް ސިޓީ، ޅ. ނައިފަރު އަދި ށ. ފުނަދޫގައި ކަމަށެވެ.
މިވަގުތު މާލެއިން ދެކުނުގައި ޖީން އެކްސްޕާޓް ޓެސްޓް ކުރެވެނީ ލ. ގަން އަދި ގދ. ތިނަދޫގައި ކަމަށް ޑރ ނަޒްލާ ވިދާޅުވިއެވެ. އަދި އައްޑޫ ސިޓީގައި ޕީސީއާރު ޓެސްޓް ކުރެވެމުންދާކަން ޑރ. ނަޒްލާ ފާހަގަ ކުރެއްވިއެވެ.
ރާއްޖޭގައި ގިނަ ސަރަހައްދެއްގައި ޕީސީއާރް ޓެސްޓް ކުރެވޭނެ އިންތިޒާމު ސަރުކާރުން ހަމަޖައްސަމުން އަންނައިރު ސެޕްޓެމްބަރު 9 ވަނަަ ދުވަހުން ފެށިގެން ފަތުރުވެރިން ރާއްޖެ އަންނައިރު ކޮވިޑަށް ޓެސްޓު ކުރުމަށް ހަދާ ޕީސީއާރު ނެގެޓިވް ސެޓްފިކެޓު ހުށަހަޅަން ޖެހޭނެ ކަމަށް އިމިގްރޭޝަނުން ވެސް ބުނެފައެވެ.
ސަރުކާރުގެ މި ނިންމުން، މީގެކުރިން ޓޫރިޒަމް މިނިސްޓްރީން ހާމަކޮށްފައިވާއިރު، އިމިގްރޭޝަނުން ބުނީ އެއަށް އަމަލު ކުރަމުން ފަށާފައިވާ ކަމަށެވެ. އެގޮތުން ފަތުރުވެރިންނާއި ކުރު މުއްދަތަކަށް ރާއްޖެ އަންނަ މީހުން ރާއްޖެ އައުމުގެ ކުރިން ޕީސީއާރު ނެގެޓިވް ސެޓްފިކެޓު ހުށަހަޅަން ޖެހޭނެ ކަމަށާއި، އެއީ 72 ގަޑިއިރު ހަމަނުވާ ނަތީޖާއަކަށް ވާންޖެހޭނެ ކަމަށް އިމިގްރޭޝަނުން ބުންޏެވެ. އަދި އެ ސެޓްފިކެޓުގައި ޓެސްޓު ކުރި ލެބޯޓްރީގެ ނަމާއި، އެޑްރެސް، ޓެސްޓުގެ ނަތީޖާ، ޓެސްޓު ކުރި ތާރީހް، ޓެސްޓުގެ ނަތީޖާ ދޫކުރި އޮފިސަރުގެ ނަމާއި، ސޮއި ހިމަނަން ޖެހޭނެ ކަމަށް ވެސް އިމިގްރޭޝަނުން ބުންޏެވެ.
ޕީސީއާރު ނެގެޓިވް ސެޓްފިކެޓު ހުށަހަޅަން ޖެހޭނީ އިމިގްރޭޝަންގެ ޕޯޓަލް،"އިމުގަ"މެދުވެރިކޮށެވެ.
ފަތުރުވެރިންނާއި ކުރު މުއްދަތަކަށް ރާއްޖެ އަންނަ މީހުން ޕީސީއާރު ނެގެޓިވް ސެޓްފިކެޓު ހުށަހަޅަން ޖެހުނު ނަމަވެސް، ރާއްޖެއަށް ދަތުރު ކުރާ ދިވެހިންނާއި، ވާރކް ވިސާގައި ރާއްޖެއަށް އަންނަ ފަރާތްތައް، އަދި ފްލައިޓް ކުރޫއިންނާއި، އެއް އަހަރު ނުވާ ކުދިން ޕީސީއާރު ނެގެޓިވް ސެޓްފިކެޓު ހުށަހަޅަން ނުޖެހޭނެ ކަމަށް އިމިގްރޭޝަނުން ބުނެއެވެ.
އެޗް.ޕީ.އޭ އިން ވަނީ ފަތުރުވެރިންނަށް ކޮވިޑް-19ގެ ޕީ.ސީ.އާރް ޓެސްޓް ހެދޭނެ އިންތިޒާމް ހަމަޖެހިފައިވާ ހޮސްޕިޓަލްތަކާއި، އެތަންތަނުން ޓެސްޓް ހަދައިދޭ އަގުތައް މިދިޔަ އޮގަސްޓް މަހުގެ 14 ވަނަ ދުވަހު އާއްމުކޮށްފައެވެ. އެގޮތުން މާލޭ ސަރަޙައްދުގައި ހިމެނޭ 3 ހޮސްޕިޓަލަކާއި، ރާއްޖޭގެ އުތުރުން ކުޅުދުއްފުށި ސިޓީއާއި އެންމެ ދެކުނުން އައްޑޫ ސިޓީގައި ފަތުރުވެރިންނަށް ކޯވިޑް-19 އަށް ޓެސްޓް ކުރެވޭނެ އިންތިޒާމް އެޗް.ޕީ.އޭ އިން ވަނީ ހަމަޖައްސާފައެވެ.
ފަތުރުވެރިންނަށް ކޮވިޑް-19އަށް ޕީ.ސީ.އާރް ޓެސްޓް ހެދޭނެ އިންތިޒާމް 5 ތަނެއްގައި ހަމަޖައްސާފައިވާއިރު، ސަފާރީ ބޯޓުތަކުން ދަތުރު ކުރާ ފަތުރުވެރިންނަށް ޕީ.ސީ.އާރް ޓެސްޓް ހެދޭނެ އިންތިޒާމް ހުޅުމާލޭ ފެރީ ޓަރމިނަލް ހިމެނޭ ސަރަހައްދުގައި ވަނީ ހަމަޖައްސާފައެވެ.
