މަނަދޫ އިން ޕޮޒިޓިވްވި މީހާއާ ގުޅިގެން 11 މީހަކު ކަރަންޓީނަށް

ނ މަނަދޫ އިން ކޮވިޑް-19 އަށް ޕޮޒިޓިވްވި މީހާ އާ ގުޅިގެން 11 މީހަކު ކަރަންޓީނު ކުރެވިފައިވާ ކަމަށް ނ އަތޮޅު ހޮސްޕިޓަލްގެ މެނޭޖަރ އިސްމާއީލް ޝަފީގު ވިދާޅުވެއްޖެއެވެ.

ހޯމް ކަރަންޓީނުގައި ހުރި މީހަކު ކޮވިޑް-19ށް ޕޮޒިޓިވްވުމާއި ގުޅިގެން މަނަދޫ ވަނީ މޮނިޓަރިންގ ގެ ހާލަތަށް ގެނެސްފައެވެ. ހުކުރު ދުވަހުގެ އިރުއޮއްސުނުއިރު ހޯމް ކަރަންޓީނުގައި ހުރި މީހާ އަށް ރިލީޒިން ސާމްޕަލްގެ ނަތީޖާ އެންގުމަށް ގުޅިއިރު އޭނަ ގޭގައި ނެތުމުން ބެލިއިރު ހުރީ ކަނޑުމަތީގައި ފީނަން ގޮހެވެ.

Advertisement

ޝަފީގު ވިދާޅުވީ ކަރަންޓީނު ކޮށްފައިވަނީ އެމީހާ އާއެކު ދޯނީގައި ތިބި މީހުންނާއި ޑިންގީގައި ތިބި މީހުންގެ އިތުރުން ބޭރުޗތެރެއިން އެ މީހާއާ ބައްދަލުވެފައިވާ ކަމަށް އަމިއްލަ ބުނެފައިވާ މީހުން ކަމަށެވެ. އަދި މިހާރު ކޮންޓެކްޓް ޓްރޭސިންގ ގެ މަސައްކަތް އެއްކޮށް ނިމިފައިވާ ކަމަށް ޝަފީގް ވިދާޅުވި އެވެ.

ޕޮޒިޓިވްވި މީހާ އާއެކު ކަރަންޓީނު ކުރި އެއްވެސް މީހެއްގެ ފުށުން ބަލީގެ އަލާމާތެއް ނުފެންނަ ކަމަށް ޝަފީގް ވިދާޅުވި އެވެ. ކަރަންޓީނުގައި ބައެއް މީހުން މަނަދޫގެ ގެސްޓް ހައުސްތަކުގައި ތިބި އިރު އަނެއް ބަޔަކު ތިބީ އެމީހުންގެ އަމިއްލަ ގޭގައި ކަމަށް ޝަފީގް ވިދާޅުވި އެވެ.

ހޯމް ކަރަންޓީނުގައި ހުރި މީހާގެ ރިލީސިންގ ސާމްޕަލް ނަގާފައިވަނީ މިމަހުގެ 8 ވަނަ ދުވަހު އެވެ. އެމީހާގެ ނަތީޖާ ހުކުރު ދުވަހުގެ އިރުއޮއްސުނު ހާއިރު އެޗްޕީއޭއިން ލިބިގެން އެކަން އަންގަން ގުޅިއިރު އޭނާ ހޯމް ކަރަންޓީނުގައި ހުރިކަމަށް އަންގާފައިވާ ގޭގައެއް ނެތެވެ.

ޝަފީގް ވިދާޅުވީ އެމީހާ ދީފައިވާ އެޑްރެސްގައި ނެތުމުގެ ސަބަބުން އެކަން އެ ރަށުގައި ހުންނަ ޕޮލިސް ސްޓޭޝަނަށާއި ރަށު ކައުންސިލަށް އެންގި ކަމަށެވެ. އަދި އިތުރަށް އޭނާ އުޅޭ ތަނެއް ބެލިއިރު އޭނާ އުޅުނީ ލަނޑާ ނަގާ ބަޔަކާއެކު ފީނަން ގޮސް ކަމަށް ޝަފީގް ވިދާޅުވިއެވެ. ބަނދަރު ސަރަހައްދުގައި އެމީހުން ރަށަށް އަންނަންދެން ފުލުހުންނާއި ކައުންސިލުން ހަރަކާތްތެރިވެފައިވާ ކަމަށާއި މިކަން ފުލުހުން އިތުރަށް ބަލަމުންދާ ކަމަށް ޝަފީގް ވިދާޅުވިއެވެ.

ހޯމް ކަރަންޓީނުގައި ހުރި މީހާ ރަށުގެ ހޮޓާތަކަށާއި ކެފޭތަކަށް ވަދެފައިވާއިރު ސާމްޕަލް ނެގުމުގެ ކުރިން ވެސް ގެއިން ބޭރުގައި އުޅުނު ކަމުގެ މައުލޫމާތު ލިބިފައިވާ ކަމަށް ޝަފީގް ވިދާޅުވިއެވެ. އެރަށުން "ރާއްޖެ އެމްވީ" އާ ވާހަކަ ދެއްކި ބައެއް އާންމު ރައްޔިތުން ވެސް ބުނެފައިވަނީ ރަށުގެ ކެފޭތަކުން އެމީހާ ފެނިފައިވާ ކަމަށެވެ. އަދި ހުކުރު ދުވަހު ހުކުރު ނަމާދަށް ވެސް އޭނަ ދިޔަ ކަމަށް ބައެއް އާންމު ރައްޔިތުން މައުލޫމާތު ދެއެވެ.

މިކަމާއި ގުޅޭގޮތުން މައުލޫމާތު ދެއްވަމުން މަނަދޫ ކައުންސިލްގެ ރައީސް މުހައްމަދު އުމަރު ވިދާޅުވީ ޕޮޒިޓިވްވި މީހާ ހުކުރު ދުވަހު ހުކުރު ނަމާދަށް ވެސް ގޮސްފައިވާ ކަމަށެވެ.

ޕޮޒިޓިވްވި މީހާ އަކީ ނ އަތޮޅުގައި އޮންނަ ރިސޯޓެއް ކަމުގައިވާ ސޮނެވާ ޖާނީން ކުއްލި ގޮތަކަށް ރަށަށް ފޮނުވާލި މީހެއް ކަމަށް ޝަފީގް ވިދާޅުވިއެވެ. އަދި އެމީހާ ރަށަށް އައިކަން ފުރަތަމަ ކައުންސިލަށް ވެސް ނޭނގޭ ކަމަށާއި ފަހުން އެނގުމުން އޭނާ ހޯމް ކަރަންޓީނަށް ލީކަމަށް ޝަފީގް ވިދާޅުވިއެވެ. މައުލޫމާތު ލިބިފައިވާ ގޮތުގައި އެމީހާ ހޯމް ކަރަންޓީނުގައި ހުރި ގޭގައި ވިއްސަކަށް މީހުން ދިރިއުޅެއެވެ.

މަނަދޫ ވަނީ މީގެކުރިން ވެސް މޮނިޓަރިންގ އަށް ލާފައެވެ. އެގޮތުން މެއި މަހުގެ 1ން ޖޫން މަހުގެ 1ށް މަނަދޫ މޮނިޓަރިންގ ގައި ބޭއްވިއިރު އެ ފަހަރު 9 މީހަކު އެރަށުން ކޮވިޑް-19އަށް ޕޮޒިޓިވްވެފައި ވެއެވެ.