އިންޑިއާގެ އަސްކަރީ މަތިންދާ ބޯޓު އައީ އިމިގްރޭޝަނަށް ނޭނގި ކަމަށް ބުނެ ފަތުރަނީ ދޮގު ޚަބަރެއް!
އޭރިއަލް ސަވައިލަންސް ޕެޓްރޯލް ކުރާގޮތަށް ވަނީ ހަމަޖެހިފައި
އިންޑިއާގެ އަސްކަރިއްޔާގެ ދެ މަތިންދާ ބޯޓް ހަނިމާދޫ ރަންވޭގައި - މީގެ ތެރެއިން އެއް ބޯޓު މިހާރު ވަނީ އަނބުރާ ގޮސްފައި
ރާއްޖޭގެ ގައުމީ ދިފާއީ ބާރާއި ގުޅިގެން ހިންގާ ހާއްސަ އޮޕަރޭޝަނަކަށް އިންޑިއާގެ އަސްކަރިއްޔާގެ މަތިންދާ ބޯޓެއް ރާއްޖެ އައިސްފައިވަނީ އިމިގްރޭޝަނަށް ނޭނގި ކަމަށް ބުނެ ފަތުރަމުންދަނީ ދޮގު ޚަބަރެއްކަން ހާމަވެއްޖެއެވެ.
އަންގާރަ ދުވަހު ހެނދުނު ހާއިރު ހދ. ހަނިމާދޫ އިންޓަނޭޝަނަލް އެއާޕޯޓުގައި މި ބޯޓު ޖައްސާފައިވާއިރު، އެކަން ހިނގީ އިމިގްރޭޝަނަށް އެންގުމަކާ ނުލައި ކަމަށް ބައެއް މީޑިއާތަކުގައި ރިޕޯޓް ކޮށްފައިވެއެވެ. އެހެން ނަމަވެސް އެކަމާ ގުޅިގެން އިމިގްރޭޝަނުން ކުރި ޓްވީޓެއްގައި ބުނީ، އިމިގްރޭޝަނަށް އެންގުމަކާ ނުލާ ހަނިމާދޫ އެއަރޕޯޓަށް އަސްކަރީ މަތިންދާ ބޯޓެއް ޖެއްސި ކަމަށް ބުނެ، ޚަބަރު ފަތުރާ ބައެއް ނޫސްތަކުގައި ލިޔެފައިވާ ލިޔުންތަކަކީ ސައްޙަ މަޢުލޫމާތެއް ނޫން ކަމަށެވެ.
އޭގެ އިތުރުން، އެ އުޅަނދަށް އިމިގްރޭޝަން ކްލިއަރެންސް ދީފައިވަނީ، އިމިގްރޭޝަނަށް ހުށަހަޅަންޖެހޭ ލިޔެކިޔުން ފުރިހަމަކޮށް، ހޯދަންޖެހޭ ހުއްދަތައް ހޯދާފައިވުމުން ކަމަށް ވެސް އިމިގްރޭޝަނުން މައުލޫމާތުދެއެވެ.
އަންގާރަ ދުވަހުން ފެށިގެން މި މަހުގެ 16 ގެ ނިޔަލަށް ރާއްޖޭގެ ހާއްސަ އިގްތިސާދީ ކަނޑުގެ ސަރަޙައްދުގައި އެމްއެންޑީއެފް ކޯސްޓްގާޑާ ގުޅިގެން އޭރިއަލް ސަވައިލަންސް ޕެޓްރޯލް ކުރާ ގޮތަށް ހަމަޖެހިފައިވާ ކަމަށް އެމްއެންޑީއެފުން ބުންޏެވެ. މި ސަވައިލަންސް ޕެޓްރޯލްގައި ރާއްޖޭގެ ހާއްސަ އިގްތިސާދީ ސަރަހައްދުގައި ގާނޫނާއި ގަވައިދާ ހިލާފަށް ކަނޑުމަތީގެ އެއްވެސް ކަމެއް ހިނގާތޯ ބެލުމަށް ވަނީ ހަމަޖެހިފައެވެ.
އެމްއެންޑީއެފުން ބުނީ، ދެ ފްލައިޓެއް އައި ނަމަވެސް އޮޕަރޭޝަންގައި ބައިވެރިވާނީ އެންމެ ފްލައިޓެއް ކަމަށެވެ. ދެން އޮންނަ ފްލައިޓް އަކީ ބެކްއަޕްއެއްގެ ގޮތުގައި އައި ފްލައިޓެއް ކަމަށާއި، އެ ފްލައިޓް މިހާރު ފުރާފައިވާ ކަމަށް އެމްއެންޑީއެފުން މައުލޫމާތު ދެއެވެ.
