ގައުމަށް ދާން ބޭނުންވާ ބިދޭސީންގެ އެމްޕްލޮއިމެންޓް އެޕްރޫވަލް އޮތްތޯ ބަލަނީ
ގަވައިދާ ހިލާފަށް އުޅޭ ބިދޭސީންގެ އަދަދު އިތުރު
ބަންގްލަދޭޝްއަށް ނިސްބަތްވާ ބިދޭސީ މަސައްކަތު ބައެއް
"ވޮލަންޓްރީ ރެޕަޓްރިއޭޝަން" ޕްރޮގްރާމްގެ ދަށުން ގައުމަށް އެނބުރި ދިޔުމަށް އެދި ހުށަހަޅާފައިވާ ބިދޭސީންގެ އަތުގައި ސައްހަ އެމްޕްލޮއިމެންޓް އެޕްރޫވަލް އޮތްތޯ ބެލުމުގެ މަސައްކަތް އިކޮނޮމިކް މިނިސްޓްރީން ފަށައިފިއެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީންގެ އަދަދު އިތުރުވެ، އެކަމުގެ ނޭދެވޭ އަސަރު މުޅި މުޖުތަމައު އަށް ވަނީ ފޯރާފައެވެ. އަދި މަސައްކަތް ކުރާ ބިދޭސީންގެ ހައްގުތައް ކަށަވަރު ކޮށްދިނުމުގައި ގިނަ ގޮންޖެހުންތަކާ ވަނީ ކުރިމަތިލާންވޖެހިފައެވެ.
އިކޮނޮމިކް މިނިސްޓްރީން ނެރުނު އިއުލާނެއްގައި ބުނެފައިވަނީ ސައްހަ އެމްޕްލޮއިމެންޓް އެޕްރޫވަލް ނެތި ރާއްޖޭގައި މަސައްކަތް ކުރަމުންދާ ބަންގްލަދޭޝް އަށް ނިސްބަތްވާ ބިދޭސީންގެ ތެރެއިން ގައުމަށް ދާން ބޭނުންވާ ފަރާތްތަކަށް ހިންގާ ޕްރޮގްރާމުގެ ދަށުން ގިނަ އަދަދެއްގެ ބިދޭސީން އެކަމަށް އެދެމުންދާ ކަމަށެވެ.
އިއުލާނުގައި އިތުރަށް ބުނެފައިވަނީ ގައުމަށް އެނބުރިދާން ބޭނުން ވެގެން އެމްޕްލޮއިމެންޓް އެޕްރޫވަލް ހުށަހެޅި ނަމަވެސް، އެ ފަރާތްތަކަކީ އެމްޕްލޮއިމެންޓް އެޕްރޫވަލް ދޫކޮށްފައިވާ ވަޒީފާ ދޭ ފަރާތްތަކުގެ ވަޒީފާތަކުގައި މަސައްކަތް ކުރާ މީހުން ނޫންކަން މިނިސްޓްރީ އަށް ފާހަގަކުރެވިފައިވާ ކަމަށެވެ.
"ވޮލަންޓްރީ ރެޕަޓްރިއޭޝަން" ޕްރޮގްރާމްގެ ދަށުން ގައުމަށް އެނބުރި ދިޔުމަށް އެދި ހުށަހަޅާފައިވާ ބިދޭސީންނާ ބެހޭ މައުލޫމާތުގެ ލިސްޓު އާންމުކޮށް، މިނިސްޓްރީން ނެރުނު އިއުލާނުގައި ބުނެފައިވަނީ ލިސްޓްގައި ހިމެނޭ ބިދޭސީންނަކީ އެމްޕްލޯއިމެންޓް އެޕްރޫވަލް ދޫކުރެވިފައިވާ ވަޒީފާ ދޭ ފަރާތުގެ ވަޒީފާގައި މަސައްކަތް ކުރަމުންދާ ފަރާތްތައް ނަމަ އެކަން ބަޔާންކޮށް 15 ސެޕްޓެމްބަރުގެ ކުރިން repatriation@trade.gov.mv އަށް އީމެލް މެދުވެރިކޮށް އެކަން ހިއްސާ ކުރުމަށް އެދޭ ކަމަށެވެ. އަދި ފޮނުވާ އީމެއިލްގައި ބިދޭސީ މީހާގެ ފުރިހަމަ ނަމާއި، ޕާސްޕޯޓު ނަންބަރާއި، ވަޒީފާ ދޭ ފަރާތުގެ މައުލޫމާތު ހިމެނުމަށް މިނިސްޓްރީ އިން ވަނީ އެދިފައެވެ.
މީގެ އިތުރުން މި މުއްދަތުގައި މިނިސްޓްރީ އަށް މައުލޫމާތު ހިއްސާ ނުކުރާ މީހުންގެ ތެރެއިން ލިސްޓްގައި ހިމެނޭ ބިދޭސީން ގައުމަށް އެނބުރި ފޮނުވާ ލެވޭނެ ކަމަށް ވެސް މިނިސްޓްރީން ނެރުނު އިއުލާނުގައި ބުނެފައިވެއެވެ.
"ވޮލަންޓްރީ ރެޕަޓްރިއޭޝަން" ޕްރޮގްރާމަކީ ބަންގްލަދޭޝް ސަރުކާރާއި ދިވެހި ސަރުކާރު ގުޅިގެން ރާއްޖޭގައި ގަވައިދާ ހިލާފަށް އުޅެމުންދާ ބަންގްލަދޭޝްގެ ރައްޔިތުން ގައުމަށް އެނބުރާ ފޮނުވާލުމަށް ހިންގާ ޕްރޮގްރާމެކެވެ.
