ކުޑަކުއްޖަކު ރޭޕް ކުރުމުގެ ކުށް ސާބިތުވެ، އިންޑިޔާގެ ފާދިރާއަކު 20 އަހަރަށް ޖަލަށް
18 ފެބުރުއަރީ 2019 | ހޯމަ 04:55އަންހެން ކުއްޖާ ރޭޕްކުރިކަން އެނގުނީ އެ ކުއްޖާ ވިހެއި ފަހުން
ރޭޕްގެ ކުށް ސާބިތުވީ ފާދިރީ ރޮބިން ވަޑައްކުމްޗަރީ
އިންޑިއާގެ ފާދިރީއަކަށް 16 އަހަރުގެ އަންހެން ކުއްޖަކު ރޭޕްކުރުމުގެ ކުށް ސާބިތުވުމާއި ގުޅިގެން، އޭނާ 20 އަހަރަށް ޖަލަށް ލާން އެ ގައުމުގެ ކޯޓަކުން ހުކުމް ކޮށްފިއެވެ.
ކެރެލާގައި ހިނގި ހާދިސާގައި، އަންހެން ކުއްޖާ ރޭޕްކުރިކަން އެނގުނީ އެ ކުއްޖާ ވިހެއި ފަހުންނެވެ. ރޮބިން ވަޑައްކުމްޗަރީ ނަމަކަށް ކިޔާ ފާދިރީގެ އަމަލުތައް ފޮރުވަން އުޅުމާއި ގުޅިގެން އެ ފައްޅީގައި މަސައްކަތް ކުރާ 4 އަންހެނުންނަށާއި، އިތުރު ފާދިރީއަކާއި ޔަތީމު ހާނާގައި މަސައްކަތް ކުރާ މީހައްގެ މައްޗަށް ދައުވާ އުފުލާފައިވެއެވެ. ނަމަވެސް އެކަށީގެންވާ ވަރަށް ހެކި ނުލިބުމާއި ގުޅިގެން އެ މީހުންގެ މައްޗަށް ކުށް ސާބިތުނުވާ ކަމަށް ވަނީ ކަނޑައަޅާފައެވެ.
ވަޑައްކުމްޗަރީ ހައްޔަރު ކޮށްފައިވަނީ ކެނެޑާއަށް ފުރަން ވެގެން، ކޮޗިން އެއަރޕޯޓުގައި ހުއްޓައެވެ. އޭނާ ހައްޔަރު ކުރި ހިސާބުން މައްސަލައިގެ ހެކިބަސް ދޭން ތިބި ފަރާތްތަކުން ވަނީ ހެކިބަސް ދޭން ދެކޮޅު ހަދާފައެވެ. އެ ހިސާބުން މައްސަލަ ސާބިތު ކުރީ ވަރަށް އުނދަގުލުން ކަމަށް، އެ މައްސަލައިގެ ތަހުގީގުގައި އިސްކޮށް އުޅުނު އިންސްޕެކްޓަރު ސުނިލް ކުމާރް ވަނީ ބުނެފައެވެ.
ނުފޫޒު ގަދަ ފާދިރީ ސަލާމަތް ކުރުމަށްޓަކައި އަންހެން ކުއްޖާގެ ބައްޕަ ވެސް ވަނީ އެ ކުއްޖާ ރޭޕް ކުރީ ތިމަންނާ ކަމަށް ބުނެފައެވެ. މީގެ އިތުރުން އެ ކުއްޖާއަކީ 18 އަހަރު ފުރިފައިވާ ކުއްޖެއް ކަމަށް އެ ކުއްޖާގެ މަންމަ ވަނީ ބުނެފައެވެ. އަދި އެ އަންހެން ކުއްޖާ ވެސް ވަނީ އެއީ އޭނާގެ "ރުހުމުގައި" ހިނގި ކަމެއް ކަމަށް ކޯޓުގައި ބުނެފައެވެ.
އިންޑިއާގައި 18 އަހަރު ނުފުރޭ ކުޑަކުދިންނާއި އެކު، އެ ކުއްޖާގެ ރުހުމުގައި ވިޔަސް ނުރުހުމުގައި ވިޔަސް ޖިންސީ ގުޅުން ހިންގުމަކީ ރޭޕްކަމަށް ވަނީ ކަނޑައަޅާފައެވެ.
