އިންޑިޔާގެ އެންމެ ބޮޑު އަދި އެންމެ މުއްސަނދި ސްޓޭޓްކަމުގައިވާ މަހަރަޝްތްރަ ސްޓޭޓުން ކޮވިޑް-19 އަށް އެއް މިލިއަން ވަނަ މީހާ ހުކުރު ދުވަހު ޕޮޒިޓިވްވެއްޖެ އެވެ.
ދުނިޔޭގައި ހަތަރު ވަނަ އަށް އެންމެ ގިނަ މީހުން ކޮވިޑް-19 އަށް ޕޮޒިޓިވްވެގެން ރިޕޯޓްކުރަމުން އަންނަ ރަޝިޔާގައިވެސް ވައިރަސް ޖެހިފައިވަނީ އެއް މިލިއަން މީހުންނަށެވެ. މަހަރަޝްތްރަ ސްޓޭޓަކީ ގައުމެއް ކަމުގައިވާނަމަ އެސްޓޭޓް މިހާރު ރިޕޯޓްކުރަމުން އަންނާނީ ރަޝިޔާއަށް ވުރެ މަތިން ކޭސްތައް ފެންނަ ގައުމެއްގެ ގޮތުގައެވެ.
އިންޑިޔާގެ ވިޔަފާރީގެ މައި މަރުކަޒު ކަމުގައިވާ މުމްބާއީ ހިމެނޭ މަހަރަޝްތްރަ ސްޓޭޓުން އެއް މިލިއަން މީހުންނަށް ވައިރަސް ޖެހިގެން ރިޕޯޓްކުރަމުން އަންނަ އިރު ދުވާލެއްގެ މައްޗަށް އެ ސްޓޭޓުން 20،000ށް ވުރެ ގިނަ މީހުންނަށް ވައިރަސް ޖެހިގެން އަންނަނީ ރިޕޯޓްކުރަމުންނެވެ.
130 މިލިއަން މީހުންގެ އާބާދީއެއް އޮންނަ މަހަރަޝްތްރަ ސްޓޭޓަށް ސަރޖެއް އައިސްފައިވާއިރު މުޅި އިންޑިޔާގައި ކޮވިޑް-19 ޖެހިފައިވާ މީހުންގެ ހަތަރު ބައި ކުޅަ އެއް ބައި ހިއްސާ ކުރަނީ އެސްޓޭޓުންނެވެ. އިންޑިޔާގައި މިހާރުވެސް 4.6 މިލިއަން މީހުންނަށް ކޮވިޑް-19 ޖެހިފައިވާއިރު ކުރިޔަށް އޮތް މަދު ދުވަސްތަކުގައި އެގައުމުގައި ވައިރަސް ޖެހޭ މީހުންގެ އަދަދު 5 މިލިއަނަށް އަރާނެކަމަށް ވަނީ ބެލެވިފައެވެ.
އިންޑިޔާގައި ވައިރަސް ފެތުރޭ މިންވަރު ކޮންޓްރޯލްކުރުމަށް ގޮންޖެހުންތަކެއް ކުރިމަތިވަމުންދާއިރު އިންޑިޔާގެ ބޮޑުވަޒީރު ނަރެންދްރަ މޯދީ ގެންދަވަނީ އެގައުމުގެ އިގްތިޞާދު ހުޅުވާލުމަށް މަސައްކަތް ކުރައްވަމުންނެވެ. އިންޑިޔާގެ އިގްތިޞާދު ވަނީ މިދިޔަ އަހަރުގެ ދެ ވަނަ ކުއަރޓަރ އާ އަޅާބަލާއިރު 23.9 އިންސައްތަ މިއަހަރުގެ ދެ ވަނަ ކުއަރޓަރ ގައި ދަށަށްގޮސްފައެވެ.
