ކޮވިޑް-19ގެ މަރެއްގެ ގޮތުގައި ކަނޑައަޅަނީ މައިގަނޑު ދެސަބަބަކަށް ބެލުމަށްފަހު!
12 ސެޕްޓެމްބަރު 2020 | ހޮނިހިރު 08:26ކޮވިޑް-19ގެ މަރުގެ ގޮތުގައި ކަނޑައަޅާ ވަކި މިންގަނޑުތަކެއް ހުރޭ
އައިޖީއެމްއެޗްގެ އެތެރެ ހަށީގެ ޑރ. މޫސާ މުރާދު، ހައިރިސްކް ކެޓަގަރީގެ މީހުންނަށް ޚާއްސަ ސަމާލުކަމެއް ދިނުމަށް އެދިފައިވޭ
ކޮވިޑް-19ގެ މަރެއްގެ ގޮތުގައި ކަނޑައަޅަނީ ކޮވިޑްގެ އަލާމަތްތަކުގެ ތެރެއިން ނުވަތަ ކޮވިޑްގެ ސަބަބުން ކޮންޕްލިކޭޝަންތައް މެދުވެރިގެން މަރުވުމުން ކަމަށް ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފިއެވެ.
ބުރާސްފަތި ދުވަހުގެ ރޭ އެޗްއީއޯސީން ބޭއްވީ ނޫސްވެރިންގެ ބައްދަލުވުމުގައި އައިޖީއެމްއެޗްގެ އެތެރެ ހަށީގެ ޑރ. މޫސާ މުރާދު ވިދާޅުވީ ވިދާޅުވީ ކޮވިޑް-19ގެ ބަލިމަޑުކަން ދުނިޔެއަށް ފެތުރެމުންދާއިރު މަރުވާ މީހުންގެ ނިސްބަތް ވަރަށް ގިނަ ކަމަށެވެ. އެހެންކަމުން ކޮވިޑް-19ގެ މަރުގެ ގޮތުގައި ކަނޑައަޅާ ވަކި މިންގަނޑުތަކެއް ހުންނަ ކަމަށް ޑރ. މުރާދު ވިދާޅުވިއެވެ.
ޑރ. މުރާދު ވިދާޅުވީ ކޮވިޑް-19ގެ މަރުގެ ގޮތުގައި ކަނޑައަޅާނީ މައިގަނޑު ދެސަބަބަކަށް ބެލުމަށްފަހު ކަމަށެވެ. އެއީ ކޮވިޑަށް ޕޮޒިޓިވްވެ އެކަމަށް ފަރުވާ ހޯދަމުން ދަނިކޮށް ކޮންޕްލިކޭޝަންތައް މެދުވެރިވެގެން މަރުވާ މީހުންނާއި، ކުރިންސުރެ އެކިކަހަލަ ބަލިތަކެއް ހުންނަ މީހުންގެ ބައްޔަށް ޕޮޒިޓިވްވެ އެމައްސަލަތައް ބޮޑުވެގެން ގޮސް އެމައްސަލަތަކުގެ ތެރެއިން އަންނަ ކޮމްޕްލިކޭޝަނެއްގެ ތެރޭގައި މަރުވާ މީހުން ކަމަށް ޑރ. މުރާދު ވިދާޅުވިއެވެ.
ޑރ. މުރާދު ވިދާޅުވީ އެކްސިޑެންޓެއް ވެގެން ގެންނަ ކޮވިޑް-19ށް ޕޮޒިޓިވްވި އެފަދަ މަރުތައް ކޮވިޑްގެ މަރުގެ ގޮތުގައި ކަނޑަނާޅާނެ ކަމަށެވެ.
ރާއްޖެއިން ކޮވިޑް-19ށް ޕޮޒިޓިވްވާ މީހުންގެ ނިސްބަތް އިތުރުވެފައިވާއިރު، މިހާތަނަށް މިބަލީގައި 31 މީހަކު ވަނީ މަރުވެފައެވެ. މީގެ ތެރޭގައި ގިނައީ އުމުރުން ދުވަސްވީ މީހުންނެވެ.
