އެއަރކްރާފްޓްތައް ދުއްވަން އެމްއެންޑީއެފްގެ ޕައިލެޓުން ތަމްރީން އެބަ ކުރަން: ޝަމާލް
6 ސެޕްޓެމްބަރު 2020 | އާދީއްތަ 09:57މާރކެޓާއި އެއްވަރަށް ޕައިލެޓަކަށް މުސާރަ ދިނުމުގައި ގޮންޖެހުން އެބަހުރި
އެމްއެންޑީއެފްގެ ހެލިކޮޕްޓަރު
ޑޯނިއަރ އެއަރކްރާފްޓް އަދި ހެލިކަޕްޓަރު ދުއްވަން ޕައިލެޓުން އެމްއެންޑީއެފްގެ ތެރެއިން ތަމްރީން ކުރަމުންދާ ކަމަށާއި ތަމްރީން ލިބިފައި ހުރި ދިވެހިން ހޯދަން ގޮންޖެހުން އެބަހުރި ކަމަށް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
ޝަމާލް މިހެން ވިދާޅުވީ އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީން ކުރި ސުވާލަކަށް ޖަވާބު ދެއްވަމުންނެވެ. ހެލިކޮޕްޓަރުތައް ދުއްވުމަށް ދިވެހިން ނުތިބެނީ މުސާރަ ދިނުމުގައި ގޮންޖެހުން ކުރިމަތިވާތީތޯ ސުވާލުކުރުމުން ޝަމާލް ވިދާޅުވީ، އެމްއެންޑީއެފްގައި މިހާރު ތިބި ޕައިލެޓުން އެއަރކްރާފްޓަށް ތަމްރީނު ކުރަމުންދާ ކަމަށެވެ. އެގޮތުން ސީދާ ހެލިކޮޕްޓަރގެ ޓްރެއިނިންގް ހަދާފައި ހުރި ކުއްޖެއް ނެތް ކަމުގައި ވިޔަސް މިހާރު އެ މަސައްކަތް ބާރަށް ކުރަމުންދާކަން ޝަމާލް ފާހަގަކުރެއްވިއެވެ.
ގިނަ ގޮންޖެހުންތަކެއް ހުރިކަން ފާހަގަކޮށް ޝަމާލް އިތުރަށް ވިދާޅުވީ ޕައިލެޓުން ގޮތުގައި ތިބީ "ހައެއްކަ" ކުދިން ކަމަށާއި ތަފާތު އެކަޑެމީތަކުން ތަމްރީން ލިބިފައިވީ ކަމުގައި ވިޔަސް ސީދާ މިހާރު ހުރި އެއަރކްރާފްޓްގެ ރޭޓިންގްއެއް ހަދާފައި ނެތް ކަމަށެވެ. އޭނާ ވިދާޅުވީ އެމްއެންޑީއެފް ތެރެއިން ޕައިލެޓުން ތަމްރީން ކުރަން ނިންމީ ބޭޭރުން ޕައިލެޓުން ހޯދުމަށް ގޮންޖެހުންތަކާއި ދިމާވާތީ ކަމަށެވެ. ޝަމާލް ވިދާޅުވީ ރާއްޖޭގައި ކޮމާރޝަލް ޕައިލެޓުންގެ މުސާރަ އާއި އެމްއެންޑީއެފްއަށް ދެވޭ ވަރާ ފަރުގުތަކެއް އެބަހުރި ކަމަށެވެ.
ޕައިލެޓަކަށް މުސާރަ ދެވޭ ވަރަށް އެމްއެންޑީއެފުން މުސާރަ ދީފި ކަމުގައިވާނަމަ އެހެން ދާއިރާތަކުންވެސް އޮފިސަރުންނަށް މުސާރަ ބޮޑުކުރަން ޖެހޭނެކަން ފާހަގަކުރައްވައި ޝަމާލް ވިދާޅުވީ މާލީ ގޮތުން ގިނަ ގޮންޖެހުންތަކެއް ވެސް އެބަހުރި ކަމަށެވެ. ނަމަވެސް، މިހާރު ވެސް ތަޖުރިބާ ހުރި ފަރާތްތަކާއި ގައުމީ ދިފާއީ ބާރާއި ގުޅުމަށް މަޝްވަރާ ކުރަމުންދާ ކަމަށް ޝަމާލް ވިދާޅުވިއެވެ.