މަހަރަޝްތްރަ އަކީ އިންޑިޔާގެ ޖީޑީޕީގެ 15 އިންސައްތަ ހިއްސާކުރާ ސްޓޭޓެކެވެ. އެހެންކަމުން އިންޑިޔާގެ އިގްތިޞާދު އަލުން ކޮޅަށް ޖެހުމަށް މަހަރަޝްތްރަ ސްޓޭޓުގައި ވައިރަސް ފެތުރޭ މިންވަރު ކޮންޓްރޯލް ކުރުމަކީ ކޮންމެހެންވެސް ކުރަން ޖެހޭ ކަމެއް ކަމަށް ތިންކް ޓޭންކެއް ކަމުގައިވާ އައިޑީއެފްސީ އިންސްޓިޓިއުޓްގެ ހެޑް ރޫބެން އަބްރަހަމް ވިދާޅުވި އެވެ.
އިންޑިޔާގެ އެހެން ހިސާބުތަކުގެ ވިޔަފާރިތައް ހުޅުވާލާ އާންމު ހާލަތަށް ރުޖޫއުވުމަށް މަސައްކަތް ކުރަމުންދާއިރު މަހަރަޝްތްރަ ސްޓޭޓްގެ ގިނަ ވިޔަފާރިތަކަކާއި ޕަބްލިކް ޓްރާންސްޕޯޓްގެ ކަންކަން އާންމު ހާލަތަށް އަދި ނާދެއެވެ. މޯލްތަކާއި ވިޔަފާރިތަކާއި ޕަބްލިކް ޓްރާންސްޕޯޓް ހުޅުވާލާފައިވަނީ ރައްކާތެރިކަމުގެ ގިނަ ފިޔަވަޅުތަކާއެކު އެވެ.
މިހާލަތު އަވަސް މުސްތަގްބަލެއްގައި ބަދަލުވެގެން ނުދާނެ ކަމަށްވެސް މާހިރުން ބުނެއެވެ. މަހާރަޝްތްރަ އަކީ އިންޑިޔާގެ އެންމެ ބޮޑެތި އިންޑަސްޓްރީތައް ހިންގަމުން އަންނަ މައިތަންވެސް މެއެވެ. އޭގެ ތެރޭގައި ޓާޓާ ކޮންޒަލްޓަންސީ އާއި ރެލިއަންސް އިންޑަސްޓްރީގެ އިތުރުން އެޗްޑީއެފްސީ ބޭންކް ހިމެނެ އެވެ.
އިންޑިޔާގެ ގިނަ ސިޓީތަކެއްގައި ރެއިލްވޭގެ ދަތުރުތައް ފަށާފައިވާއިރު މަހަރަޝްތްރަ ސްޓޭޓްގައި އަދިވެސް ދަތުރުތައް ނުފަށައެވެ. މާރޗް މަހުން ފެށިގެން އެސްޓޭޓްގައި ޓްރެއިން ދަތުރުތައް ވަނީ މެދުކަނޑާލާފައެވެ.
މުމްބާއީގައި ޕަބްލިކް ޓްރާންސްޕޯޓް އަލުން ފަށައިފިނަމަ ދެ ވަނަ ވޭވެއް އަތުވެދާނެ ކަމަށާއި އެއާއެކު ވައިރަސް ފެތުރުން ކޮންޓްރޯލް ކުރުމަށް ދަތިތަކެއް ދިމާވާނެކަމަށް ދިރާސާކުރާ ފަރާތްތަކުން ވަނީ ބުނެފައެވެ.
އެހެންނަމަވެސް މަހަރަޝްތްރައިގެ ބައެއް ހުޅުވާލާ ފެކްޓްރީތަކުގެ މަސައްކަތްތައް ފާއިތުވި މަސްތަކުގައި ވަނީ އަލުން ފަށާފައެވެ. އެއާއެކު އެ ސްޓޭޓުން ސަރޖެއް ފެނިގެން ގޮސްފައިވާއިރު އެއީ އާންމު ހާލަތަށް ގެނައުމަށް ކުރަމުންދާ މަސައްކަތުގެ ސަބަބުން ކަމަށް އިންޑިޔާގެ ސިއްހީ އޮފިޝަލުން ބުނެއެވެ.
