ޤައުމު ވިއްކާލުމާ މުއިއްޒު ދެކޮޅު، ނަމަވެސް މިހާރުވެސް 2 ރަށެއް ދިވެހިންނަށް ގެއްލިދާނެ ކަމުގެ ބިރުހީވެފައި!

ކުރީގެ ހައުސިންގ މިނިސްޓަރުކަން ކުރެއްވި ޑރ މުޙައްމަދު މުއިއްޒު ރާއްޖޭގެ 2 ރަށެއްގެ ޓައިޓެލް އެއްބަސްވުމާއި ޚިލާފަށް ބޭރުގެ ބަޔަކަށްދީ، އޮޅުވާލާފައިވާކަމުގެ މައުލޫމާތު ރާއްޖެއެމްވީއަށް ލިބިއްޖެއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި، ހއ އަދި ހދ އަތޮޅުގެ ރަށްތައް ހިމެނޭގޮތަށް 500 ހައުސިން ޔުނިޓް އެޅުމަށް ބޭރުގެ ކުންފުންޏަކާ ސަރުކާރުން ހަވާލުކޮށް އެ މަސައްކަތްތުގެ ބަދަލެއްގެ ގޮތުގައި ހއ. ދައްޕަރު ދިނުމަށް އެއްބަސްވުމެއްގައި ސޮއިކޮށްފައިވެއެވެ. އެ އެއްބަސްވުމުގައި ވާގޮތުން ކޮންމެ 10 ހައުސިން ޔުނިޓަކަށް 1 ޓުއަރިސްޓް ވިލާ ދައްޕަރުގައި ތަރަށްޤީ ކުރުމުގެ ހުއްދަ އެކުންފުންޏަށް ލިބިގެންދާއިރު، އެއްބަސްވުން ނިމުމުން ޖުމުލަ 50 ގެސްޓް ވިލާ އެޅުމުގެ ހުއްދަ ކުންފުންޏަށް ލިބިގެންދެއެވެ.

މި އެއްބަސްވުމުގެ ދަށުން ހައުސިންގ ޔުނިޓް އެޅުމަށް ހަވާލު ކޮށްފައިވާ ރަށްތަކަކީ ހދ ހަނިމާދޫ، ހދ ނޮޅިވަރަންފަރު، ހއ ދިއްދޫ އަދި ހދކުޅުދުއްފުއްޓެވެ. އެހެން ނަމަވެސް، މި އެއްބަސްވުމުގެ ދަށުން ޙަވާލުކުރި ހައުސިންގ ޔުނިޓުތަކުގެ މަސައްކަތްތައް ނިންމާފައެއް ނުވެއެވެ.

ހަމައެގޮތަށް ޅ ދިއްފުށިމާދޫވެސް ޙަވާލު ކޮށްފައިވަނީ 1000 ހައުސިންގ ޔުނިޓު އަޅާ ނިމުމުން ބަދަލެއްގެ ގޮތުން 100 ގެސްޓްވިލާ ތަރައްޤީ ކުރުމަށް ހުއްދަދޭ ގޮތަށެވެ. އެގޮތުން މި އެއްބަސްވުމުގައި ސޮއި ކޮށްފައިވަނީ 2013 ވަނަ އަހަރުއެވެ.

ރާއްޖެއެމްވީއަށް އެނގިފައިވާ ގޮތުގައި މި އެއްބަސްވުމުގެ ދަށުން ފުރަތަމަ ދީފައިވަނީ ޅ މާބިންހުރާއެވެ. ނަމަވެސް ބޭރުގެ ކުންފުނިން މާބިންހުރާ ބަލަން ދިޔަ ދަތުރުގައި ޅ ދިއްފުށިމާދޫ ބޭނުންވާކަމަށް ހުށައެޅިއެވެ.

އިތުބާރުހުރި މަސްދަރަކުން ރާއްޖެއެމްވީއަށް ކިޔާދީފައިވާ ގޮތުގައި އޭރު ޅ. ދިއްފުށިމާދޫގައި ވަނީ އިންޑިއާއިން ޕޮލިސް އެކަޑަމީއެއް އަޅަން އެއްބަސްވެފައެވެ. ނަމަވެސް ފްލެޓް މަސައްކަތްކުރަން އެއްބަސްވި ކުންފުނިން ޅ. ދިއްފުށިމާދޫ ބޭނުންވެގެން ހުށައެޅުމުން އިންޑިޔާގެ އެމަޝްރޫޢު ފަހުން ވަނީ އައްޑޫއަށް ބަދަލު ކޮށްފައެވެ. އަދި މި މުއާމަލާތްތަކުގެ ތެރޭގައި އެތައް ކޮރަޕްޝަނެއް ހިންގާފައިވާކަން ރާއްޖެއެމްވީއަށް ވަނީ އެނގިފައެވެ.

