ކ. މާލެ
|
7 ސެޕްޓެންބަރ 2020 | ހޯމަ 17:40
ފުޑް ހޮސްޕިޓަލިޓީ އޭޝިއާ މޯލްޑިވްސް (އެފްއެޗްއޭއެމް) 2019 އިންޓަރނޭޝަނަލް ކަލިނަރީ ޗެލެންޖް އެންޑް އެގްޒިބިޝަން
ފުޑް ހޮސްޕިޓަލިޓީ އޭޝިއާ މޯލްޑިވްސް (އެފްއެޗްއޭއެމް) 2019 އިންޓަރނޭޝަނަލް ކަލިނަރީ ޗެލެންޖް އެންޑް އެގްޒިބިޝަން
އިންސްޓަގްރާމް
ޒުވާނުންނަށް ނަމޫނާ ދައްކައިދިން ޝެފް
އުމުރުން އެންމެ 14 އަހަރުން ފެށިގެން ކެއްކުމުގެ ދާއިރާގައި ލަޔާން
 
އިންސްޓާރގްރާމް ޕޭޖަށް އެތަކެއް ތަރުހީބެއް
 
އެތައް ވަނަތަކެއް ހާސިލް ކޮއްފައިވޭ
 
އުމުރުން 14 އަހަރުގައި ކެއްކުމުގެ ދާއިރާގައި

ކެއްކުމުގެ ދާއިރާ އަކީ ވަރަށް ގިނަ އަންހެން ކުދިން ޝައުގުވެރިވާ ދާއިރާއެކެވެ. ރާއްޖެއަށް ބަލައިލި ކަމުގައިވީ ނަމަވެސް މި ދާއިރާ އިން ކުރިއަށްދާ އަންހެނުން ގިނަކަން ފާހަގަކޮށްލެވެއެވެ. އެގޮތުން އައިޝަތު ލަޔާން ރިޔާޒް އަކީ ވެސް ވަރަށް ޅަ އުމުރުގައި މިދާއިރާ އަށް ޝައުގުވެރިވި ޒުވާނެކެވެ.

އުމުރުން އެންމެ ސާދަ އަހަރުގައި ކެއްކުމުގެ ދާއިރާގައި ވިދާލި ލަޔާން އަކީ މިހާރުގެ ޒުވާނުންގެ ތެރޭގައި ނަން މަޝްހޫރު ޝެފެކެވެ. މި ދާއިރާއަށް ޝައުގުވެރިކަން އުފެދުނީ ކަލާފާނު ސުކޫލުން މަދަރުސީ ހަޔާތް ނިންމުމަށްފަހު ، މޯލްޑިވްސް ނެޝެނަލް ޔުނިވާރސިޓީ (އެމްއެންޔޫ) ގައި ފަތުރުވެރިކަމުގެ ދާއިރާ އިން ކިޔެވުމުގެ ތެރެއިން ކަމަށް އޭނާ ބުންޏެވެ.

ކެއްކުމުގެ ދާއިރާއިން ބޮޑެތި ކާމިޔާބީތަކެއް ވެސް މި ޒުވާނާ މިވަނީ ހޯދާފައެވެ. އޭގެ ތެރެއިން 2017 ވަނަ އަހަރު ހޮޓެލް އޭޝިއާގެ "ޔަންގް ޝެފް" ކެޓަގަރީ އިން ބްރޯންޒް މެޑަލް ހޯދާފައެވެ. އަދި 2019 ވަނަ އަހަރު ފުޑް ހޮސްޕިޓަލިޓީ އޭޝިއާ މޯލްޑިވްސް (އެފްއެޗްއޭއެމް) އިން ރިހި މެޑަލެއް ވެސް ވަނީ ހާސިލް ކޮށްފައެވެ. ކެއްކުމުގެ ދާއިރާ އިން އިތުރަށް ކުރި އެރުމުގެ އުންމީދުގައި ސޮނެވާފުށީގައި ހިންގި އިންޓާންޝިޕް ޕްރޮގްރާމެއްގައި ބައިވެރިވެ އިތުރަށް މި ދާއިރާއިން ކުރިއަށް ދިއުމަށް ޝައުގު އުފެދުނު ކަމަށް ލަޔާން ބުންޏެވެ. މީގެ އިތުރުން ޖަޕާނުގެ ކުޒީން އުފެއްދުމަށް މަޝްހޫރު ރެސްޓައުރެންޓް ކަމަށްވާ "އޮއީށީ – ހައުސް އޮފް ސޫޝީ" ގައި ޝެފް އެއްގެ ވަޒީފާ ލަޔާން އަދާ ކޮށްފައިވެއެވެ. ލަޔާން ބުނި ގޮތުގައި މީ މި ދާއިރާ އިން ކުރިއަށް ދިއުމަށް އެޅުނު މުހިންމު ފިޔަވަޅެކެވެ.