މަހަރަޝްތްރަ ސްޓޭޓް ހުޅުވާލުމަށް އެންމެ ފުރަތަމަ ފަށާފައިވަނީ ޖުލައި މަހުގެ ކުރީކޮޅުއެވެ. އެއާއެކު މަޑުމަޑުން މީހުން މަދުން އުޅޭ ހިސާބުތަކަށް ވައިރަސް ފެތުރެން ފެށިއެވެ. އޮގަސްޓް މަހުގެ މެދެއްހާ ހިސާބުގައި އެއްވެސް މީހަކު ވައިރަސް އަށް ޕޮޒިޓިވްވެގެން ރިޕޯޓްކޮށްފައިނުވާ ވިލެޖް ތަކުން މިހާރު ހަދަމުންދާ ކޮންމެ ހަތަރު ޓެސްޓަކުން އެއް ޓެސްޓެއް އަންނަނީ ވައިރަސް އަށް ޕޮޒިޓިވްވަމުންނެވެ.
މީގެއިތުރުން މަހަރަޝްތްރަ ސްޓޭޓުގައި ކޭސްތައް އިތުރުވާން ދިމާވި އަނެއް ސަބަބަކީ މިދިޔަ މަހު ކުރިޔަށްދިޔަ ހިންދީ ދީނުގެ ފެސްޓިވަލެއް ކަމަށް ރިޕޯޓްތައް ބުނެއެވެ. 11 ދުވަހުގެ މުއްދަތަށް ކުރިޔަށްދިޔަ އެ ފެސްޓިވަލްގައި މުމްބާއީގެ އެތައްހާސް ބަޔަކު އެއްތަނުން އަނެއްތަނަށް ދަތުރުކޮށްފައިވެ އެވެ.
ކޮވިޑް-19 ޖެހިގެން މަރުވާ މީހުންގެ އަދަދުވެސް މަހަރަޝްތްރައިގައި ނިސްބަތުން ގިނައެވެ. އެގޮތުން އެސްޓޭޓުން ޕޮޒިޓިވްވެގެން ރިޕޯޓްކޮށްފައިވާ މީހުންގެ 2.85 އިންސައްތަ މީހުން ވަނީ މިބަލީގައި މަރުވެފައެވެ. އެއީ މުޅި އިންޑިޔާގައިވެސް މިބަލީގައި މީހުން މަރުވަމުންދާ ރޭޓަށް ވުރެ މަތީ އަދަދެކެވެ. މުޅި އިންޑިޔާގައި މިބަލީގައި މީހުން މަރުވާ ރޭޓް އުޅެނީ 1.68 އިންސައްތައިގަ އެވެ. މަހަރަޝްތްރަ އިން އެކަނި 28،000ށް ވުރެ ގިނަ މީހުން ވައިރަސް ޖެހިގެން މަރުވެފައިވާއިރު އެއީ މުޅި އިންޑިޔާއިން މިބަލީގައި މަރުވި މީހުންގެ 37 އިންސައްތަ އެވެ.
އެހެންނަމަވެސް މަހަރަޝްތްރަ ސްޓޭޓްގެ ހެލްތު މިނިސްޓަރ ރާޖޭޝް ތޯޕޭ ވަނީ އެސްޓޭޓުން ގިނަ ބަޔަކު ޕޮޒިޓިވްވެގެން ރިޕޯޓްކުރަނީ އެސްޓޭޓްގައި ޓެސްޓް ކުރެވޭ މިންވަރު އިތުރުވެފައި މިކަމުގައި ދެ ފުށް ފެންނަ ސިޔާސަތެއް ގެންގުޅޭތީ ކަމަށް ވިދާޅުވެފައެވެ. ކޭސްތައް މަތިވަމުންދިޔަޔަސް ދުވަހަކުވެސް ކޭސްތައް ފެންނަ މިންވަރު ފޮރުވަން މަސައްކަތްނުކުރާ ކަމަށް ހެލްތު މިނިސްޓަރ ވިދާޅުވި އެވެ.