ހއ. ދައްޕަރާއި ޅ. ދިއްފުށިމާދޫގެ އެއްބަސްވުމުގައި ބަޔާން ކޮށްފައިވާ އެއްވެސް މަސައްކަތެއް ކުންފުނިން ފުރިހަމަ ކޮށްފައިނުވި ނަމަވެސް، ކުރީގެ ހައުސިންގ މިނިސްޓަރ މުއިއްޒު ވަނީ އެދެރަށުގެ ޓައިޓަލް އެ ކުންފުންޏަށް ދީފައެވެ. އެގޮތުން ޓައިޓެލް ލެޓަރގައި ސޮއި ކުރައްވާފައިވަނީވެސް މިނިސްޓަރ މުއިއްޒުކަން ރާއްޖެއެމްވީއަށް ވަނީ އެނގިފައެވެ. އަދި އެކަމުގެ ބަދަލެއްގެ ގޮތުން އެކަމުގައި އޭރު ސަރުކާރުގެ ތެރެއިން އުޅުނު މީހުންނަށް "ކަޅު ދަބަހުގައި" އެތަކެއް ފައިސާތަކެއް ދީފައިވާކަން އިތުބާރު ހުރި މަސްދަރަކުން ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ.

އޭގެ އިތުރުން، އެ 2 ރަށުގެ ޓައިޓަލް ބޭރުގެ ބޭންކެއްގައި މޯގޭޖެއްގެ ގޮތުގައި ބޭއްވުމަށް ފަހު ބޮޑު ލޯނެއް ނަގާފައިވާކަމުގެ މަޢުލޫމާތު ރާއްޖެއެމްވީއަށް ވަނީ ލިބިފައެވެ. އެ ލޯނު ނުދައްކައިފިނަމަ ޅ. ދިއްފުށިމާދޫ އާއި ހއ. ދައްޕަރު ދިވެހިންގެ އަތުން ގެއްލިގެންދާނެ ކަމުގެ ބިރުވެސް ހީވެފައިވާއިރު، "ޤައުމު ވިއްކާލުމާ ދެކޮޅު" ކަމަށް ބުނެ އިދިކޮޅުން އަޑުއުފުލަމުންދަނީ މި ކަންކަން ފޮރުވުމަށް ކަމަށް ގިނަ ބަޔަކު ދަނީ ބުނަމުންނެވެ.

މި މައްސަލަ މިހާރު ދިވެހި ދައުލަތާ ދެކޮޅަށް ސިންގަޕޫރު އާރބިޓްރޭޝަންގައި ކުރިއަށްދިޔައިރު، މި މައްސަލައިގައި ދޮގު ބަޔާން ދިނުމުން މުއިއްޒުގެ މައްޗަށް ވަނީ ދައުވާވެސް އުފުލާފައެވެ. އެގޮތުން ޅ. ދިއްފުށިމާދޫ ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެފައި ނުވާކަމަށް ވިދާޅުވެ އެކަމުގައި ދޮގު ބާޔަނެއް ދީފައިވާކަމަށް ޕްރޮސެކިއުޓަރ ޖެނެރަލް އޮފީހުން މައުލޫމާތު ދެއެވެ. އަދި ހައުސިންގ ޔުނިޓް މަޝްރޫޢާ ގުޅިގެން ނޫމަޑިއާއެކު ދިވެހި ސަރުކާރުން ވެފައިވާ ފޭސް 1 ގެ އެއްބަސްވުމާއި، 2013 ގައި ވެފައިވާ ފޭސް 2 ގެ އެއްބަސްވުމުގެ މަސައްކަތް އެ ކުންފުނިން ޝެޑިއުލްއާ އެއްގޮތަށް ލަސްތަކެއްނުވެ ކުރަމުން ގެންދިޔަކަމަށް މުއިއްޒު ވިދާޅުވި ކަމަށް ޕީޖީ އޮފީހުން ބުނެއެވެ.

ޕީޖީ އޮފީހުން ބުނީ، އެކަމާ ގުޅިގެން ޑރ މުޢިއްޒުގެ މައްޗަށް، ޤާނޫނު ނަންބަރު: 2014/09 (ދިވެހިރާއްޖޭގެ ޤާނޫނުލްޢުޤޫބާތު) ގެ 520 ވަނަ މާއްދާގެ (ހ) އާ ޙަވާލާދީ، އެމާއްދާގެ (ބ) ގެ ދަށުން ދޮގު ބަޔާން ދިނުމުގެ ކުށުގެ ދަޢުވާ ކްރިމިނަލް ކޯޓަށް ހުށައަޅާފައިވާ ކަމަށެވެ.