އުމުރުން 16 އަހަރުގެ ނީޝަން: ރާނައި ސިމެންތު ޖަހާ، ވަޑާންކޮށް ކަރަންޓްވައިރު ކުރޭ!

އަންހެނުން ބާރުވެރި ކުރުވުމާއި މުޖުތަމައުގެ އެކި ކަންކަމުގައި އަންހެނުންގެ ބައިވެރިވުން އިތުރު ކުރުމުގެ މުހިއްމުކަމުގެ ވާހަކަ ވަރަށް ގިނަ ބަޔަކު ދައްކައެވެ. މަސް އޮޑި މަހުން ލަފައި، މަސް ބައި ގެއަށް ގެނައިމަ، މަސް ލާރިއަށް ހެދުމުގެ އިތުރުންވެސް މުޖުތަމައުގެ އެކި ދާއިރާތަކުގައި އަންހެނުންގެ ބައިވެރިވުން ދަނީ އިތުރުވަމުންނެވެ. މީގެ މިސާލެއްގެ ގޮތުން ރާއްޖޭގެ ފުރަތަމަ އަންހެން ޑިފެންސް މިނިސްޓަރަކަށް މާރިޔާ ދީދީ އަދި ފުލުހުންގެ ފުރަތަމަ ސްޕޯކްސްޕާރސަންއަކަށް އިޒްމިޔާ ޒާހިރު އައްޔަނު ކުރެވިގެން ދިއުން ފާހަގަކޮށްލެވެއެވެ. ކޮންމެއަކަސް ޤަބޫލުކުރަންޖެހޭ ހަޤީޤަތަކީ ތަފާތު އެކިއެކި ދާއިރާތަކުގައި މިއަދު އަންހެނުން ފައިތިލަ ސާބިތު ކުރަމުންދާ ކަމެވެ. އެގޮތުން ޒަމާނުއްސުރެ "ފިރިހެނުންނަށް ޚާއްސަ" މަސައްކަތެއްގެ ގޮތުގައި ދެކޭ މަސައްކަތެއް ކަމަށްވާ އިމާރާތްކުރުމުގެގެ ދާއިރާއިންވެސް އަންހެން މޫނުތައް ދަނީ ފެންނަމުންނެވެ.

އުމުރުން ސޯޅަ އަހަރުގެ ސ. މަރަދޫ އަށް އުފަން ފާތިމަތު ނީޝަން ފަތުހުﷲ އަކީ ރާއްޖޭގެ އެންމެ ހަގު ސިވިލް އިންޖިނިއަރަށްވުމުގެ އުއްމީދުގައި އަދި އިމާރާތްކުރުމުގެ މަސައްކަތުގައި ތާރީޚުގައި ފާހަގަކޮށްލެވޭ ފަރާތަކަށްވުމުގެ އަޒުމުގައި މަސައްކަތް ކުރަމުންދާ ހީވާގި ޒުވާނެކެވެ. އެޗްޑީސީން އިންތިޒާމުކޮށްގެން ބޭއްވި ޔޫތު އެޕްރެންޓިސްޝިޕް ޕްރޮގްރާމްގައި ނީޝަން ބައިވެރިވީ އެ އުއްމީދުގަ އެވެ. އެ ޕްރޮގްރާމްއިން ފުރިހަމަ ނަތީޖާއެއް ހާސިލުކޮށް އެޗްޑީސީން ވަޒީފާ ދޭ ކުދިންގެ ލިސްޓުގައިވެސް ހިމެނިގެން ދިޔައީ ޕްރޮގްރާމްގައި ދެންތިބި ފިރިހެން ކުދިންނާ އެއް ހަމައެއްގައި ފައިތިލަ ސާބިތު ކުރަމުންނެވެ. އެއީ އެ ޕްރޮގްރާމްއިން އަންހެން ކުއްޖަކު ސަނަދެއް ހާސިލުކުރި ފުރަތަމަ ފަހަރު ކަމަށް އެޗްޑީސީން ބުންޏެވެ.

ނީޝަން ރޭނުމުގެ މަސައްކަތް ކުރަނީ -- ފޮޓޯ: ފޭސްބުކް

"ކޮންސްޓްރަކްޝަން ފީލްޑަކީ އާންމުކޮށް އަންހެން ކުދިން އެހާ ރައްޓެހި ފީލްޑެއް ނޫނޭ ދެންނެވިދާނެ. އަޅުގަނޑުމެންގެ މި ޕްރޮގްރާމް ތެރެއިން އެއް އަންހެން ބައިވެރިއަކު މިވަނީ ޕްރޮގްރާމް ނިންމައި ސެޓްފިކެޓް ހާސިލުކުރުމާ ހަމައަށް ވާސިލުވެފަ. މިވެސް އަޅުގަނޑުމެން ފާހަގަކޮށްލަންޖެހޭ ކަމެއް" އެޕްރެންޓިސްޝިޕް ޕްރޮގްރާމް ނިންމުމުގެ ރަސްމިއްޔާތުގައި ވާހަކަދައްކަވަމުން އެޗްޑީސީގެ ޑިރެކްޓަރ މުހައްމަދު އިލްހާމް ވިދާޅުވިއެވެ.

