ކުރީގެ ދިރިއުޅުމަށް ރުޖޫއަވެވޭނެ ކަމަށް ބެލެވެނީ އަންނަ އަހަރު: ފައުޗީ
12 ސެޕްޓެމްބަރު 2020 | ހޮނިހިރު 02:57އެމެރިކާއިންވެސް އަންނަނީ އެތައް ވެކްސިންއެއް ޓެސްޓުކުރަމުން
ޑރ. އެންތަނީ ފައުޗީ
ކޮވިޑް-19ގެ ކުރިން އުޅުނު ދިރިއުޅުމަށް ރުޖޫއަވެވޭނެ ކަމަށް ބެލެވެނީ އަންނަ އަހަރުގެ ފަހުކޮޅު ކަމަށް އެމެރިކާގެ މަޝްހޫރު ޑރ. އެންތަނީ ފައުޗީ ވިދާޅުވެއްޖެއެވެ.
ހުކުރު ދުވަހު އޭނާ ބޭރުގެ މީޑިއާއަކަށް ދެއްވި އިންޓަރވިއުއެއްގައި ވިދާޅުވެފައިވަނީ ކޮވިޑުގެ ކުރިން އުޅުނު ދިރިއުޅުމަށް ރުޖޫއަވެވޭނެ ކަމަށް ބެލެވެނީ 2021 ވަނަ އަހަރުގެ ފަހުކޮޅު ކަމަށެވެ.
ދުނިޔޭގެ އެކި ގައުމުތަކުން މި ވައިރަހަށް ވެކްސިންއެއް ހޯދުމަށް މަސައްކަތް ކުރަމުން އަންނަ އިރު، އެމެރިކާއިންވެސް އަންނަނީ އެތައް ވެކްސިންއެއް ޓެސްޓުކުރަމުންނެވެ.
މިކަމަށް އަލި އަޅުވާލައްވާ ފައުޗީ ވިދާޅުވީ ކޮވިޑަށް ޓެސްޓުކުރަމުންދާ ވެކްސިންތަކުގެ ތެރެއިން ވެކްސިންއަކަށް ޔޫއެސް ފުޑް އެންޑް ޑްރަގް އެޑްމިނިސްޓްރޭޝަންގެ އިމަރޖެންސީ އޮތޮރައިޒޭޝަން އަންނަ އަހަރުގެ ކުރީ ކޮޅު ލިބުމަކީ އެކަށިގެންވާކަމެއް ކަމަށެވެ. އެހެންނަމަވެސް، މި ވެކްސިން އެންމެންނަށް ނުލިބިދާނެ ކަމަށް އޭނާ ވިދާޅުވިއެވެ.
އެހެންނަމަވެސް، ވެކްސިންއެއް ޑިސްޓްރިބިއުޓް ކުރަން ފެށުމަށް ފަހު އާބާދީގެ ބޮޑުބަޔަކަށް ވެކްސިން ދީ، ބަލިން ރައްކާތެރިކުރެވޭވަރު ވާނެ ކަމަށް ބެލެވެނީ އަންނަ އަހަރުގެ މެދު ތެރޭގައި ނުވަތަ، އަހަރުގެ ފަހުކޮޅުގައި ކަމަށް އޭނާ ވިދާޅުވިއެވެ.
މީގެއިތުރުން އޭނާ ވިދާޅުވީ މި ބަލި ފެތުރޭ މިންވަރު ކުޑަކުރުމަށް އާއްމުން ފަރުދީ ޒިންމާ އަދާކުރަމުން ނުދާ ކަމަށެވެ. ބަލި ކޮންޓްރޯލް ކުރެވޭނީ ދިރިއުޅުމުގެ ވައްޓަފާޅިއަށް ވަރަށް ބޮޑެތި ބަދަލުތަކެއް ގެނެސްގެން ކަން ފާހަގަކުރައްވާ ފައުޗީ ވިދާޅުވީ އެމެރިކާގެ ރައްޔިތުންގެ ފަރާތުން ފެންނަނީ އެންމެ އެދެވޭ މަންޒަރެއް ނޫން ކަމަށެވެ.
