ސަރުކާރު، މަޖިލިސް އަދި ކޯޓުތައް ކުޅިވަރު ތެރެއަށް ވަންނަނަމަ، ކުޅިވަރުތަކުން ސަސްޕެންޑް ކުރުމުގެ ފުރުސަތު ބޮޑު ކަމަށް ވިދާޅުވެ ކުޅިވަރާ ބެހޭ ވަޒީރު އަޙްމަދު މަޙްލޫފް ދެއްކެވި ވާހަކަޔަކަށް މެދު ހެންވޭރު ދާއިރާގެ މަޖިލިސް މެންބަރު އަދި އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް ރައްދު ދެއްވައިފިއެވެ.

ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އިންތިޚާބުގެ މައްސަލަ ފެންމަތިވެ، އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އިން ރާއްޖެ ސަސްޕެންޑް ކުރުމުގެ ބިރު އެބައޮތް ކަމަށް ޓީޓީ އެސޯސިއޭޝަނުން މީގެ ކުރިން ބުނުމާ ގުޅިގެން މަޙްލޫފް މިދިޔަ އާދީއްތަ ދުވަހު ކުރެއްވި ޓްވީޓެއްގައި ވިދާޅުވީ ޒުވާން ޓީޓީ ޓީމު މިދިޔަ އަހަރު ރާއްޖެއަށް ރަންވަނަތަކެއް ހޯދާފައިވާއިރު، އައިޓީޓީއެފްއިން ރާއްޖެ ސަސްޕެންޑް ކޮށްފާނެ ކަމުގެ އިންޒާރުގެ ސިޓީގެ ކޮޕީއެއް އެމަނިކުފާނަށްވެސް ލިބިފައިވާ ކަމަށެވެ. އަދި ސަރުކާރު، މަޖިލިސް އަދި ކޯޓުތައް ކުޅިވަރު ތެރެއަށް ވަންނަނަމަ، ކުޅިވަރުތަކުން ސަސްޕެންޑް ކުރުމުގެ ފުރުސަތު ބޮޑު ކަމަށްވެސް ވަޒީރު ވަނީ ވިދާޅުވެފައެވެ.

ޓީޓީ އެސޯސިއޭޝަނުގެ އިންތިޚާބު މައްސަލައިގައި ރާއްޖެ ސަސްޕެންޑް ކުރުމުގެ އިންޒާރެއް ލިބުނުއިރު، ދާދި ފަހުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބު މައްސަލައިގައިވެސް ދުނިޔޭގެ ފުޓްބޯޅައާ ބެހޭ މައި އިދާރާ، ފީފާއިން ވަނީ ރާއްޖެ ސަސްޕެންޑް ކުރާނެ ކަމުގެ އިންޒާރެއް ދީފައެވެ. ފީފާއިން އެގޮތަށް އިންޒާރުދިނީ އެފްއޭއެމްގެ މައްސަލައި ރައްޔިތުންގެ މަޖިލީހުން ބަލަން ފެށުމާ ގުޅިގެންނެވެ.

އެފަހަރުވެސް މަޙްލޫފަށް އާޒިމް ވަނީ އެކި ފަހަރު މަތިން ރައްދު ދެއްވާފައެވެ. މަޙްލޫފާއި އާޒިމްގެ ކޯޅުން ބޮޑުވެފައިވާއިރު، ޓީޓީ މައްސަލައިގައި މަޙްލޫފް ދެއްކެވި ވާހަކަތައްކަށް ރައްދު ދެއްވަމުން އާޒިމް ވަނީ ބައިނަލްއަގުވާމީ ޖަމިއްޔާތަކުން ރާއްޖެ ސަސްޕެންޑް ކޮށްފާނެއޭ ކިޔައިގެން ޤާނޫނާ، ގަވާއިދާ އެއްގޮތަށް ނޫޅޭ ފަރާތްތަކާ ދޭތެރޭ ފިޔަވަޅު ނާޅާނަމަ، މި ހިންގަނީ ދައުލަތެއްތޯ ސުވާލު އުފައްދަވާފައެވެ. އަދި މި އުސޫލުން ބަލާނަމަ، ފޭރުމާ، ވައްކަން ވެސް އޯކޭ ކަމަށް ވިދާޅުވިއެވެ.

ޓީޓީގެ މައްސަލަ ހޫނުވެ، ކޯޓަށް މައްސަލަ ހުށަހެޅި ނަމަވެސް، ހޯމަ ދުވަހު ސިވިލް ކޯޓުން ވަނީ ޓީޓީ އެސޯސިއޭޝަނުގެ އިންތިޚާބު ފަސްކޮށްދިނުމަށް ވަގުތީ އަމުރެއް ނެރެދެވެން ނެތް ކަމަށް ނިންމާފައެވެ. އެއާއެކު އަންގާރަ ދުވަހު ޓީޓީ އެސޯސިއޭޝަނުގެ އިންތިޚާބުގެ ވޯޓުންލުން ވަނީ ފަށާފައެވެ.

މީގެ ކުރިން ޓީޓީ އެސޯސިއޭޝަނުގެ ޖެނެރަލް ސެކްރެޓަރީ އިސްމާއިލް ސުޖާއު ވިދާޅުވީ ޓީޓީގެ އިންތިޚާބުގެ ހުރިހާ ކަމެއް މިހާތަނަށް ގެންގޮސްފައިވާނީ އިންސާފުވެރިކޮށް ކަމަށާއި، ޓީޓީ އިންތިޚާބުގެ ކަންކަން ބަލަހައްޓަމުންދަނީ ދެފުށް ފެންނަ ގޮތަށް ކަމަށެވެ. އަދި އިންތިޚާބުގެ ކަންކަން ބަލަހައްޓަމުން ގެންދަނީ އިންތިޚާބީ ކޮމިޓީން ކަމަށްވެސް ވިދާޅުވިއެވެ. އަދި ޓީޓީގެ އިންތިޚާބުގެ ކަންކަން ހިނގަމުން އަންނަނީ ރަނގަޅަށް ކަމަށް ކުޅިވަރާ ބެހޭ ގައުމީ މަޖިލީހުން ނިންމާފައިވާ ކަމަށާއި، އިންތިޚާބު ބޭއްވުމަށް އެ މަޖިލީހުން ރުހުންދީފައިވާ ކަމަށްވެސް ވިދާޅުވިއެވެ.

ޓީޓީގެ އިންތިޚާބުގައި ރައީސްގެ މަގާމަށް ވާދަކުރައްވަނީ މިހާރުވެސް އެމަގާމު ފުރުއްވަމުން އަންނަ އަލީ ރަޝީދު (އައްޔަ) އާއި ތޯހާ ސަލީމެވެ. އިންތިޚާބުގެ ވޯޓުލުން ފަށާފައިވާއިރު، އަންގާރަ ދުވަހުގެ ހަވީރު 17:00 ގެ ނިޔަލަށް ވޯޓުލުން ކުރިއަށްދާނެ ކަމަށް ޓީޓީ އެސޯސިއޭޝަނުން ބުނެއެވެ.