ނީޝާންގެ ބައްޕަ ފަތުހުﷲ ސޯލިހް ސިފައިންގޭގައި އުޅުއްވި ދުވަސްވަރު

ނީޝަން ބުނި ގޮތުގައި އޭނާއަށް މި ދާއިރާއިން ހިތްވަރު ލިބެނީ ބައްޕަ، ފަތުހުﷲ ސޯލިހްގެ ފަރާތުންނެވެ. ފަތުހުﷲ ވަނީ އެމްއެންޑީއެފްގައި އުޅުއްވިއިރު، ޕާކިސްތާނުގައި އިލެކްޓްރިކަލް ޓެކްނޮލޮޖީގެ ދާއިރާއިން ހެދި ކޯހުން އެއްވަނަ ހޯދައިފަ އެވެ. އެހެންވެ އޭނާއަށް ވަނީ ރައީސުލްޖުމްހޫރިއްޔާގެ ހާއްސަ އިނާމު ލިބިވަޑައިގެންފަ އެވެ.

" އެންމެ ބޮޑަށް އިންސްޕަޔަރ ވީ އަޅުގަނޑު ބައްޕައަކީވެސް އިންޖިނިއަރއަކަށްވެފައި ރާއްޖެއިން ބޭރުން ކިޔަވައިގެން އެއްވަނަ ލިބި ރައީސުލްޖުމްހޫރިއްޔާ ފަރާތުން އެ ދެއްވާ ޚާއްސަ އިނާމު ލިބުމުން، އަޅުގަނޑުގެވެސް އުއްމީދަކީ އެއީ," ކުޑަ އިރުއްސުރެ ބައްޕައާއެކު މަސައްކަތުގައި ބައިވެރިވެ އުޅުނު ނީޝަން ބުންޏެވެ.

ނީޝަން ކަރަންޓް ވައިރުކުރުމުގެ މަސައްކަތް ކުރަނީ -- ފޮޓޯ: ނީޝަން

އިމާރާތްކުރުމުގެ މަސައްކަތުގައި ނީޝާން މިހާރު ފިރިހެނަކަށް ދުލެއް ނުކުރާނެ އެވެ. ފައުންޑޭޝަނަށް ބިން ކޮނުމާއި، ސިމެންތި ގެށުމާއި ރޭނުމާއި ފެންވައިރުމާއި ކަރަންޓް ވައިރުކުރަން އެނގެ އެވެ. މެޝިންތަކާ ކުޅެލަން ވެސް ފަރިތައެވެ. ވަޑާމުގެ މަސައްކަތައް ވެސް އެނގެ އެވެ. އެހެންވެ، ކޯހުގައި ވެސް، ކުރަން އުނދަގޫވި މަސައްކަތެއް ނެތެވެ.

ކޯހުގެ ބައެއް ބައިވެރިންނާއެކު ނީޝަން ފޮޓޯއަކަށް ހުއްޓިގެން -- ފޮޓޯ: ނީޝަން

"ހުސް ފިރިހެނުންނާއެކު މަސައްކަތް ކުރާއިރު އެމީހުންގެ ބަހުރުވަ ހުންނަ ގޮތުން އެއީ ވަރަށް ބޮޑު ޗެލެންޖަކަށްވި . އެއީ މަސައްކަތް ކުރާ އިރު ފިޒިކަލް ކަންކަމުގަ އަންހެން ކުއްޖަކަށް ނުކުރެވޭނެހެން ހީވަނީ. އެހެން ހީވުމަކީވެސް ވަރަށް ބޮޑު ޗެލެންޖަކަށްވި. ވަކި އަންހެނަކަށް ވީތީ އުނދަގޫވި ކަމެއް ނެތް،" ނީޝަން ބުންޏެވެ.

ޔޫތު އެޕްރެންޓިސްޝިޕް ޕްރޮގްރާމްގެ ހަރަކާތްތަކުގެ ތެރެއިން

ނީޝަންގެ ހުރިހާ ކާމިޔާބެއްގެ ޝުކުރު އާއިލާއަށް ހައްގުކަން ފާހަގަކުރަމުން އޭނާ ބުނީ، ދަރިން ކުރާ ކަންކަމުގައި މައިންބަފައިންގެ އެހީތެރިކަމާއި ހިތްވަރު ވަރަށް ބޮޑަށް ބޭނުންވާނެ ކަމަށާއި، ވަކި މަސައްކަތެއްގައި ކުރިއަށްދާން އަޒުމު ކަނޑައަޅައިގެން އުޅޭ ކުއްޖަކަށް އެންމެ މުހިއްމު އެއްޗަކީ މައިންބަފައިންގެ ސަޕޯރޓް ކަމަށެވެ.

ގަދަ އަޅައި މަސައްކަތްކޮށްފި ނަމަ އުއްމީދު ކާމިޔާބު ވާނެ ކަމަށް ނީޝާން ވެސް ގަބޫލުކުރެ އެވެ. އެއީ ފިސާރި އަންހެން ކުއްޖެކެވެ. އޭނާ ދަނީ އުއްމީދު ހާސިލުކުރުމަށް ހަރުފަތްތައް ގިރާކުރަމުންނެވެ.