މާސްކުނާޅާ ބޭރުގައި އުޅުނު 550 މީހަކު ޖޫރިމަނާ ކޮށްފި
އޮގަސްޓު 22 އަދި ސެޕްޓެމްބަރު 4 އާއި ދެމެދު މާސްކު ނާޅާއުޅުމުގެ ސަބަބުން 550 މީހަކު ޖޫރިމަނާ ކޮއްފައިވޭ
މާލޭ މަގުމަތީގައި ޕޮލިހުން ސައިކަލުތައް ހުއްޓުވަނީ
މާސްކުނާޅާ ބޭރުގައި އުޅުނު 550 މީހަކު ޖޫރިމަނާ ކޮށްފިއެވެ.
ފުލުހުން ބުނީ އޮގަސްޓު 22ން ސެޕްޓެމްބަރު 4ށް މާސްކު ނާޅާ އުޅުމުގެ ސަބަބުން މިހާތަނަށް 550 މީހަކު ޖޫރިމަނާ ކޮށްފައިވާ ކަމަށެވެ. އަދި 1143 މީހަކަށް ނަސޭހަތްދީ ދޫކޮށްލާފައިވާ ކަމަށް ވެސް ފުލުހުން ބުންޏެވެ.
ކޮވިޑް-19 ޖެހޭ މީހުންގެ އަދަދުތައް މައްޗަށްދާން ފެށުމުން އެކަން ކޮންޓްރޯލް ކުރުމަށްޓަކައި އެޗްޕީއޭއިން ވަނީ އާންމުން ބޭރުގައި އުޅޭއިރު މާސްކު އެޅުމަށް މަޖުބޫރު ކޮށްފައެވެ. އަދި މާސްކު ނާޅާ އުޅޭ މީހުން 1000 ރުފިޔާ އިން ޖޫރިމަނާ ކުރާ ގޮތަށް ހަމަޖައްސާ، އަމަލުކުރަން ފަށާފައިވަނީ އޮގަސްޓް މަހުގެ 1 ވަނަ ދުވަހުން ފެށިގެންނެވެ.
މާސްކުއެޅުން މަޖުބޫރު ކޮށްފައިވާއިރު އެކަމުން އިސްތިސްނާ ވަނީ ދެ އަހަރުން ދަށުގެ ކުޑަކުދިންނާއި، ކަސްރަތުކުރަން ނުކުންނަ މީހުން ކަސްރަތު ކުރާ ވަގުތުގައެވެ. މީގެ އިތުރުން އެހެން މީހެއްގެ އެހީގައި މާސްކު އަޅާ މީހުންނާއި ރެސްޓޯރެންޓްތަކުން ޚިދުމަތް ހޯދަން މީހުން މާސްކު އެޅުމުން އިސްތިސްނާ ވާނެ ކަމަށް އެޗްޕީއޭ އިން ބުންޏެވެ.
ކޮވިޑް-19 ޖެހޭ މީހުންގެ އަދަދު މި ފާއިތުވި ދެތިން ދުވަސް ތެރޭގައި އުޅެނީ 100ށްވުރެ ދަށުގައެވެ. ނަމަވެސް ޑރ. ނަޒްލާ ވިދާޅުވީ އަދަދުތައް ދަށްވެފައި ވީނަމަވެސް ރައްކާތެރިކަމުގެ ފިޔަވަޅުތައް އެޅުމުގައި އެއްވެސް އާންމު ރައްޔިތަކު ފަރުވާ ކުޑަކޮށްގެން ނުވާނެ ކަމަށެވެ.
