އޮޅުވާލައިގެން ޕާޓީތަކަށް މީހުން ވެއްދުން ހުއްޓުވާނަން: އީސީ
ދާއިމީ ހައްލެއް އަދި މިހާތަނަށް ނުލިބޭ
އީސީގެ އޮފިޝަލަކު ވޯޓުލަން ދިޔަ މީހަކަށް ކިޔޫ ނަންބަރު ދޫކުރަނީ
ދިމާވެފައިވާ އެންމެ ބޮޑު އެއް ގޮންޖެހުމަކީ އޮޅުވާލައިގެން މީހުން ޕާޓީތަކަށް ވައްދާ މައްސަލަ ކަމަށާއި، އެ ކަމަށް ދާއިމީ ހައްލެއް ގެންނާނެ ކަމަށް އިލެކްޝަން ކޮމިޝަން (އީސީ) އިން ބުނެފިއެވެ.
''ރާއްޖެ.އެމްވީ'' އަށް ދެއްވި ހާއްސަ އިންޓަވިއުއެއްގައި އީސީގެ ނައިބް ރައީސް އަހުމަދު އަކްރަމް ވިދާޅުވީ، އޮޅުވާލައިގެންނާއި ސައްހަ ނޫން ގޮތްތަކަށް ޕާޓީތަކަށް މީހުން ވެއްދުން އެއީ ވަރަށް ހަލުވި މިނެއްގައި އެކި ފަރާތްތަކުން ކުރަމުންދާ ކަމެއް ކަމަށެވެ.
އަކްރަމް ވިދާޅުވީ، ޕާޓީ އަށް ވަންނަން އެދޭ ފޯމް ހުށަނާޅާ ހިނދަކު އީސީން އެއްވެސް މީހަކު ޕާޓީގެ މެމްބަރެއްގެ ގޮތުގައި ރަޖިސްޓްރީ ނުކުރާނެ ކަމަށެވެ.
އަކްރަމް ވިދާޅުވާ ގޮތުގައި އެކަމުގެ ހައްލު އޮތީ ސިޔާސީ ޕާޓީތަކުގެ ގާނޫނަށް އީސީން ގެންނަން ބޭނުންވާ އިސްލާހުތަކުގައެވެ. އެ އިސްލާހުތައް ރައްޔިތުންގެ މަޖިލީހުން ފާސްވެގެން ދިޔުމުން ރަޖިސްޓްރޭޝަން ކަންތައްތަކަށް ހައްލުތަކެއް ލިބިގެންދާނެ ކަމަށް އީސީގެ ނައިބް ވިދާޅުވިއެވެ.
2005 ވަނަ އަހަރު ރާއްޖޭގައި ސިޔާސީ ޕާޓީތައް އުފައްދާ ހިންގަން ފެށިތާ މިވީ ފަނަރަ އަހަރު ދުވަހުގެ ތެރޭގައި ސައްހަ ނޫން ފޯމް ހުށައަޅައިގެން މީހުން ޕާޓީތަކަށް ވެއްދުމަކީ އާއްމު ކަމެކެވެ.
ސައްހަ ނޫން ފޯމްތަައް ހުށައަޅައިގެން ސިޔާސީ ޕާޓީތަކަށް މީހުން ވެއްދުން ހުއްޓުވުމަށްޓަކައި ފިންގަ ޕްރިންޓް ޖަހަން މަޖުބޫރު ކުރުމުން ވެސް އެކަމަށް ހައްލެއް އަދި ނުލިބެއެވެ.
މި މައްސަލާގައި އީސީއާ ދެކޮޅަށް އެކި ފަރާތްތަކުން ކޯޓަށް މައްސަލަ ވެސް ހުށައަޅައިފައިވެއެވެ. ނަމަވެސް އަދި މިހާތަނަށް މި މައްސަލަ އަށް ދާއިމީ ހައްލެއް ހޯދިފައެއް ނުވެއެވެ.
