ފުރަތަމަ މެޗުގައި އަލަށް ޕްރޮމޯޓްވި ލެންސް އަތުން ޕީއެސްޖީ ބަލިވެއްޖެ

ފްރެންޗް ލީގުގައި އެންމެ ފަހުގެ ޗެމްޕިއަން ޕީއެސްޖީން ކުޅުނު ފުރަތަމަ މެޗުގައި އަލަށް ޕްރޮމޯޓްވި ލެންސް އަތުން ބަލިވެއްޖެއެވެ.

މިދިޔަ އޮގަސްޓް މަހުގެ 21 ވަނަ ދުވަހު ފްރެންޗް ލީގުގެ ކުޅުން ފަށާފައިވާއިރު، ލެންސް އާއި ޕީއެސްޖީ ބައްދަލުކުރި މެޗަކީ މީގެ ކުރިން މިދިޔަ މަހުގެ 24 ވަނަ ދުވަހު ކުޅެން ތާވަލުކޮށްފައި އޮތް މެޗެކެވެ. އެކަމަކު މި މެޗު ފަސްކުރީ މިދިޔަ މަހުގެ ފަހުކޮޅު އޮތް ޔުއެފާ ޗެމްޕިއަންސް ލީގުގެ ފައިނަލްގައި ޕީއެސްޖީ ވާދަކުރުމުންނެވެ.

ލީގުގައި ބުރާސްފަތި ދުވަހަގުރޭ ޕީއެސްޖީ ކުޅުނު ފުރަތަމަ މެޗުން އެޓީމު ބަލިވިއިރު، މި މެޗުގައި އެޓީމުގެ މުހިންމު ގިނަ ކުޅުންތެރިންތަކެއް ނުކުޅެއެވެ. އެއީ ދާދި ފަހުން ޕީއެސްޖީގެ ހަތް ކުޅުންތެރިއަކު ކޮވިޑް-19 އަށް ޕޮޒިޓިވްވުމާ ގުޅިގެންނެވެ.

ސްޕެއިންގެ ރަށެއް ކަމުގައިވާ އިބްޒާއަށް ޗުއްޓީ ހޭދަކުރަން ގޮސް އުޅެނިކޮށް ޕީއެސްޖީގެ ތަރި ނޭމާ އާއި، ފޯވާޑް އެންހެލް ޑި މަރިއާ އާއި، މިޑްފީލްޑަރު ލެއަންޑްރޯ ޕަރެޑެސް އާއި، ގޯލްކީޕަރު ކޭލޯ ނަވާސް އާއި، ފޯވާޑް މައުރޯ އިކާޑީީގެ އިތުރުން ޑިފެންޑަރު މާކީނިއޯސް ވަނީ ކޮވިޑް-19 އަށް ޕޮޒިޓިވް ވެފައެވެ. އަދި އޭގެ ފަހުން ފްރާންސްގެ ގައުމީ ފުޓްބޯޅަ ޓީމަށް ނަގާފައިވަނިކޮށް ކީލިއަން އެމްބާޕޭވެސް ވަނީ ކޮވިޑް-19 އަށް ޕޮޒިޓިވް ވެފައެވެ.

އެއާއެކުވެސް ބުރާސްފަތި ދުވަހުގެރޭ ޕީއެސްޖީން މެޗު ކުޅުނުއިރު، މި މެޗުން އެޓީމު ބަލިވީ 1-0 ގެ ނަތީޖާއަކުންނެވެ. ލެންސްގެ ދަނޑުގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފު ފަށައިގެން 12 ވަނަ މިނެޓުގައި ލެންސަށް ކާމިޔާބުކޮށްދިނީ އިގްނަޝިއަސް ގަނަގޯއެވެ.

ލީގުގައި ކުޅުނު ފުރަތަމަ މެޗުން ޕީއެސްޖީ ބަލިވިއިރު، ލީގުގައި ދެން ޕީއެސްޖީން މެޗެއް ކުޅޭނީ އަންނަ އާދީއްތަ ދުވަހުގެރޭއެވެ. އެރޭ ޕީއެސްޖީ ނުކުންނާނީ މާސޭއާ ދެކޮޅަށެވެ.