އިލެކްޝަންސް ކޮމިޝަނުން ޕީޕީއެމް/ޕީއެންސީ ޖޫރިމަނާ ކުރުމުން ބެހެއްޓި ފަންޑު ފޮށި ވަގަން ނުނަގާ ކަމަށާއި ވަރަށް ބޮޑު ތަރުހީބެއް ލިބެމުން އަންނަ ކަމަށް ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަޙްމަދު ޝިޔާމް ވިދާޅުވެއްޖެއެވެ.

ސިޔާސީ ޕާޓީތަކުގެ ގާނޫނާއި އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންއާ ހިލާފުވެގެން އިލެކްޝަން ކޮމިޝަނުން ޕީޕީއެމް/ޕީއެންސީ 150،000 ރުފިޔާއިން ޖޫރިމަނާކޮށްފައިވަނީ މިދިޔަ އޯގަސްޓް މަހުގެ 31ވަނަ ދުވަހުގައެވެ. އެ ތާރީހުން ފެށިގެން އެ ދެ ޕާޓީ ވެސް 30 ދުވަހުގެ ތެރޭގައި އީސީއަށް ފައިސާ ދައްކަން ޖެހޭއިރު ހުކުރު ދުވަހު ދެ ޕާޓީން ވަނީ ފަންޑު ފޮއްޓެއް ބަހައްޓާފައެެވެ.

މިކަމާއި ގުޅޭ ގޮތުން ރާއްޖެއެމްވީއަށް މައުލޫމާތު ދެއްވަމުން، ޝިޔާމް ވިދާޅުވީ ހުކުރު ދުވަހު ފަންޑު ފޮށި ބެހެއްޓުމާއި އެކު އާންމުންގެ ފަރާތުން ވަރަށް ބޮޑު ތަރުހީބެއް ލިބެމުންދާކަމަށެވެ. ޝިޔާމު ވިދާޅުވީ، ބޭންކް ޓްރާންސްފަރ ކުރެވޭގޮތަށް ހުޅުވާލިއިރު، ގިނަ ފަރާތްތަކުން ފަންޑު ފޮއްޓަށް ފައިސާ ޖަމާކުރާ ބީއެމްއެލް އެކައުންޓް އާދިއްތަ ދުވަހު ހުޅުވޭ ގޮތަށް ހެދުމުން ވަރަށް ގިނައިން ގުޅި ކަމަށާއި ނަމަވެސް ބީއެމްއެލް މެދުވެރިކޮށްވެސް އެހެނިހެން އެކަންޓްތަކަށް ކުރެވޭނެކަމަށެވެ. އަދި، ޕީޕީއެމް/ޕީއެންސީން ކުރަމުންދާ މަސައްކަތައް ބޮޑު ތަރުހީބެއް ލިބެމުން އަންނަ ކަން ފާހަގަކޮށް ޝިޔާމު ވިދާޅުވީ މީސް މީޑިއާގައި ފަންޑް ފޮށި ވަގަށް ނަގައިފިކަމަށް ދެކެވޭ ވާހަކަތަކަކީ ދޮގެއް ކަމަށާއި ޕާޓީ އޮފީހުގެ ކައުންޓަރުގައި ފަންޑު ފޮށި އެބަހުރި ކަމަށެވެ.

އެޗްޕީއޭގެ ގައިޑްލައިންތަކާއި އިދިކޮޅުން ހިލާފުވެފައިވަނީ ޕްރޮގްރެސިވް ކޯލިޝަނުން ''ރާއްޖެ ވިއްކާލުމުގެ'' ނަމުގައި މާލޭގައި ބޭއްވި ސައިކަލް ބުރުގައެވެ.

ގިނަ އަދަދެެއްގެ ޒުވާނުން ބައިވެރިވި އެ ސައިކަލް ބުރުގައި ގައިދުރު ކަމެއް ނެތެވެ. މި މައްސަލަ ބަލަން ފަށައި ޕީޕީއެމް/ޕީއެންސީގެ ލީޑަަރޝިޕްގެ އިސް ބޭފުޅުން ފުލުހަށް ހާޒިރުކޮށް އެޗްޕީއޭގެ ގައިޑްލައިންއާ ހިލާފުވެފައިވާތީ ޖޫރިމަނާކޮށްފައިެވެއެވެ. 1000 ރުފިޔާ އިން ޖޫރިމަނާ ކުރި ބޭފުޅުންގެ ތެރޭގައި ޕީއެންސީގެ ރައީސް އަބްދުއްރަހީމް އަބްދުﷲ، ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއުގެ އިތުރުން ޕީއެންސީގެ ނައިބް ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމްވެސް ހިމެނިވަޑައިގަންނަވައެވެ.

ގައިޑްލައިންތަކާއި ހިލާފުވެގެން ކުރީގެ ރައީސް އަދި ޕްރޮގްރެސިވް ކޯލިޝަންގެ އެޑްވައިޒަރު ޑރ. ވަހީދު ހަސަން މަނިކުވެސް ފުލުހަށް ހާޒިރުކުރިއެވެ. އިދިކޮޅުން ބުނަމުންދަނީ ފުލުހަށް ހާޒިރުކުރިޔަސް ފަހަތަށް ނުޖެހޭނެ ކަމަށާއި، ރައްޔިތުންގެ އަޑު އުފުލަމުންދާނެ ކަމަށެވެ.