ސޮނެވާފުށީގައި ހިންގި އިންޓާރންޝިޕް ޝެފް ސޮބާ އާއި އެކު.

މިހާރު ވެސް މި ދާއިރާ އިން ކިޔަވަމުން ގެންދަވާ ލަޔާން ބުނި ގޮތުގައި ކޮވިޑް-19 ގެ ބަލިމަޑުކަން އައުމާއެކު އެތަކެއް އުނދަގޫތަކަކާއި ކުރިމަތިލާން ޖެހުނެވެ. މި ހާލަތުގައި ވަޒީފާގެ ފުރުސަތު ގެއްލުނުކަން ފާހަގަކުރިއެވެ. އެހެންނަމަވެސް މިޒުވާނާގެ އަޒުމަކަށް ބަދަލެއް ނައެވެ. މިކަމުން އަރައިގަތުމަށްޓަކައި ދެން ވިސްނީ ގޭގައި ހުރެގެން އާމްދަނީ ހޯދުމަށެވެ. އެގޮތުންއިންސްޓަރގުރާމްގައި ލަޔާން ވަނީ އޭނާގެ އަމިއްލަ ޕޭޖެއް ހުޅުވިއެވެ. "ބޭކްއޮލޮޖީ. އެމްވީ" ގެ ނަމުން ހުޅުވި މި ޕޭޖަށް ވަނީ އާންމުންގެ ބޮޑު ތަރުހީބެއް ލިބިގެން ގޮސްފައެވެ. އަދި ކޮންމެ ދުވަހަކު ވެސް ތައްޔާރު ކުރާ ތަފާތު ކާއެއްޗެހި ވިކެމުންދާ ކަމަށް އޭނާ ބުންޏެވެ. މި ތަކެތީގެ ތެރޭގައި "ކުކީސް"، "ސޫޝީ"، "ކޭކު" ފަދަ ތަކެތި ހިމެނެއެވެ.

ލަޔާން ބޭނުން ވަނީ ތަފާތު އެކި ޤައުމުތަކުގެ ކެއްކުންތައް ކައްކާށެވެ. އެއަށްފަހު އެންމެ ކަމުދާ ޤައުމުގެ ކެއުންތައް ތައްޔާރުކޮށް، އެކަމަށް ހާއްސަވުމަށް ކަމަށް ވެސް އޭނާ ބުންޏެވެ.

"ބީޓްރޫޓް އިންފިއޫސްޑް މަކި ރޯލް ވިތް ސަލްމަން އެބި، އުނަގި އެންޑް ހިޔަށީ ވަކަމޭ"

ލަޔާންގެ އެންމެ ތަފާތު ކަމެއްގެ ގޮތުގައި ފާހަގަކުރެވެނީ "އަމިއްލަވަންތަ ކާއެެއްޗެހި" ތައްޔާރު ކުރުމެވެ.

ލަޔާން އެޅި "އެޕަލް ޗީޒް ކޭކް"

މިހާރު އުމުރުން އެންމެ 21 އަހަރުގެ ޝެފް ދެކެން ބޭނުންވާ ހުވަފެނަކީ އަމިއްލަ ރެސްޓޯރެންޓެއް ހުޅުވުމެވެ. ކެއްކުމަކީ ލަޔާންގެ ދިރިއުޅުމުގެ ބޮޑު އެއް ހިއްސާ ކަމަށްވާއިރު ލަޔާން ބުނީ މި ދާއިރާ އަކީ ކުރިމަގު އޮތް ކަނބަލުންނަށް ކުރިއަށް ދާން ރަނގަޅު ދާއިރާއެއް ކަމަށެވެ. އަދި ހިތްވަރާއެކު މަސައްކަތް ކޮށްފިނަމަ ކޮންމެ ކުއްޖަކަށް ވެސް މިދާއިރާ އިން ކުރިއަށް ދެވޭނެ ކަމަށް ލަޔާން ބުންޏެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ސިމާހާ ނަސީމް
6%
75%
0%
9%
0%
9%
ކޮމެންޓް