ފްރޮންޓްލައިން އެލަވެންސް ނުލިބޭ ކަމަށް ބުނެ އިހްތިޖާޖުކޮށްފި
6 ސެޕްޓެމްބަރު 2020 | އާދީއްތަ 13:39200ށް ވުރެ ގިނަ މުވައްޒަފުންނަށް އެލަވެންސް ނުލިބޭ: އިހްތިޖާޖުގެ ބައިވެރިން
ހުޅުމާލޭ ހޮސްޕިޓަލްގެ ގޯތި ތެރޭގައި އެތަނުގައި މަސައްކަތްކުރާ މުވައްޒަފުން ކުރި އިހްތިޖާޖުގެ ތެރެއިން
ކޮވިޑް-19ގެ ކުރީ ސަފުގައި މަސައްކަތް ކުރާ ފަރާތްތަކަށް ސަރުކާރުން ދެމުންދާ ފްރޮންޓް ލައިން އެލަވެންސް ނުލިބޭތީ ކަމަށް ހުޅުމާލޭ ހޮސްޕިޓަލުގައި މަސައްކަތް ކުރާ ނަރުހުންގެ އިތުރުން އެތަނުގައި މަސައްކަތް ކުރާ މުވައްޒަފުންތަކެއް އިހްތިޖާޖު ކޮށްފިއެވެ.
އާދިއްތަ ދުވަހުގެ ހަވީރު ހަތަރަކުން ފަހެއް ޖަހަންދެން ކުރިޔަށް ގެންދިޔަ އެ އިހްތިޖާޖުގައި 30ށް ވުރެ ގިނަ މީހުން ބައިވެރިވެއެވެ. އިހްތިޖާޖުގެ ބައިވެރިން ތިބީ އެ މީހުންގެ ޝުއުރޫތައް ލިޔެފައިވާ ޕޯސްޓަރުތައް ހިފައިގެންނެވެ.
އިހްތިޖާޖުގެ ތެރެއިން ރާއްޖެ އެމްވީއާ ވާހަކަ ދެއްކި ނަރުހަކު ބުނީ، ކޮވިޑް-19 ގެ އެލެވެންސް ހުޅުމާލެ ހޮސްޕިޓަލުގައި މަސައްކަތް ކުރާ އެއްވެސް ނަރުހަކަށް މިހާތަނަށް ލިބިފައިނުވާ ކަމަށެވެ. ހަމައެކަނި އެލަވެންސް ލިބިފައިވަނީ ކޮވިޑުގެ ބަލި މީހުންނަށް ފަރުވާދޭ ފެސިލިޓީސް ތަކުގައި މަސައްކަތް ކުރާ ނަރުހުންނަށް ކަމަށް އޭނާ ބުންޏެވެ. އެކަމަކު އެ ނަރުހުންނަށް ވެސް އެލަވެންސްގެ ގޮތުގައި ލިބުނީ މަދު އަދަދެއްކަން ފާހަގަކުރަމުން އޭނާ ބުނީ، އެލަވަންސް ދޭ އުސޫލަކީ އެންމެ ރަނގަޅު އުސޫލު ކަމަށް ގަބޫލުނުކުރާ ކަމަށެވެ.
އޭނާ ބުނީ، ލޯންޑްރީގައި މަސައްކަތް ކުރާ މުވައްޒަފުންގެ އިތުރުން ބައެއް ޑޮކްޓަރުންނަށް އެލަވެންސް ދީފައިވާ ކަމަށެވެ. އިހްތިޖާޖުގެ ބައިވެރިން ބުނީ، އެލަވެންސް އާއި ބެހޭ ގޮތުން އިސް ފަރާތްތަކާއި އެ ޝަކުވާ ކުރި ކަމަށެވެ.
ފްރޮންޓްލައިން އެލަވެންސްގެ މައްސަލާގައި އިހްތިޖާޖު ކޮށްފައިވާއިރު އެލަވެންސްގެ ގޮތުގައި މިހާތަނަށް 33 މިލިއަނަށް ވުރެ ގިނަ ރުފިޔާ ދޫކޮށްފައިވާ ކަމަށް ފިނޭންސް މިނިސްޓްރީން ވަނީ ހާމަކޮށްފައެވެ.
