މާލޭގައި ފެން ރައްކާ ކުރާ އިތުރު ދެ ތާނގީ ބަހައްޓަނީ

މާލެ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ)ގެ"ވޯޓާ ސެކިއުރިޓި ޕްލޭން" ގެދަށުން، މާލޭގައި ފެން ރައްކާ ކުރާ އިތުރު ދެ ތާނގީ ބެހެއްޓުމުގެ މަޝްރޫއެއް ފަށައިފިއެވެ.

އަންގާރަ ދުވަހު މި މަޝްރޫއު އަމަލީ ގޮތުން ފައްޓަވައި ދެއްވީ އެމްޑަބްލިއުއެސްސީގެ މެނޭޖިން ޑިރެކްޓަރ ހަސަން ޝާހުގެ އިތުރުން ކުންފުނީގެ މެނޭޖްމަންޓްގެ ބޭފުޅުންނެވެ.

Advertisement

އެ ކުންފުނިން ނެރުނު ނޫސް ބަޔާނެއްގައި ބުނީ، އެ ދެ ތާނގީ ބެހެއްޓުމަށް ހަމަޖެހިފައި ވަނީ ކުރިން އެސްޓީއޯގެ ރެޑީ މިކްސް ކޮންކްރީޓް މަސައްކަތް ކުރަމުން އައި މާލޭގެ 378 ނަމްބަރ ކޮށީގައި ކަމަށެވެ.

އެ މަޝްރޫއުގެ މަގްސަދަކީ މާލޭގައި ފެން ކުންފުނިންފެން ރައްކާ ކުރެވޭ މިންވަރު އިތުރުކޮށް،މެދުކެނޑުމެއްނެތި އަދި ދެމެހެއްޓެނިވި ގޮތެއްގައި، ރައްކާތެރި ސާފު ބޯފެން ފޯރުކޮށްދިނުމެވެ.

މަޝްރޫއުގެ ދަށުން ތާނގީގެ އިތުރުން ފެން ފޯރުކޮށް ދިނުމަށްޓަކައި ޕަމްޕް ރޫމެއް ވެސް ގާއިމު ކުރެވިގެން ދާނެ ކަމަށް ފެން ކުންފުނިން މައުލޫމާތުދެއެވެ.

އަލަށް ބަހައްޓާ ދެ ތާނގީން ކުރެ ކޮންމެ ތާނގީއަކު ވެސް 13,648ކިޔުބިކް މީޓަރުގެފެން ރައްކާ ކުރެވުމާއި އެކު ދެ ތާނގީގައި ޖުމްލަ 27,296ކިޔުބިކް މީޓަރފެން ރައްކާ ކުރެވޭނެއެވެ.

އެ މަސައްކަތްތައް ނިމުމާއެކު ފެން ކުންފުނިން މާލޭގައިފެންރައްކާ ކުރެވޭ މިންވަރު ޖުމްލަ 50,296ކިޔުބިކް މީޓަރަށްއިތުރު ވެގެންދާނެ ކަމަށް އެ ކުންފުނިން މައުލޫމާތުދެއެވެ.

މި ތާނގީތައް ބެހެއްޓުމުގެ މަސައްކަތްތައް ނިންމާލުމަށް ތާވަލު ކުރެވިފައިވަނީ އަންނަ އަހަރުގެ ޑިސެމްބަރު މަހުގެ ނިޔަލަށެވެ. ތާނގީ ބަހައްޓަން ޖުމްލަ 82 މިލިއަން ރުފިޔާ ހަރަދު ވާނެކަން އެމްޑަބްލިއުއެސްސީން ވަނީ އަންދާޒާ ކޮށްފައެވެ.

ގްރޭޓަރ މާލޭ ރީޖަން ވޯޓާރ ސެކިއުރިޓީ ޕްލޭންގެ ދަށުން، އެމްޑަބްލިއުއެސްސީ އިން ފެން އުފެއްދުން ޑީސެންޓްރަލައިޒްކޮށް، މާލޭގެ ދެ ސަރަހައްދެއް ގައި ފެން އުފައްދާ މަރުކަޒުތައް ވަނީ ގާއިމު ކޮށްފައެވެ. އަދި މާލެ ހުޅުމާޅެ ބުރިޖު މެދުވެރިކޮށްއެމްޑަބްލިޔުއެސްސީއަޅާފައިވާ ފެނުގެ ވިއުގަ ގުޅާލުމުގެ މަސައްކަތް ވެސް ދަނީ ކުރަމުންނެވެ.

އެމްޑަބްލިޔުއެސްސީ ގެ އަމާޒަކީ ދެމެހެއްޓެނެވި ގޮތެއްގައި ރައްކާތެރި ބޯފެން އެންމެހާ ރައްޔިތުނަށް ފޯރުކޮށްދިނުމެވެ.